دوای چەند كاتژمێرێك لەهاككردنی‌و دانانی وێنەی چەند پۆلیسێك‌و تۆمەتباركردنیان بە گەندەڵی، لەئێستادا پۆلیسی سلێمانی ئاشكرایدەكات كە پەیجەكەیان گەراوەتەوە ژێر كۆنترۆڵی خۆیان، لێكۆڵینەوەكانیش لەسەر ئاككردنەكە بەردەوامە.
ئاوێنە: بەرێوەبەرایەتی پۆلیسی پارێزگای سلێمانی بە فەرمی رایدەگەیەنێت كە لەئێستادا و دوای هەوڵێكی زۆر توانیویانە سەركەوتوبن لەگێرانەوەی پەیجەكەیان لەتۆری كۆمەڵایەتی فەیسبوك، ئەویش دوای ئەوەی بۆ ماوەی چەند كاتژمێرێك هاككرابو، باس لەوەش دەكات بەدوای ئەو كەسەدا دیەگەرێن كە كاری هاككردنەكەی ئەنجامداوە.
پێشتر پۆلیسی سلێمانی رایگەیاند، لاپەڕەی رەسمی(پەیج) بەڕێوەبەرایەتی پۆلیسی سلێمانی لە فەیسبوک لەلایەن کەسانی نەناسراوەوە هاک کراوە.
: سەرکەوت ئەحمەد، وتەبێژی پۆلیسی سلێمانی بە ئێن ئاڕ تی راگەیاند، لە بەرەبەیانی ئەمڕۆ شەممە (٢٠ی نیسانی ٢٠١٩) پەیجەکەیان لە فەیسبوک هاک کراوە و لە هەوڵی گەڕاندنەوەیدان، تائێستاش نازانن لەلایەن کێوە هاک کراوە.
ئەو کەسەی پەیجەکەی هاک کردوە، بەشێک لە بڵاوکراوەکانی سڕیونەتەوە و وێنەی چەند بەرپرسێکی بەڕێوەبەرایەتییەکەی داناوە و بە "گەندەڵیی" تۆمەتباری کردون.
پەیجی بەڕێوەبەرایەتی پۆلیسی پارێزگای سلێمانی زیاتر لە ٤٠ هەزار لایکی هەیە و رۆژانە کار و چالاکییەکانی بەڕێوەبەرایەتییەکە و ئەو روداوانە بڵاودەکاتەوە کە لە سنوری بەڕێوەبەرایەتییەكەدا رودەدەن.