نوسینگەی داواكاری گشتی لەئیستانبوڵ، ئەمڕۆ هەینی رایگەیاند، فەرمانی
دەستگیركردن بۆ 210 كەس لە ریزەكانی سوپای ئەو وڵاتە دەركراوە ئەوەش بەتۆمەتی
پەیوەندییان بە رەوتەكەی فەتحوڵا گوللـەن-ەوە كە توركیا تۆمەتباری دەكات بەوەی
لەپشت هەوڵی كودەتاكەی ساڵی 2016ەوە بوە.
ئاوێنە: نوسینگەی داواكاری گشتی ئیستانبوڵ رایگەیاند، ئەو تۆمەتبارانەی
فەرمانی دەستگیركردنیان بۆ دەرچوە دابەشبون بەسەر هێزە ئاسمانی، وشكانی و دەریاییەكانداو
لەنێویاندا پێنجیان پلەی عەقید، حەوتیان پلەی موقەدەم و 14یان پلەی رائیدو 33 كەسیشیان پلەی نەقیبیان
هەیە.
فەرمانی
دەستگیركردن بۆ ئەو 210 كەسەی سوپا بە تۆمەتی ئەوەی لایەنگری فەتحوڵا گوللـەن،
رابەری رەوتی خزمەتن دەرچوە.
توركیا فەتحوڵا
گوللـەن، كە لەئەمریكا دەژی، تۆمەتبار دەكات بەوەی پلانداڕێژەری هەوڵی كودەتاكەی
ساڵی 2016ی ئەو وڵاتە بوە بەڵام گوللـەن رەتیدەكاتەوە هیچ رۆڵێكی لەو هەوڵەدا
هەبوبێت.
لەدوای هەوڵی كودەتاكەی ساڵی 2016ەوە تا ئێستا دەسەڵاتدارانی توركیا 77 هەزار
كەسیان زیندانی كردوەو چاوەڕوانی دادگاییكردن دەكەن، ئەوەش بە تۆمەتی پەیوەندییان
بە هەوڵی كودەتاكەوەو هێشتاش هەڵمەتێكی دەستگیركردنی بەرفراوانی رێكخراو لەو وڵاتە
بەڕێوەدەچێت.
هەروەها لەپەیوەست بەو بابەتەوە تا ئێستا نزیكەی 15 هەزار كەس لە حكومەت و
سوپا لەكارەكیان دورخراونەتەوە یاخود دەركراون.