بەرزان ئەیوب: لەملم بدرێت نیو دێڕی ناڕاست نانوسمەوە
  2018-12-30       2048       
بەرزان ئەیوب

 

بەهۆی رەخنەگرتنی لە دەزگایەكی میدیایی، راگەیاندنكار‌و هونەرمەند، بەرزان ئەیوب دەبرێتە بەردەم دادگا، لەمیانی چاوپێكەوتنێكیشی لەگەڵ ئاوێنە رەتیدەكاتەوە ئەو ناوی هیچ كەس‌و لایەنێكی زراندبێت‌و دەڵێت " خوداو خەڵکی کوردستان ئەزانن لەملم بدرێت نیو دێڕی ناڕاست نانوسمەوە، بەڵگەو شایەتم بۆ ئەو نوسینە هەیە کە لەسەری دەسگیر کرام "، ئاماژەبەوەش دەكات كەیسی دادگایكردنەكەی بەكراوەیی ماوەتەوە،


ئاوێنە: دۆسیەی چونت  بۆ بەردەم دادگا‌و بریاری دەستگیركردنت بەكوێ‌ گەیشتوە؟


بەرزان ئەیوب: بەکەفالەت ئازاد کراوم ، کەیسەکە بەکراوەیی ماوەتەوە ، من بەتامەزرۆییەوە چاوەڕێی دادگایی کردنەکەم ، بەڵگەو شایەتم بۆ ئەو نوسینە هەیە کە لەسەری دەسگیر کرام .


ئاوێنە:  دەوترێت بەرزان ئەیوب، لە نوسینەكانیدا ناوی دەزگایەكی میدیایی‌و چەند كەسێكی زراندوە، ئایا ئەوەی نوسیوتە دەچێتە بازنەی ناو زراندنەوە ؟


بەرزان ئەیوب: من کەسێک نیم ناوی خەڵک بزڕێنم ، خوداو خەڵکی کوردستان ئەزانن لەملم بدرێت نیو دێڕی ناڕاست نانوسمەوە ، لەو نوسینەدا ناوی کەسم نەهێناوە ، بااسم لەچۆنیەتی ئاڕاستەی سیاسەت کردنی کەناڵەکە کردوە ، بەڕاشکاوی نوسیومە کەناڵی سیاسی ، زمانحاڵی حیزبی سیاسی زەکاتی پێ ناشێت و بەسواڵ کردن ناچێت بەڕێوە ، ئەو سواڵکردنی ساڵانەیە ئیسلام و حیزب و خۆشیان ناشرین ئەکات ، بەڵام بەداخەوە خوێندنەوەی دیوی دوەمیان نیە ئاستی مەعریفیان زۆر لاوازە ، لەو مەسجە جوانەی من تێنەگەیشتن .


ئاوێنە:  ئایا نوسین‌و توانجەكانت لەخانەی كێشەی كەسی نا بینیت؟ 


بەرزان ئەیوب:  کێشەی کەسیم لەگەڵ هیچ کام لەبەڕێوەبەر و ستافی کەناڵی پەیام نیە ، مافم لایانە ، داوای ئەو مافە ئەکەمەوە ، تەنیا کێشەیەک هەبێت ئەوان فێری ئەوە نەبوون ڕەخنەی جدییان لێ بگیرێت ، بۆیە نوسینەوەی خۆیان وەک ئەسڵی خۆیانیان پێ هەزم ناکرێت ، ئەوان و زۆرینەی قیادەی ئەحزابی ئیسلامی خۆیان لاموقەدەسە ، ڕەخنەلێگرتنیان بە کوفرو ئیلحاد ئەزانن ، ئەمەوێ فێری ئەو مۆدێلەیان بکەم ڕەخنە قبوڵ بکەن ، لە پیرۆزی بێنە دەرەوەو وەک مرۆڤ خۆیان ببینن کە پەیامبەر ئەفەرموێت "هەموو نەوەی ئادەم لەهەڵەدایە ، باشترین هەڵەکارانیش تەوبەکارانن ".

  
ئاوێنە: دەوترێت تا ئەو كاتەی لەو دەزگا میدیاییە كارت دەكرد هیچ كێشەیەكت نەبوە، بە پێچەوانەوە ستایشی كارە میدیاییەكانیت كردوە، ئەگەر وایە ئێستا بۆ ستایشەكانت گۆریوە بە توانج‌و رەخنە؟


بەرزان ئەیوب: لەوماوەیەدا کەلەوێ بووم هەمان ئەم کەسەبووم و هیچ گۆڕانکاریم بەسەردا نەهاتوە ، من پەروەردەکراوی دەستی خۆیانم ، هەرخۆیان فێریان کردم هیچ کات لەوتنی حەق نەترسم ، ئەو دێڕەی زۆر جەختیان لەسەر ئەکردەوە ئەمەبوو "بە ئەخلاق ترین موسوڵمان ئەوەیە لەوتنی چاکەو خراپەی مرۆڤەکان نەبترسێت ، نەشەرم بکات"  ئێ منیش هەر ئەوەم کردوە ،کابرا سەیارەی خۆی فرۆشت بۆ موچەی کارمەندەکانی ، پۆستم لەسەر کرد و سوپاسم کرد ، هەمان کابرا قۆرخ کاری و خزم خزمێنە ئەکات ڕەخنەم لێگرتوە ، دەیان جار پێیان وتوم ئەگەر تەنیا وەسفی کەسێک بکەیت و خراپیەکانی تێپەڕێنیت تۆ کۆیلەیت ، ئەگەر تەنیا خراپیەکانیت بینی و باشیەکانیت تێپەڕاند تۆ ستەم کاریت ، ئەگەر هەردوکیانت کرد ڕەوشت بەرزترین موسوڵمانیت ، ئێستا با خەڵک دادوەر بێت ،  چ بڕیارێکم لەسەر ئەدەن ڕازیم. 


ئاوێنە: زۆر جار باس لەوە دەكەیت كەسێكی مافخوراویت، رەنجی زۆرت لەو دەزگا میدیایە بە خەسار چوە، بۆچی لەرێگەی یاساوە داوای مافت نەكردوە‌و هانا بۆ سۆشیال میدیا دەبەیت ؟ 


بەرزان ئەیوب: بەڵێ من کارمەندی وەزارەتی ناوخۆ بووم و لەسەر کەناڵی پەیام فەسڵ کراوم  ، هەموو تەمەنی گەنجی و توانای هونەریم لەو حیزب و میدیایەدا بەخەرج دا ، ئەبوو خۆیان وەفایان هەبوایەو قەرەبویان بکردمایەتەوە ، بەڵام نەیانکرد ، بۆیە سەرەتا ئەمەوێت لە سۆشیال میدیاوە یادەوەریەکانم بنوسمەوەو ئەوانیش وەک ئەسڵی خۆیان بەخەڵکی کوردستان بناسێنم ، کە ئەوە مافێکی سەرەتایی خۆمە  "مافی ئازادی ڕادەربڕین" بەیاسا ڕێکخراوە ، دواتر ئەچمە دادگاو داوای هەموو مافەخوراوەکانم ئەکەمەوە.


زۆرترین بینراو
© 2018 Awene Online, Inc. All Rights Reserved.
×