لەراگەیەنراوێكیدا بنكەی نەهێشتنی مادە هۆشبەرەكانی قەزای سۆران ئاماژەبەوە دەكات لەماوەی 2 مانگدا 45 كەس بەتۆمەتی بەكارهێنانو بازرگانیكردن بە مادەهۆشبەرەكانەوە دەستگیركراونو بۆ وەرگرتنی رێكاریی یاسایی روبەروی بەردەم دادوەر كراونەتەوە.
ئاوێنە: بنكەی نەهێشتنی مادە هۆشبەرەكانی قەزای سۆران رایدەگەیەنێت لە هەردو مانگی 3 و 4 ساڵی 2019 بنکەی نەهێشتنی ماددە هۆشبەرەکانی سۆران بە هەماهەنگی لەگەڵ بەڕێوەبەرایەتی ئاسایشی سۆران و بازگەکانی سەر بەو بەڕێوەبەرایەتیە و بنکەی نەهێشتنی ماددە هۆشبەرەکانی کۆمەڵگای دەروازەی نێودەڵەتی حاجی ئۆمەران، بە پێی یاسای (14مخدرات) و بە وەرگرتنی زانیاری و چاودێری و بەدواداچون و لە چەندین هەڵمەتی جیاواز توانیویەتی 45 کەس بە تۆمەتی ئالودە بون و کڕین وفرۆشتنی ماددە هۆشبەرەکان و دراوی ساختە دەستگیر بکات.
دەشڵێت " لە نێویاندا 12 کەسی دانیشتوی دەرەوەی سنووری سۆران و 14 کەسیشیان بیانی و 2 داواکراو و 17 کەسی دانیشتووی سۆرانن، لە کاتی دەستگیر کردنی ئەو تۆمەتبارانە توانرا دەست بگیرێت بە سەر بڕی 2 ھەزار و562 دانە حەبی قەدەغەکراو و بڕی 21 ھەزار و 700 دۆلاری ساختە، ھەروەھا بڕی یەك كیلۆ و 200 گرام ماددەی ھۆشبەری جۆری ھێرۆین و بڕی 523 گرام ماددەی هۆشبەری جۆری شیشە و بڕی 95 گرام ماددەی هۆشبەری جۆری تلیاك و حەشیش و هەندێک کەلوپەلی بەکارهێنانی ماددەی هۆشبەر و یەک دەمانچە".