لە سلێمانی ئامادەكارییەكانی مانگی پیرۆزی رەمەزان راگەیەندراو قائیمقامی شارەكەش دەڵێت: لە مانگی رەمەزاندا رێگری تەواو لە بەرزبوونەوەی نرخی كاڵاو شتومەك دەكرێت و هەر فرۆشیارێك پابەند نەبێت رووبەڕووی سزای یاسایی دەكرێتەوە.

ئاوێنە: راگەیاندنی قایمقامیەتی سلێمانی: ئەمرۆ دوو شەممە 29.4.2019 لیژنەی ئەمنی سلێمانی و فەرمانگە پەیوەندارەكان و یەكێتی زانیانی ئیسلامی كوردستان بەسەرپەرشتی ئاوات محەمەد قائیمقامی سلێمانی كۆبووەوە و پلان و رێوشوێنەكانی تایبەت بە مانگی رەمەزان تاوتوێكرا , 

لە كۆنگرەیەكی رۆژنامەوانیشدا ئاوات محەمەد قائیمقامی سلێمانی رایگەیاند: بەهەماهەنگی لەگەڵ هەموو فەرمانگە پەیوەندیدارەكان پلانێكی گشتگیریان بۆ مانگی پیرۆزی رەمەزان داناوە و هەموو ئامادەكاریەكی پێویستیش كراوە بۆ ئەوەی بەبێ هیچ گرفتێك هاوڵاتیان پێشوازی لە مانگی پیرۆزی رەمەزان بكەن , لە بارەی نرخی كاڵاو شتومەك و چاودێری بازاڕ قائیمقامی سلێمانی رایگەیاند: لە مانگی رەمەزاندا چاودێریەكی ووردی بازاڕ دەكرێت و هاوشێوەی مانگەكانی تر رێگە بە بەرزبوونەوەی نرخی كاڵاو شتومەك نادێت و هەر فرۆشیارێك پابەند نەبێت بە مەرج و رێنماییەكانەوە رووبەڕووی سزای یاسایی دەكرێتەوە , لیژنەهاوبەشەكانیش لەو مانگەدا گەڕان و بەسەركردنەوەكانیان چڕتردەكەنەوە و رێگری لە هەموو جۆرەكانی سەرپێچی دەكەن, 

 دەربارەی كردنەوەی چێشتخانەو رێستۆرانتەكان لە مانگی رەمەزاندا ئاوات محەمەد ووتی : مەرج و رێنمایی دانراوە بۆ كاركردنی هەموو ئەو شوێنانەی كە دەیانەوێت لە مانگی رەمەزاندا كراوەبن و پێویستە بەتەواوی پابەندی مەرج و رێنماییەكان بن یەكێك لە رێنمایەكانیش پێویستە رووی پێشەوەی چێشتخانەو رێستۆرانتەكان داپۆشن و رێز لە مانگی رەمەزان و رۆژوانان بگرن, هەروەها ئەو شوێنانەی كە لە مانگی رەمەزاندا كراوە دەبن پێویستە لە جەژنی رەمەزانیشدا كراوەبن بەڕووی هاوڵاتیان و گەشتیاراندا,

قائیمقامی سلێمانی ووتیشی: لەرووی ئەمنیەوە لە هەموو شوێنە گشتیەكان رێوشوێنێكی پێویست دەگیرێتە بەر بۆ سەلامەتی گیانی هاوڵاتیان, لە بارەی دوكان و شوێنەكانی تایبەت بە خواردنەوە حكولییەكانیش ئاوات محەمەد رایگەیاند بۆ رێگرتن لە مانگی رەمەزان كاركردنی هەموو ئەو شوێنانە رێكدەخرێت , 

لە بەشێكی تری كۆنگرە رۆژنامەوانیەكەدا مامۆستا عەتا پێنجوێنی جێگری سەرۆكی لقی سلێمانی یەكێتی زانایانی ئیسلامی كوردستان رایگەیاند: پێویستە لە ئاستێكی باڵادا هەموو لایەك رێز لە مانگی پیرۆزی رەمەزان بگرن , داواشی لە كەناڵەكانی راگەیاندن كرد لە پەخشكردنی بابەت و بەرنامەكانیان پیرۆزی مانگی رەمەزان لە بەرچاوبگرن .