مەسعود بارزانی، سەرۆكی پارتی دیموكراتی كوردستان لەپەیامێكیدا كە بەبۆنەی ساڵیادی شۆرشی گوڵانەوە بڵاویكردوەتەوە ئاماژەبەوە دەكات ئیرادەی گەلی كوردستان بەهێزەو سەرباری بونی پیلانگێری، بەڵام بە ئیرادەیەکی بەرزتر لە جاران تێدەکۆشی.
ئاوێنە: مەسعود بارزانی، سەرۆكی پارتی دیموكراتی كوردستان لەپەیامەكەیدا دەڵێت "ئەوە دووپات دەکەینەوە کە ئیرادەی گەلی کوردستان بەھێزە و سەرباری بوونی پیلانگێڕی، بەڵام بە ئیرادەیەکی بەرزتر لە جاران تێدەکۆشی بۆ بەدیھێنانی مافە ڕەواکانی و بەردەوامی لە پەیامی ئاشتی و پێکەوەژیان و پێشکەوتنخوازی".
راشیدەگەیەنێت کە بە پیلانگێڕی و ناپاکی و ئاگر و ئاسن ناتوانن دەنگی گەلی ئێمە کپ بکەن و ناچارمان بکەن دەست لە ئازادیخوازی و مافە ڕەواکانمان ھەڵبگرین.
لەپەیامەكەیدا هاتوە " ئەگەر لە قۆناغێکیشدا خەباتی گەلی کوردستان تووشی وەستان و نسکۆ ھاتبێت، ئەوە گەلی ئێمە خۆی ناچەمێنێت و بە ئیرادەیەکی پۆڵایینەوە بەگژ داگیرکاریدا دەچێتەوە و تا وەدیھاتنی مافەڕەواکانی لە شۆڕش و بەرخوداندا دەبێت".