عادل عه‌بدولمه‌هدی: كه‌ركوك پێویستی به‌هاوكاری نێوان عێراق و حكومه‌تی هه‌رێم هه‌یه‌
  2019-06-02       815       
02/06/2019 كۆبونه‌وه‌ی ئه‌نجومه‌نی ئاسایشی نیشتمانی عێراق به‌ سه‌رۆكایه‌تی عادل عه‌بدولمه‌هدی

عادل عه‌بدولمه‌هدی، سه‌رۆك وه‌زیرانی عێراق رایگه‌یاند، كه‌ركوك پێویستی به‌ هاوكاری نێوان حكومه‌تی فیدراڵ و حكومه‌تی خۆجێی و حكومه‌تی هه‌رێم و هێزه‌كانی شاره‌كه‌ هه‌یه‌.

ئاوێنه‌: به‌پێی راگه‌یه‌ندراوێكی نوسینگه‌كه‌ی، ئه‌و وتانه‌ی عادل عه‌بدولمه‌هدی، سه‌رۆك وه‌زیرانی عێراق و فه‌رمانده‌ی گشتی هیزه‌ چه‌كداره‌كان، ئه‌مڕۆ یه‌كشه‌ممه‌ له‌میانی كۆبونه‌وه‌ی ئه‌نجومه‌نی ئاسایشی نیشتمانی عێراقدا هاتون بۆ تاوتوێكردنی دۆخی كه‌ركوك.

له‌ كۆبونه‌وه‌كه‌دا هه‌ریه‌كه‌ له‌ پارێزگاری كه‌ركوك به‌وه‌كاله‌ت و فه‌رمانده‌ی ئۆپه‌راسیۆنه‌كانی پارێزگای كه‌ركوك ئاماده‌ بون و دۆخی پارێزگاكه‌ له‌سه‌رجه‌م لایه‌نه‌كانی ئیداریی و ئه‌منی و خزمه‌تگوزارییه‌وه‌ هه‌ڵسه‌نگێنراوه‌.

به‌پێی راگه‌یه‌ندراوه‌كه‌ عادل عه‌بدولمه‌هدی جه‌ختی كردۆته‌وه‌ كه‌ وێڕای ده‌ستوه‌ردان و ئاڵۆزییه‌كان، دۆخی ئه‌منی له‌پارێزگای كه‌ركوك له‌ژێر كۆنترۆڵدایه‌و هێمای بۆ ئه‌وه‌ش كردوه‌ كه‌ ده‌بێت چاره‌سه‌ری ئه‌منی بدۆزرێته‌وه‌و هه‌وڵه‌ سیاسییه‌كان فراوان بكرێن و هاوكاریی نێوان هه‌مو لایه‌نه‌كان هه‌بێت به‌بێ دورخستنه‌وه‌ی هیچ لایه‌نێك و هه‌روه‌ها یاسا پته‌وبكرێت و هێزه‌ چه‌كداره‌كان ئه‌منییه‌كان توانادار بكرێن بۆ ئه‌وه‌ی به‌ ئه‌ركه‌كانیان هه‌ڵبسن.

هه‌روه‌ك جه‌ختیشی له‌سه‌ر دوركه‌وتنه‌وه‌ له‌و لێدوانانه‌ كردۆته‌وه‌ كه‌ خزمه‌ت به‌ ئاسایش و سه‌قامگیریی پارێزگاكه‌ ناكه‌ن و دوپاتیشیكردۆته‌وه‌ كه‌ داعش تاكه‌ دوژمنه‌و ده‌بێت به‌رده‌وام بن له‌سه‌ر به‌دواداچونی پاشماوه‌كانی.

سه‌رۆك وه‌زیرانی عێراق ئاماژه‌ی به‌وه‌شداوه‌ كه‌ فره‌یی له‌پارێزگای كه‌ركوك و ده‌ستوه‌ردانه‌كان، وا ده‌كات كه‌ هاوكاریی نێوان حكومه‌تی فیدراڵ و حكومه‌تی خۆجێی و حكومه‌تی هه‌رێم و هێزه‌كانی پارێزگاكه‌ پێویسته‌ به‌ ئامانجی سه‌رخستنی ئه‌و به‌رژه‌وه‌ندییه‌ باڵایانه‌ی پارێزه‌ری یه‌كڕیزی نیشتمانین و خزمه‌ت به‌ سه‌رجه‌م پێكهاته‌كانی كه‌ركوك ده‌كه‌ن.

ئه‌وه‌شی خستۆته‌ڕو كه‌ ته‌قینه‌وه‌كانی ئه‌م دواییه‌ی كه‌ركوك گه‌وره‌ كراون.


زۆرترین بینراو
© 2024 Awene Online, Inc. All Rights Reserved.
×