نێچیرڤان بارزانی، سه‌رۆكی هه‌ڵبژێردراوی هه‌رێمی كوردستان په‌یوه‌ندییه‌كی له‌گه‌ڵ به‌رهه‌م ساڵح، سه‌رۆك كۆماری عێراق ئه‌نجامداو تێیدا به‌ڕه‌سمی بانگهێشتی كرد بۆ رێوڕه‌سمی سوێندخواردنی وه‌ك سه‌رۆكی هه‌رێمی كوردستان.

ئاوێنه‌: به‌پێی ڕاگه‌یه‌ندراوێكی سه‌رۆكایه‌تی كۆماری عێراق، سه‌رله‌ئێواره‌ی ئه‌مڕۆ ٣/٦ نێچیرڤان بارزانی، سه‌رۆکی هه‌ڵبژێردراوی هه‌رێمی کوردستان په‌یوه‌ندییه‌کی ته‌له‌فۆنی له‌گه‌ڵ به‌رهه‌م ساڵح ،سه‌رۆك کۆماری عیراق ئه‌نجام دا و تیایدا وێرای به‌ ره‌سمی بانگهێشتکردنی سه‌رکۆمار بۆ ڕێوڕه‌سمی سوێندخواردنی سه‌رۆکی هه‌رێم، هه‌ردولا دۆخی سیاسیی عیراق و ناوچه‌که‌و هه‌رێمی کوردستانیان تاوتوێ کرد.

به‌پێی راگه‌یه‌ندراوه‌كه‌ له‌و په‌یوه‌ندییه‌ ته‌له‌فۆنییه‌دا هه‌ردولا هاوڕا بون له‌سه‌ر بایه‌خی پاراستنی یه‌کڕیزی و هه‌ماهه‌نگی له‌م هه‌لومه‌رجه‌ هه‌ستیاره‌ی که‌ ناوچه‌که‌ پێیدا تێپه‌ڕ ده‌بێ، جه‌ختیشیان کرده‌وه‌ که‌ پێویسته‌ هه‌وڵه‌کان یه‌کبخرێن له‌پێناو تێپه‌ڕاندنی ناکۆکییه‌کان و به‌دورگرتنی عیراق و هه‌رێمی کوردستان له‌ ئاڵۆزییه‌کان.

هاوکات سه‌رۆك کۆمار و سه‌رۆکی هه‌ڵبژێردراوی هه‌رێم پێویستیی هه‌ماهه‌نگی و هاریکاریی نێوان هەرێمی کوردستان و حکومەتی فیدراڵیان له‌ قۆناغی داهاتودا دوپات کرده‌وه ‌و پیرۆزباییی جه‌ژنی ڕه‌مه‌زانیان له‌ یه‌کتر کرد و هیوایان خواست که‌ ئه‌م بۆنه‌یه‌ ببێته‌ مایه‌ی ئۆقره‌یی و ئارامی و کۆتاییهاتنی قه‌یرانه‌کان.

هه‌روا سه‌رۆک کۆمار پیرۆزبایی له‌ سه‌رۆکی هه‌ڵبژێردراوی هه‌رێمی کوردستان كرد و هیوای سه‌رکه‌وتنی بۆ خواست.