مەسعود بارزانی: داعش خەریکە خۆی ڕێک دەخاتەوە
  2019-06-10       1702       


مەسعود بارزانی، سەرۆكی پارتی دیموكراتی كوردستان‌و سەرۆكی پێشوی هەرێمی كوردستان لەرێوره‌سمی سوێند خواردنی سه‌رۆکی هه‌رێمدا رایگەیاند كە بە هەمو توانایەوە پشتیوانی لەنێچیرڤان بارزانی، سەرۆكی نوێی هەرێمی كوردستان دەكات، ئه‌و وتی "داعش خەریکە خۆی ڕێک دەخاتەوە".


ئاوێنە: ئەمرۆ "دوشەممە" لەدانیشتنی پەرلەمانی كوردستان كە تایبەت بو بە سوێندخواردنی نێچیرڤان بارزانی، مەسعود بارزانی وتارێكی كورتی پێشكەش كرد كە وێرایی پیرۆزبایی كردن لە برازاكەی بە بۆنەی بونی بە سەرۆكی نوێی هەرێم پشتیوانی خۆشی بۆ راگەیاند.



بارزانی پیرۆزبایی ‌و سوپاسی خۆی ئاراستەی هاوڵاتیانی كوردستان كرد، ئاماژەی بەوەش كرد هەڵبژاردنی پەرلەمانی كوردستان بەسەركەوتویی ئەنجامدراوە‌و هەنگاو بە هەنگاویش قۆناغەكانی دیكەی پێكهێنانی حكومەتی هەرێمی كوردستان دەچێتە بواری جێبەجێكردنەوە، هیواشی خواست كە روداوەكانی ساڵی 2014 دوبارە نەبنەوە.



ده‌قی وتارەکەی بارزانی:


بەناوی خوای گەورە و میهرەبان

بەڕێزان بەخێربێن سەرچاوان

زۆر سوپاستان دەکەین و بەخێرهاتنتان دەکەین و زۆر خۆشحاڵین بە هاتنتان

سوپاس بۆ خوای گەورە کە یارمەتی داین بۆ ڕێکخستنەوەی دۆخی هەرێمی کوردستان، بەتایبەتی دوای هەڵبژاردنی ٣٠ی ئەیلوولی ساڵی رابردوو. سوپاس بۆ گەلی کوردستان و خۆڕاگرییان بەرامبەر زۆر هەڕەشەی جۆراوجۆر. سڵاو بۆ گیانی پاکی شەهیدان.

لە ئەنجامی هەڵبژاردنی ٣٠ی ئەیلوولی ساڵی ڕابردوو هەلومەرجێکی تازە هاتە پێشەوە، لە پرۆسەیەکی دیموکراتیدا سەرۆکایەتیی پەرلەمان هەڵبژێردرا، ئەمڕۆش سەرۆکی هەرێم سوێندی یاسایی خوارد و لە سبەینێشەوە هەنگاوەکانی دامەزراندنی حکوومەتی هەرێمی کوردستان دەست پێ دەکات.

لێرەدا من پیرۆزبایی لە نێچیرڤان بارزانی دەکەم، داوای سەرکەوتنی بۆ دەکەم و بە هەموو توانایەک پشتگیری دەکەم.

داوای جددیم لە حکوومەتی هەرێم و حکوومەتی فیدرال ئەوەیە کە پێکەوە هەوڵ بدەن هەرچی زووترە ئەو کێشانەی ماون، چارەسەریان بکەن، بەتایبەتیش ئەو کێشانەی کە لە ناوچەکانی دەرەوەی ئیدارەی هەرێمن، بەتایبەتیش ناوچەکانی کێشە لەسەر، چونکە ڕۆژ بە ڕۆژ کێشەکان قووڵتر دەبنەوە و جێی مەترسیی جددین.

پێویستە بە حیکمەت و لێکتیگەیشتن و هەماهەنگیی هەموو لایەک چارەسەری ئەو کێشانە بکرێت بەپێی دەستوور.

درووستە داعش تووشی شکان بووە، بەڵام داعش و هەڕەشەکەی ماوە، هەروەها خەریکە خۆی ڕێک دەخاتەوە، هاوبیری داعش ماون، هەردووک پێکەوە مەترسیی جددین لەسەر ئەمن و ئاسایشی نەک هەر عێراق، بەڵکوو هەموو ناوچەکە و جیهان، بۆیە پێویستیی بە هەماهەنگییەکی تەواو هەیە بۆ ڕیگەگرتن لەم مەترسییە گەورەیە تا جارێکیتر کارەساتی وەک ساڵی ٢٠١٤ دووبارە نەبێتەوە.

بۆ کێشەکانی ناوچەی ڕۆژهەڵاتی ناوەڕاستیش ئومێدەوارین هەموو لایەک کێشەکان چارەسەر بکەن چونکە شەڕ لە بەرژەوەندیی کەس نییە

لەناو هەرێمیش هیوادارم لایەنەکان بە گیانی هەست بە بەرپرسیارێتیکردن کار بکەن و کێشەکان چارەسەر بکەن، جارێکیتر بەخێرهاتنتان دەکەم.


زۆرترین بینراو
سه‌رۆك وه‌زیرانى ئیسرائیل هه‌ڕه‌شه‌ له‌عێراق ده‌كات
جەهەپە: ئاکەپە ئامادەکاری دەکات سەرۆک شارەوانییەکانی ئیستەنبوڵ‌و ئەنقەرەش دوربخاتەوە
یەکێتی ئەوروپا: لابردنی سێ سەرۆک شارەوانییەکە سه‌لماندی دیموكراسی له‌توركیا بونی نییه‌
عومەر بەشیر لەنێو قەفەس دادگا: ٢٥ ملیۆن دۆلارم لە محەمەد بن سەلمان وەرگرتووە
كشتوكاڵی سلێمانی سزای‌ 27 فه‌رمانبه‌ری‌ دا له‌سه‌ر ئه‌وه‌ی‌ پابه‌ندنه‌بوون به‌كاتی ده‌وامكردنه‌وه‌
فازڵ میرانی: ڕێگە نادەین لەهەرێمی کوردستانەوە هەڕەشە لەئاسایشی ئێران بکرێت
سوپای سوریا لە ئاسمانەوە هێرشی کردە سەر کاروانێکی سەربازی سوپای تورکیا
وتەبێژی حكومەتی هەرێم: ئامادەین داهاتی 250 هەزار بەرمیل نەوتی رۆژانە رادەستی بەغدا بكەین
پۆلیسی تورکیا هێرشی کردە سەر خۆپیشاندەرانی دیاربه‌كر
مه‌سرور بارزانی‌ داوا له‌وه‌زیره‌كانی‌ كابینه‌ی‌ نۆیه‌م ده‌كات فۆڕمی‌ ئاشكراكردنی‌ سامانه‌كه‌یان پڕبكه‌نه‌وه‌
© 2018 Awene Online, Inc. All Rights Reserved.
×