پەرلەمانتارێكی عێراق: سوتاندنى دەغڵ و دانى جوتیاران ده‌ستی له‌پشته‌
  2019-06-12       340       

ئەندامێکى پەرلەمانى عێراق دەڵێت، 45 حاڵەتى سوتاندنى دەغڵ و دانى جوتیاران تۆمارکراون کە سوتاندنەکانیان دەستى لە پشتەو پێویستە لێکۆڵینەوەى جدى بکرێت.

ئاوێنه‌: رێبوار تەها، یەکێک لە نوێنەرانى کەرکوک لە پەرلەمانى عێراق، بەدەنگى ئەمەریکاى راگەیاند"دیاردەى سوتاندنى دەغڵ و دانى جوتیاران دیاردەیەکى سروشتى و ئاسایى نییە، 45 حاڵەت تۆمارکراون کە بە دەست سوتێنراون."

وتیشى"ئێمە بەدواداچونمان کردوە و گەیشتوینەتە ئەنجام، کە هەندێک لەو دەغڵ و دانانە دەست لەپشت سوتاندنیانەوە هەیە."

سەبارەت بەو دەستانەى لەپشت سوتاندنى دەغڵ و دانى جوتیارانەوەن، پەرلەمانتارەکەى عێراق وتى"رەنگە داعش بێت، رەنگە دەستى ترى نادیار بێت بۆ نانەوەى پشێوى و ناکۆکى لەنێوان پێکهاتەکاندا."

وتیشى"سوتاندنى دەغڵ و دانى ئەمساڵ کە لەمێژودا وێنەى کەمە، کارەساتە و ڕوبەڕوى وڵات بوەتەوە، نابێت حکومەتى عێراق ئەمە بە ئاسایى وەربگرێت، بەڵکو دەبێت لێپێچینەوە بکرێت."

رێبوار تەها، ئاماژەى بەوەشکرد داوایەکى ره‌سمیان داوەتە پەرلەمانى عێراق بۆ لێکۆڵینەوە کردن و قەرەبوکردنەوەى جوتیاران، بریارە لەدانیشتنى سبەینێ پێنجشەمەى پەرلەمانى عێراق دا گفتوگۆى لەسەر بکرێت.

وتیشى"داوامانکردوە پەرلەمان گفتوگۆ لەسەر مەسەلەى سوتاندنى دەغڵ و دانى جوتیاران بکات، پاشان بریار بدات لەسەر قەرەبوکردنەوەى جوتیاران و لێکۆڵینەوەى جدى له ‌مەسەلەکە."

زۆرترین بینراو
© 2018 Awene Online, Inc. All Rights Reserved.
×