رێکخەرى گشتى و خانەى راپەڕاندن و باژێروانەکانى بزوتنەوەى
گۆڕان بۆ تاوتوێکردنى میکانیزمەکانى خۆڕێکخستنەوەی بزوتنه‌وه‌و ئه‌نجامدانی هەڵبژاردنە
ناوخۆییەکان و كۆنفرانسی نیشتمانی، لە کۆبونەوەدان.
ئاوێنه: به‌پێی میدیای ره‌سمی گۆڕان، کۆبونەوەکە پێشنیوەڕۆى
ئەمڕۆ شەممە لە مەکۆی سەرەکی بزوتنەوەی گۆڕان لە سلێمانی دەستى پێکرد تایبەتە بە گفتوگۆى
ئۆرگانە ناوخۆییەکان بەمەبەستى خۆرێکخستنەوە و تاوتوێکردنى هەڵبژاردنە ناوخۆییەکان
و بەستنى کۆنفرانسى نیشتیمانى لە داهاتوداو دواى پێکهێنانى کابینەى نوێی حکومەت.
نزار محەمەد، باژێروانى هەڵەبجەى بزوتنەوەى گۆڕان وتویه‌تی"کۆبونەوەى
باژێروانەکان و رێکخەرى گشتى و خانەى راپەڕاندن، بۆ تاوتوێکردنى هەنگاو و میکانیزمەکان
و چۆنیەتى خۆ رێکخستنەوەیە."
وتیشى"کۆبونەوەکە بۆئەوەیە کە بە هەمومان بتوانین ئامادەکارى
بکەین لەگەڵ بازنە و رایەڵەکان بۆئەوەى هەوڵى خۆرێکخستنەوە بدەین بۆ بەستنى کۆنفڕانسى
نیشتیمانى و هەڵبژاردنە ناوخۆییەکان، بەتایبەت لەو سۆنگەیەوە کە پەیکەرى رێکخراوەیى
بزوتنەوەى گۆڕان پێچەوانەى هێزەکانى دیکە، ئاسۆییە نەک ستونى".