گۆڕان: تا ده‌ركردنی یاسای نه‌وت و غاز مافی هه‌رێمه‌ ئیداره‌ی سامانه‌ سروشتییه‌كانی خۆی بكات
  2019-06-19       769       

بزوتنه‌وه‌ی گۆڕان پێی وایه‌ پرسی نه‌وت و غازو چه‌ند پرسێكی دیكه‌ هه‌مویان بابه‌تی نیشتمانین و نابێت بكرێن به‌ بابه‌تی موزایه‌ده‌ له‌نێوان لایه‌نه‌كانی هه‌رێم و ده‌شڵێت، تا ده‌ركردنی یاسای نه‌وت و غاز، مافی ده‌ستوری هه‌رێمی كوردستانه‌ نه‌وت و غاز به‌رهه‌م بهێنیت و ئیداره‌ی سامانه‌ سروشتییه‌كانی هه‌رێم بكات.

ئاوێنه‌: بزوتنه‌وه‌ی گۆڕان، ئه‌مڕۆ(چوارشه‌ممه‌)، له‌ڕونكردنه‌وه‌یه‌كدا رایگه‌یاند"بۆیە بزوتنەوەی گۆڕان بەهەمو توانای پشتگیری لە سەرجەم ئەو رەخنانە دەکات، کە لە پێناو بەرژەوەندی گشتی دەگیرێ و بە زمانی گوڵ و بەشێوازی شارستانی ئاراستەی دەسەڵاتدارانی عێراق و هەرێم دەکرێت."

ئه‌وه‌شی خستۆته‌ڕو كه‌ "هەر رەخنەیەکیش لەلایەن هەڵسوڕاوانی حیزبی و حکومەت و پەرلەمانەوە بگیرێ بە ناڕەوا بۆ مەرام و بەرژەوەندی کەسێتی، بۆ خۆنواندن و خۆدەرخستن و بە زمانێکی ناشایستە و ناشارستانی ئاراستەی کەس و لایەن و دەسەڵاتدارانی عێراق و هەرێم بکرێ، گوزارشت لە سیاسەت و بەرنامەی بزوتنەوەی گۆڕان ناکات، بەڵکو رەتیشی دەکاتەوە."

سه‌باره‌ت به‌ پرسی نه‌وت و غاز جه‌ختی كردۆته‌وه‌ كه‌ دەبێ بەرێگای دەستوری یاسایی چارەسەر بکرێ ئەویش بە دەرکردنی یاسای نەوت و غاز و وتوشیه‌تی"تا دەرکردنی  ئەم یاسایەش مافی دەستوری هەرێمی کوردستانە نەوت و غاز بەرهەم بهێنێ و ئیدارەی سامانە سروشتیەکانی هەرێم بکات."


دەقى رونکردنەوەکە...

بزوتنەوەی گۆڕان، وەک هێزێکی سیاسی مەدەنی رەخنەگر دروست بوەو واشدەمێنێ، هەر لەگەل دەسپێکی کاری سیاسی و راگەیاندنی ئەم بزوتنەوەیەدا، دروشمی (رەخنە بە زمانی گوڵ) ی هەڵگرت.

هەر لەبەرئەوەیە، کە رەخنەگرتن بە زمانی گوڵ بابەتێکی حەیاتیە بۆ بزوتنەوەی گۆڕان، بۆ ئەوەی هەمیشە بە شێوازێکی شارستانی لە دژی کارە نا دەستوری و نایاساییەکان و لەدژی هەمو شێوازەکانی گەندەڵی خەبات بکات و بوەستێتەوە.

بۆیە بزوتنەوەی گۆڕان بەهەمو توانای پشتگیری لە سەرجەم ئەو رەخنانە دەکات، کە لە پێناو بەرژەوەندی گشتی دەگیرێ و بە زمانی گوڵ و بەشێوازی شارستانی ئاراستەی دەسەڵاتدارانی عێراق و هەرێم دەکرێت.

هەر رەخنەیەکیش لەلایەن هەڵسوڕاوانی حیزبی و حکومەت و پەرلەمانەوە بگیرێ بە ناڕەوا بۆ مەرام و بەرژەوەندی کەسێتی، بۆ خۆنواندن و خۆدەرخستن و بە زمانێکی ناشایستە و ناشارستانی ئاراستەی کەس و لایەن و دەسەڵاتدارانی عێراق و هەرێم بکرێ، گوزارشت لە سیاسەت و بەرنامەی بزوتنەوەی گۆڕان ناکات، بەڵکو رەتیشی دەکاتەوە.

سەبارەت بە کێشەو پرسی نەوت و غاز، مادەی (140)، بودجەی ساڵانە و پێشمەرگە، کە هەمویان پرسی نیشتیمانین، و نابێ بکرێ بە بابەتی موزایەدە لەنێوان لایەنەکانی هەرێم، دەبێ بە رێکاری دەستوری و یاسایی چارەسەر بکرێ لەنێوان هەرێم و بەغدا، بەبەشداری و هاوکاری و هەماهەنگی تەواوی لایەنەکانی کوردستان لە بەغدا.

بۆ بابەتی نەوت و غازو بودجەی هەرێمیش، بزوتنەوەی گۆڕان جەخت لەسەر ئەوە دەکاتەوە، کە دەبێ بەرێگای دەستوری یاسایی چارەسەر بکرێ، ئەویش بە دەرکردنی یاسای نەوت و غاز و دەرکردنی یاسای دەستەی گشتی چاودێریکردنی داهاتە تەرخانکراوەکانی فیدڕاڵی بەپێی (مادەی 106ی دەستوری هەمیشەیی عێراق)و دروستکردنی ئەو دەستەیە بە زوترین کات، کە چواردەساڵە دەسەڵاتدارانی عێراق بەگشتی خۆیان لە دەرکردنی ئەو یاسایانە ئەدزنەوە، کە دەرکردنی ئەو یاسایانە و دروستکردنی ئەو دەستەیە تەنیا زامنە بۆ ئەوەی جارێکی تر بودجەی هەرێم و موچەی فەرمانبەران بدرێ و نەوتیش بە گشتی بخرێتە خزمەتی هاوڵاتیان لە عێراق و هەرێم.

تا دەرکردنی  ئەم یاسایەش مافی دەستوری هەرێمی کوردستانە نەوت و غاز بەرهەم بهێنێ و ئیدارەی سامانە سروشتیەکانی هەرێم بکات، بەڵام جەخت لەوە دەکەینەوە کە دەبێ ئەو داهاتانە شەفاف بێت و لەژێر چاودێری پەرلەمانی کوردستان و بە بڕیاری حکومەتی هەرێم بۆ بەرژەوەندی هاونیشتیمانیانی کوردستان سەرف بکرێ.   

بزوتنەوەی گۆران 
19/6/2019

زۆرترین بینراو
© 2018 Awene Online, Inc. All Rights Reserved.
×