داوا لە سێ سەرۆكایەتییەكەی عێراق دەكرێت هەڵوێستی جددیان بەرامبەر بە بۆردومانەكانی توركیا هەبێت
  2019-06-27       989       

كاوە محەمەد، پەرلەمانتاری گۆڕان لەپەرلەمانی عێراق داوا لەسێ سەرۆكایەتییەكەی عێراق دەكات هەڵوێستی جددی و توندیان هەبێت بەرامبەر بە بۆردومانە بەردەوامە هەڕەمەكییەكانی توركیا بۆ سەر گوندو ناوچە سنورییەكانی كوردستانی عێراق كە تێیدا هاوڵاتی مەدەنی دەبنە قوربانی.

ئاوێنە: ئێوارەی ئەمڕۆ(پێنجشەممە)، بەهۆی بۆردومانی فڕۆكە جەنگییەكانی توركیاوە لە چیای كورتەك-ی بناری قەندیل كە تێیدا دو ئۆتۆمبێلی مەدەنی كراونەتە ئامانج، چوار هاوڵاتی شەهید بون و پێنجی دیكەش بریندار بون.

دوای ئەو بۆردومانە كاوە محەمەد، پەرلەمانتاری گۆڕان لەپەرلەمانی عێراق لەبەیاننامەیەكدا كە وێنەیەكی بۆ ئاوێنە نێردراوە رایگەیاند، ئەمڕۆ بەهۆی بۆردومانی فڕۆكە جەنگییەكانی توركیاوە بۆ سەر ناوچەكانی نیشتەجێبون لەناوچە سنورییەكانی سەر بە پارێزگای هەولێر، چوار هاوڵاتی شەهید بون و پێنجی دیكەش برینداربون كە هەمویان هاوڵاتی بێ چەك و لە دانیشتوانی ناوچەكەن.

كاوە محەمەد وێڕای بەتوندی ئیدانەكردنی پێشێلكردنی بەردەوامی سەروەری عێراق و ئەو بۆردومانە هەڕەمەكیانە بۆ سەر چەند ناوچەیەكی بەرفراوانی هەرێمی كوردستان بەبێ هیچ بەرەنگارییەكی حكومەتی ئیتیحادی و حكومەتی هەرێم، جەختی كردۆتەوە كە پێویستە ئەو دەستوەردانانەی حكومەتی توركیا كە رۆژانە دەیانكاتە سەر خاكی عێراق رابگیرێن.

ئەو پەرلەمانتارەی گۆڕان داوای لەحكومەتی ئیتیحادی و ئەنجومەنی نوێنەرانی عێراق بەتایبەت سێ سەرۆكایەتییەكە كردوە، هەڵوێستی جددی و توندیان هەبێت بەرامبەر بە بۆردومانكردنی گوندو ناوچە سنورییەكانی كوردستانی عێراق و بەرگری لەو هاوڵاتییە بێ چەكانە بكەن كە شایستەی ژیانێكی ئارام و شكۆمەندانەن نەك ئەوەی رۆژانە لەژێر رەحمی ئاگردا بژین.

هەروەك داواشی لە نەتەوە یەكگرتوەكان و رێكخراوە نێودەوڵەتییەكانی داكۆكیكاری لەمافەكانی مرۆڤ كردوە كە رۆڵیان هەبێت لە راگرتنی هێرشە چەندبارەكانی فڕۆكەكانی توركیاو دانانی سنورێك بۆ شەهیدكردن و ئاوارەكردنی هاوڵاتیانی ئەو ناوچانە.


زۆرترین بینراو
سۆران عومه‌ر: به‌دواداچوونێكى ورد ده‌ریخست ئامانج بابانى بكوژى هاوسه‌ر و منداڵه‌كه‌ى و خۆیه‌تى
په‌لەمانتارێکى پارتى: دوای ڕۆژئاوای کوردستان ئاڕاستەی دژایەتی تورکیا بەرەو ڕوی هەرێمی کوردستانە
به‌ڕێوه‌به‌ری پێشووی CIA: له‌ ئه‌نجامدا به‌ریتانیا و فه‌ڕه‌نساش کورده‌کان به‌جێده‌هێڵن
سیناتۆرێکی ئەمریکی: بۆ تەمبێ کردنی تورکیا پێویستە هەم گێزەر و هەم تێڵا بەکار بهێندرێت
سەركردەیەكی پارتی: تورکیا ناتوانێ ئەو بەرنامە چەپەڵەی بۆ رۆژاڤا دایناوە جێبەجێ بکات
وەفدێكی سەربازیی روسیا گەیشتە قامیشلۆ
داوا ده‌کرێت 40 هەزار سەربازی وڵاتانی ئەندام لە یەکێتی ئەوروپا رەوانەی رۆژئاوای کوردستان بکرێت
لەمڕۆوە بە بەردەوامی كامێرای چاودێری لەڕێگایەك دادەنرێت
شاسوار عەبدولواحید: ئەم دۆخە دەبێتە بازدانێکی گەورە بۆ بەرەوپێشبردنی دۆزی کورد
ئەسەسەرد: گەر تورکیا ئامانجەکانى لەباکورى سوریا پێکا، ئەوا بیر لە فراوانکردنى سیناریۆکە دەکاتەوە
© 2018 Awene Online, Inc. All Rights Reserved.
×