ترەمپ بۆ میری قه‌ته‌ر: ئێوه‌ هاوپەیمانێکی زۆر بەنرخن و زۆر هاوکاری ئێمە بوون
  2019-07-09       371       

سەرۆکی ئەمریکا، دۆناڵد ترەمپ و میری قەتەر، شێخ تەمیم بن ‌حەمەد ئال سانی لە میانی ئێوارە خوانێکدا لە واشنتۆن، پەیامی هاریکاریی بنیاتنەرانەی دوولایەنەیان دا.

ئاوێنه‌: شێخ تەمیم بن حەمەد ئال سانی کە رۆژی دووشەممە ٩ی ته‌موزی ٢٠١٩، دەستی بە دیدار و کۆبوونەوەکانی لە ئەمریکا کرد لە ئێوارە خوانێکدا کە وەزیری گەنجینەی ئەمریکا، ستیڤن منوچین میوانداریی دەکرد، لەگەڵ دۆناڵد ترەمپ کۆبوویەوە.

لە میانی وتەیەکدا کە لە خوانەکەدا پێشکەشیکرد، ترەمپ بە ستایشەوە باسی لەو وەبەرهێنانانە کرد کە قەتەر لە ئەمریکا کردوویەتی و جەختی لەوەشكردەوە کە وەبەرهێنانی نوێ لە رێگادایە و ئەوان ئێجگار بەمە خۆشحاڵن.

ترەمپ تیشکی خستەسەر ئەوەش کە رۆژی سێشەممە لە کۆشکی سپی لەگەڵ ئال سانی کۆدەبنەوە و رایگەیاند "دەزانم کە هەموو شتێک (لە نێوان هەردوو وڵاتدا) زۆر باش دەبێت. ئێوە هاوپەیمانێکی زۆر بەنرخن و لەبارەی بنکەیەکی سەربازیی گەورە و فڕۆکەخانەیەکی سەربازیی، زۆر هاوکاری ئێمە بوون".

لای خۆیشییەوە شێخ تەمیم بن ‌حەمەد ئال سانی ئاماژەی بە زۆریی بوارەکانی هاریکاریی لە نێوان هەردوو وڵاتدا کرد و وتی: "ئەم سەردانەم جەختکردنەوەیە لەو نموونەییبوونە هاوبەشەی کە لە نێوانماندا هەیە. ئەمڕۆ لێرەدا هاوبەشیی بەهێزی ئابوورییمان پیرۆزدەکەین".

میری قەتەر وتیشی: "بەداخەوە لە ناوچەکەماندا کەسانێک هەن کە هاوڕانیین لەگەڵمان. لەدونیای ئەمڕۆماندا پەیوەندیی هاوپەیمانیی لە رێگەی هاوبەشیی دیارییکراوەوە ئەنجامدەدرێت و هەندێک هاوپەیمانی دیارییکراو بەڕاستی دۆست نیین، بەڵام ئەمریکا و قەتەر، هاوبەش، هاوپەیمان و دۆستن".
زۆرترین بینراو
© 2018 Awene Online, Inc. All Rights Reserved.
×