2019-07-13 959
چەند لایەنێكی سیاسی دەیانەوێت بۆ بەرژەوەندی خۆیان و به‌مه‌به‌ستی گوشار خستنە سەر حكومەتی فیدراڵی عێراق خۆپێشاندانەكانی بەسڕە به‌كاربهێنن، رێكخەرێكی خۆپێشاندانەكان رایده‌گه‌یه‌نێت ''كە هەینی داهاتوو خۆپێشاندانی ملیۆن كەسی لە 14 پارێزگای عێراق ساز دەكەین''.
ئاوێنه: خەلیل ناجی، یه‌كێك له رێكخەرانی خۆپێشاندانەكانی به‌سره ئەمڕۆ ١٣ی ته‌موزی ٢٠١٩ لە بەیاننامەیەكی رۆژنامەوانی رایگەیاند، ''خۆپێشاندانی داهاتوو لە 14 پارێزگای عێراق ساز ده‌كه‌ین و ملیۆنێك كەس بەشداری تیادا دەكەن و داوای باشتركردنی خزمەتگوزاری تیادا دەكەین''.
ئه‌و ده‌ڵێت، لە خۆپێشاندانی هەینی داهاتوو كە جەماوەری و ئاشتیانە دەبێت، داوای خزمەتگوزاری دەكەین كە زۆر خراپە، جیا لە داواكردنی دابینكردنی هەلی كار و ئاشكراكردنی گەندەڵكاران و نەهێشتنی بەشبەشێنەی قێزەوەن.
ناجی دووپاتی كردەوە، ئەو خۆپێشاندانانە تا گەیشتن بە جێبەجێكردنی داواكان بەردەوام دەبن و ناوەستن تا ئەوكاتەی خزمەتگوزارییەكان باشتر دەبن و هەلی كار بۆ دەرچووان دابین دەكرێت، بۆیە بەهۆی پەرۆشی خەڵكەكەوە پێشبینی دەكەین ببێتە خۆپێشاندانی ملیۆن كەسی.
به‌پێی هه‌واڵی میدیاكانی عێراق شه‌وی رابردوو له گه‌ڕه‌كی جه‌زائیر خۆپیشانده‌رانی به‌سره دژی خراپی خزمه‌تگوزاریه‌كانی شاره‌كه ده‌ستیان كرد به خۆپیشاندان و دروشمی ''دڵ و گیانمان فیدای تۆ بێت'' بۆ سه‌دام حسێن ده‌وته‌وه.