دەست لەكاركێشانەوەی بەكۆمەڵ له‌ ناو لێپرسراوانی نه‌وه‌ی نوێ ڕوویدا
  2019-07-14       1702       

ژمارەیەك لەئه‌ندامانی نەوەی نوێ لەشار و شارۆچكه‌كانی هەرێمی كوردستان دەست لەكاركێشانەوەیان پێشكەشی حزبەكەیان دەكەن و دەڵێن "لەناو جوڵانەوەی نەوەی نوێ جیاوازی دەکرێ".


ئاوێنه‌: ئەمڕۆ یەكشەممه‌ 14ـی تەمووزی ٢٠١٩، لە نامەیەكدا کە ناوی ١٥ ئه‌ندامانی نەوەی نوێی لەسەرەو ئاڕاستەی رای گشتییان کردوە دەڵێن "دوای زیاتر لە ساڵێك و نۆ مانگ كاركردنمان لە سۆشیال میدیا و ڕێكخستنەكانی جووڵانەوەی نەوەی نوێ لە ئاستە جیاوازەكانی ئەندام ئەنجومەن و ڕێكخەریدا، ئەمڕۆ بڕیاری دەست لەكاركێشانەوەی بەكۆمەڵ ڕادەگەیەنین، دوای بڵاوكردنەوەی ئەو نووسراوە هیچ پێوەندییەكمان بە جووڵانەوەی نەوەی نوێ نامێنێت".



دەقی نامەکە:


نامەیەك بۆ ڕای گشتی
بابەت/ دەست لەكاركێشانەوە
پاش سڵاو و ڕێز...
ئێمە وەك ژمارەیەك خۆبەخشی جوڵانەوەی نەوەی نوێ كە لەخوارەوە ناومان هاتووە، دوای زیاتر لە ساڵێك و نۆ مانگ كاركردنمان لە (سۆشیال میدیا) و ڕێكخستنەكانی جوڵانەوەی نەوەی نوێ لە ئاستە جیاوازەكانی (ئەندام ئەنجومەن و ڕێكخەری)دا، ئەمڕۆ بڕیاری دەست لەكاركێشانەوەی بەكۆمەڵ ڕایدەگەیەنین، و دوای بڵاوكردنەوەی ئەم نوسراوە هیچ پەیوەندیەكمان بە جوڵانەوەی نەوەی نوێ - وە نامێنێت، لەبەر چەند هۆكارێك.
بێگومان كاتێك ئێمە پەیوەندیمان بەم جوڵانەیەوە كرد ئامانجێكی گەورەمان هەبوو، لەگەڵ ئەو ئامانجە گەورەدا خاوەن بیر و باوەڕێكی جیاواز بووین، كە ناكرێت مرۆڤی بوێر ناعەدالەتی و زوڵم قبوڵ بكات، پێمان وابوو ناكرێت مرۆڤ هەبوونی ئەو ئاستە كۆمەڵایەتی و ئابوریانە قبوڵ بكات كە لە هەرێمەكەماندا زۆر بە ئاسانی و بە ڕوونی هەستی پێدەكرێت، باوەڕمان وابوو بێدەنگ بوون لەئاست ئەو جیاوازیانە زوڵمێكی گەورەیە لە خودی خۆمان و كۆمەڵگاكەمانی دەكەین، بۆیە پەیوەندیمان بە جوڵانەوەی نەوەی نوێ - وە كرد تاكو كۆتای بەو جیاوازی و زوڵم و ئاستە كۆمەڵایەتی و ئابوریانە بهێنین، بەڵام زۆر بەداخەوە ئەوەی لە ڕواڵەت و هەڵسوكەوتی ئەم جوڵانەوە بەدی دەكرێت زۆر جیاوازە لەوەی لە ناوەڕۆكدا بوونی هەیە.
بێگومان هیچ كەس نایەوێت بەردەوامی بە كارێك بدات كە جیاوازبێت لە ئامانج و ویستی ئەو، وە دڵنیاتان دەكەینەوە دوای بڵاو بوونەوەی ئەم نوسراوەی ئێمە بە [جاسوس، خۆفرۆش، خیانەتكار، ترسنۆك، بێ ئیرادە، سەبر كورت، بەرژەوەندی ویست، ...هتد] ناوزەند دەكرێین، بەڵام بێدەنگ نەبوونمان لە جیاوازی كردنەكانی نێوخۆی جوڵانەوەكە و هەڵوێستەكانمان ئێمەی گەیاندە ئەو قەناعەتەی ئەم بڕیارە بدەین وە لەپێناو بیر و باوەڕمان ئامادەین خۆڕاگربین لەبەرامبەر ئەو تۆمەتانەیش، چونكە لای هەمووان ڕوونە كات دادپەروەرترین حاكم و بڕیاردەرە، و هۆكاری بەردەوام نەبوونی ئێمەیش بـۆ چەند خاڵێك دەگەڕێتەوە، كە لە دیارترینیان:
۱- لادانی جوڵانەوەكە لەسەر بنەما سەرەكیەكان و ئەو بیر و بۆچونانەی كە ئێمە كارمان بۆ بەدەست هێنانی دەكرد، لەوانەیش (بوێر بوون و بە هەڵوێست بوونی گەنجان، هاوبەشی پێكردنی گەنجان لە بڕیاردان، دادپەروەری و جیاوازی نەكردن، ئازادی لە ڕادەربڕین و ڕەخنە لێگرتن، بەكارنەهێنانی جوڵانەوەكە بۆ بەرژەوەندی شەخسی، و ... هتد).
۲- سەرەتا كە ئێمە پەیوەندیمان بە ئەم جوڵانەوەیە كرد، وتمان ئێمە جیاوازین و جیاواز دەبین، بەڵام نەخێر زۆر بەداخەوە لێرەدا هیچ جیاوازیەك بوونی نیە، سەرەڕای ئەوەی كە نەمانتوانی جیاوازبین جیاوازبوونیشمان ناشیرین كرد، تەنها جیاوازیەك كە بوونی هەبێت ڕواڵەت و دەم و چاوی سەركردەی حیزبەكانە، و سەركردەی ئەم جوڵانەوەیەش زۆر باش دەتوانێت قسەی باق و بریق بكات و عاتیفەی خەڵكی بجوڵێنێت، كە بەشاهیدی كەسە بوێر و بەهەڵوێستەكانی ناو جوڵانەوەكە دەڵێین ئەوەی كە دەگوترێت لەسەر شاشە و ئەوەی دەكرێت (۱۸۰) پلە پێچەوانەی یەكترن.
۳- قبوڵ نەكردنی ڕای جیاواز لە جوڵانەوەكەدا، و دیكتاتۆریەت و بڕیاردانی تاكلایەنە و قبوڵ نەكردن و گوێ نەگرتن بۆ ڕەخنە و پێشنیار، لەلایەن سەرۆكی جوڵانەوەكەوە، كە لێرەدا و بۆ ئەم خاڵە پێویستمان بە دانانی خاڵی كۆتای هەیە، بۆ سەرجەم سەركردە و بەرپرسە حیزبی و حكومیەكانی تریش پێویستمان بە خاڵی كۆتای هەیە.
٤- هەڵخەڵەتاندنی خەڵكی و خۆبەخشەكان بە ناوی (خۆبەخش)یەوە، كە ئەوانەی بەڕاستی ماندوون و لە ناو خەڵكی قسەیان پێدەگوترێت خۆبەخشی ڕاستەقینەن، بەڵام ئەوانەی لە ئۆفیسی سەرەكی جوڵانەوەكە كاردەكەن، كراون بە خاوەنی مووچەی مانگانە و لەسەر شاشەكان و سۆشیال میدیا كار بۆ بەناوبانگ بوون و دەركەوتنیان دەكرێت.
٥- جیاوازی كردن لەنێوان خۆبەخشەكانی (ئەندام ئەنجومەن، ڕێكخەر، سۆشیال میدیا)كان كە بەشێكیان كراون بە خاوەن مووچەی مانگانە، چ بە ناوی مووچە یاخود هاوكاری - ەوە بێت، بەبێ ئاگاداری خۆبەخشەكانی تر و شاردنەوەی لەوانی تر و حاشاكردن لەو ڕاستیە.
٦- دروستكرنی جاسوس و جنێودەر و بێڕێزیكار لەنێوان خۆبەخشەكان، بەمەبەستی تاقیكردنەوەیان و گەیاندن زانیاریەكان كە لەنێوان هاوڕێكاندا ئاڵوگۆڕی پێدەكرێت، زۆر كات قوربانیەكە دەردەكرێت یاخود ناچار بە وازهێنان دەكرێت.
۷- دەركردنی بەشێكی زۆر لە خۆبەخشە بوێر و بەهەڵوێست و دڵسۆزەكان لە جوڵانەوەكە، لەبەرامبەر هەڵوێست وەگرتن و ڕەخنە لێگرتن، كەبەداخەوە ئەگەر بێتوو لەم جوڵانەوەیەدا ڕستەیەك یاخود وشەیەك پێچەوانەی بیركردنەوەكانی سەرۆكی جوڵانەوەكە بڵێیت، دەردەكرێیت یاخود ناچار بە وازهێنان دەكرێیت و خۆت لەبەرامبەر لێشاوی ڕەخنە و تۆمەت هەڵبەستن دەبینیتەوە.
۸- هەڵبەستنی تۆمەت و پێدانی چەندین نازناوی ناڕەوا و ناشایستە بەو خۆبەخشانەی بەناڕەوا دەركراون، یاخود ناچار بە وازهێنان كراون یانیش بەهۆی هەڵوێستەكانیان خۆیان دەستیان لەكار كێشاوەتەوە، لە سەرەوە ئاماژەمان بە بەشێك لەو نازناو و تۆمەتانە كردووە كە دراونەتەپاڵ ئەوكەسانە، و كە دڵنیاین پاش بڵاوبوونەوەی ئەم نوسراوە دەدرێتە پاڵ ئێمەیش.
كەواتە لەم جوڵانەوەیەدا بیركردنەوەی جیاواز نابێ بونی هەبێت، و ماندووبوونی ئێمە و هاوڕێكانیشمان چووەتە باخڵی چەند دەمووچاوێك و چەند كەسێك لەوپەڕی مورتاحی و ئیسراحەتدا بەری ڕەنجی ماندووبوونی ئێمە و هاوڕێكانمانیان چنیەوە، [كەواتە ئەنجامی ماندووبوونی ئێمەیش یەكسان بوو بە "سفر هیچ بەدەستەوە"].
٭ ناو و ئەركی خۆبەخشە دەست لەكار كێشاوەكان:
۱- ڕابەر مەحمود/ ڕێكخەری ناحیەی هەڵشۆ، ئەدمین لە پەیجەكانی (قەڵادزێ و ڕەواندوز)
۲- گەرمیان عوسمان/ ڕێكخەری شارەزوور
۳- دێرین ڕەسوڵ/ ڕێكخەری بنگرد، ئەدمینی (دەڤەری مەرگە)
٤- چاوان ئاوات/ ئەدمین لە پەیجەكانی (سكتان، ئاشتی، شەقڵاوە، مێرگەسور ، كفری، شارەزور، دەشتی هەولێر)
٥- ئەوین ئەحمد/ ڕێكخەری ڕانیە
٦- چێنەر شەریف/ ئەدمین لە پەیجەكانی (هەورامان و هەڵەبجە)
۷- عەبداللە حسێن/ ئەدمین لە پەیجەكانی (قەڵادزێ و ژاراوە و سەنگەسەر و دوو گرووپی نەوەی نوێ لە ڕانیە و سەنگەسەر)
۸- ڕێبوار عومەر/ ئەندام ئەنجومەنی شارەزوور
۹- هەڵمەت حەمەڕەوف/ ئەندام ئەنجومەنی شارەزوور
۱۰- بەڵێن عومەر/ ئەندام ئەنجومەنی شارەزوور
۱۱- بەرهەم فاڤل/ ئەندام ئەنجومەنی شارەزوور
۱۲- كۆرش ئەشرەف/ ئەندام ئەنجومەنی شارەزوور
۱۳- حامید ئەحمەد/ ئەندام ئەنجومەنی شارەزوور
۱٤- هێرش ئەشرەف/ ئەندام ئەنجومەنی شارەزوور
۱٥- هەڵمەت حەمەڕەوف/ ئەندام ئەنجومەنی شارەزوور
۲۰۱۹/۷/۱۳


زۆرترین بینراو
© 2018 Awene Online, Inc. All Rights Reserved.
×