2019-07-14   821     
نوێنەری باڵای یەکێتیی ئەوروپا لە سیاسەتی دەرەکی و کاروباری ئاسایش دەربارەی پیشنیازی عێراق بۆ کەمکردنەوەی گرژیی نێوان ئەمریکا و ئێران رایگەیاند، ''پاڵپشتی لەو پێشنیازە دەکەین کە عێراق بۆ بەستنی کۆنگرەیەکی ھەرێمیی سەبارەت بە کەمکردنەوەی گرژییەکانی نێوان ئەمریکا و ئێران لە ناوچەکەدا پێشکەشیکردووە''.
لە چوارچێوەی سەردانەکەی بۆ بەغدا فێدێریکا مۆگەرینی، نوێنەری باڵای یەکێتی ئەورووپا لە سیاسەتی دەرەکی و کاروباری ئاسایش لەگەڵ محەمەد حەکیم، وەزیری دەرەوەی عێراق کۆبوویەوە و لە کۆبوونەوەکەدا نوێنەری باڵای یەکێتیی ئەوروپا لە سیاسەتی دەرەکی و کاروباری ئاسایش وتی، ''ناوچەکە بە رەوشێکی سەخت و دژواردا تێپەڕدەبێت، بەڵام ئەوەی ئێستا گرنگە ئەوەیە، رێگە نەدەین گرژییەکانی نێوان ئەمریکا و ئێران لە ناوچەکەدا، لەوە زیاتر درێژەبکشێت''.
هاوکات فێدێریکا مۆگێرینی وەک ھۆشدارییەک ئەوەی وەبیرھێنایەوە کە ئەگەر گرژییەکان کەمنەکرێنەوە و ئاراستەکەی بەرەو شەڕ و روبەڕوبونەوە بێت، ئەوا پێش ھەموو شتێک زیانی بۆ عێراق دەبێت، بێ ئەوەی روونکردنەوەی زیاتر لەوبارەیەوە بدات.
نوێنەری باڵای یەکێتیی ئەوروپا لە سیاسەتی دەرەکی و کاروباری ئاسایش جەختیکردەوە کە لەئێستادا وا پێویست دەکات رێگەیەکی گونجاو بۆ کەمکردنەوەی گرژییەکانی نێوان ئەمریکا و ئێران لە ناوچەکەدا بدۆزرێتەوە و وتی، ''یەکێتی ئەورووپا پاڵپشتی لەو پێشنیازە دەکات کە عێراق بۆ بەستنی کۆنگرەیەکی ھەرێمیی سەبارەت بەکەمکردنەوەی گرژییەکانی نێوان ئەمریکا و ئێران لە ناوچەکەدا پێشکەشیکردووە''.
وەزیری دەرەوەی عێراق وتی، ''ناوچەکە بەرگەی جەنگێکی نوێ ناگرێت، چونکە ھێشتا شەڕی دژبە تیرۆر لە ناوچەکە کۆتایی نەھاتووە و درێژەی ھەیە''.
محەمەد حەکیم جەختیکردەوە کە گرنگە عێراق نەبێت بە گۆڕەپانێک بۆ گرژی و ناکۆکییەکانی نێوان ئەمریکا و ئێران و لەوبارەیەوە وتی، ''گرنگە عێراق لەگەڵ وڵاتانی دیکەی عەرەبی بەتایبەتیش کوێت و عومان رۆڵی باشتر بگێرن بۆ چارەسەرکردنی گرژیییەکان لە ناوچەکەدا''.
دوێنێ شەممە نوێنەری باڵای یەکێتیی ئەوروپا لە سیاسەتی دەرەکی و کاروباری ئاسایش، فێدێریکا مۆگێرینی بە سەردانێک گەیشتە بەغدا کە لە میانیدا زنجیرەیەک دیدار و کۆبوونەوەی لەگەڵ گەورە بەرپرسانی عێراق ئەنجامدا.