2019-07-15   1281     
ئەنجومەنی وەزیران بە سەرۆکایەتی مەسرور بارزانی یەکەمین کۆبوونەوەی فەرمی سازکرد و تیایدا چهند بریارێك لەبارەی دەوامی وەزیرەکان و نەهێشتنی رووتین و دیاردەی بەرتیل دان و بەرتیل وەرگرتن دهركرا.
ئاوێنه: ئەمڕۆ دووشەممە 15-7-2019، یەکەمین کۆبوونەوەی فەرمی ئەنجومەنی وەزیران بە سەرۆکایەتی مەسرور بارزانی بهرێوهچوو كه تیایدا، چەند بڕیارێک لەبارەی دەوامی وەزیرەکان و خاوهن وهزیفه باڵاكان و فەرمانبەرانی هەرێمی کوردستان و نەهێشتنی رووتین و دیاردەی بەرتیلدان و بەرتیل وەرگرتن لەناو دامودەزگاکانی حکومەت خسته روو، دواتر بە کۆی دهنگ پهسهندكران .
ئەنجومەنی وەزیران وەزیرەکانی راسپارد لەژێر رۆشنایی هێڵە گشتیەکانی کارنامەی کابینەی نۆیەم، بەرنامەی کارەکانی وەزارەت لەماوەی 30 رۆژ دابڕێژن و پێشکەشی ئەنجوومەنی وەزیرانی بکەن بۆ ئەوەی پەسەند بکرێت و بخرێتە بواری جێبەجێ کردنەوە.
هەر لەو کۆبوونەوەیەدا، سەرۆکی ئەنجوومەنی وەزیران رایگەیاند: سبەینێ شاندێکی باڵای حکومەتی هەرێم بۆ دەربڕینی نیاز پاکی سەردانی بەغدا دەکات بۆ گفتوگۆکردن لەبارەی دۆزینەوەی رێگاچارەی گونجاو بۆ کێشە هەڵپەسێردراوەکانی نێوان هەولێر و بەغد ا له چوارچێوهى دهستوور.
دەقی بڕیارەکانى یەکەمین کۆبوونەوەی ئەنجوومەنی وەزیران:
یەکەم: سەرجەم وەزیرەکان و خاوةن پۆستە باڵاکان دەبێت پابەندبن بە دەوامی فەرمی وەزارەتەکانیان لە دەستپێکی دەوامی رۆژانی یەکشەممەوە تا کۆتایی دەوامی فەرمی لە رۆژانی پێنجشەممە.
دووەم: سەرجەم فەرمانبەرانی حکومەتی هەرێم دەبێت پابەندبن بەکاتی دیاریکراوی دەوامی فەرمی و هیچ کەسێک بۆی نیيە لەکاتی دەوامی فەرمیدا شوێنی کارکردنی خۆی بەجێ بهێڵیَت یان کارێکی دیکەی دەرەوەی ئەرکەکەی جێبەجێ بکات.
سێیەم: فەرمانبەران دەبێت پابەند بن بە پاراستنی نهێنی کاروباری فەرمانبەرییەتی و نابێت ئەو زانیارییانەی کە بە نهێنی پۆلێن دەکرێن، لە دەرەوەی رێکارە یاساییەکان ئاشکرا بکرێن.
چوارەم: هەموو وەزیرەکانی کابینەی نۆیەمی حکومەتی هەرێمی کوردستان دەبێت بەپێی یاسا و رێنماییەکانی دەستەی دەستپاکی کوردستان، سەرجەم ماڵ و موڵکی خۆیان ئاشکرا بکەن.
پێنجەم: دەبێت رووتین لە دامودەزگانی حکومەتدا نەمێنێت و سەرجەم مامەڵەی هاووڵاتیان بە شێوەیەکی خێرا و وورد، لەلایەن فەرمانبەرانەوە جێبەجێ بکرێت.
هەروەها وەڵامدانەوەی سکاڵاو و پرسیاری هاووڵاتیان بە شێوەیەکی خێرا و گونجاو، ئەرکی داموودەزگاکانی حکومەتە و دەبێت وەڵامی روون و ئاشکرا بۆ مامەڵەی هاووڵاتیان هەبێت و هۆکاری هەردواکەوتنێک یا رەزامەندی نەدانێک روون و ئاشکرا بێت و پێویستە رێز لە هاووڵاتیان بگیرێت لە داموودەزگاکانی حکومەتدا.
شەشەم: دیاردەی بەرتیلدان و بەرتیل وەرگرتن، لەناو دامودەزگاکانی حکومەتدا هەستی پێدەکرێت، بۆیە بنبڕکردنی ئەم دیاردەیە دەبێتە یەکێک لەکارە لەپێشینەکانی وەزیر و بەرپرسە باڵاکانی حکومەتی هەرێم و ئەم بابەتە بە هیچ شیوەیەک چاوپۆشی لێ ناکرێت و سەرپێچیکاران بە تووندی سزا دەدرێن.