سەرۆکی فەرمانگەی ھەماھەنگی و بەدواداچونی ئەنجومەنی وەزیرانی هەرێمی کوردستان دەڵێ، بڕیارە سبەی ئەنجومەنی وەزیران کۆبونەوەیەک ئەنجام بدات و تێیدا پشکی ھەرێمی کوردستان لە پڕۆژەیاسای بودجەی گشتیی عێراقدا تاوتو بکات.
ئاوێنه: نوری عوسمان، سەرۆکی فەرمانگەی ھەماھەنگی و بەدواداچونی ئەنجومەنی وەزیران بە ماڵپەڕی رهسمی پارتی راگەیاند"بڕیارە سبەی دوشەممە، ئەنجومەنی وەزیران کۆبونەوەیەک ئەنجام بدات و کارنامەی کۆبونەوەکەش یەک خاڵ لە خۆی دەگرێت."
وتیشی"ناوەڕۆکی کارنامەی کۆبونەوەکەش گفتوگۆکردنە دەربارەی پشکی ھەرێمی کوردستان لە پڕۆژەیاسای بودجەی گشتیی عێراقدا."
پڕۆژەیاسای بودجەی گشتیی عێراق ئێستا لە پەرلەمانە و گفتوگۆی لەبارەوە دەکرێت و نوێنەرانی کوردیش لە ھەوڵدان داواکاریی ھەرێمی کوردستان لە بودجەدا جێگیر بکرێ.