یاسین مەحمود، وتەبێژی یەكێتیی وەبەرهێنەرانی كوردستان رایگەیاند؛ بە گرنگییەوە لە سەردانەکەی سبەی(سێشهممه)ی محهمهد جهواد زهریف، وەزیری دەرەوەی ئێران بۆ شاری سلێمانی دەڕوانن و زیاتر لە 13 خاڵیان ئامادەكردوە لەبارەی كێشە بازرگانی و ئابورییەكانی نێوان هەردولا و رادەستی وهزیره ئێرانییهكهی دەكەن.
ئاوێنه: بڕیارە دوای نیوەڕۆی سبەی سێشەممە وەزیری دەرەوەی ئێران، محەمەد جەواد زەریف لە چوارچێوەی سەردانەكەیدا بۆ عێراق و هەرێمی كوردستان سەردانی شاری سلێمانی بكات، بۆ ئەو مەبەستەش بەرپرسانی ئیداری و بازرگانی شاری سلێمانی ئامادەكارییان بۆ پێشوازی زەریف كردوە و بەشداری لە میتینگی ئابوری ئێران و هەرێمی كوردستان دەكات.
وتەبێژی یەكێتیی وەبەرهێنەرانی كوردستان، یاسین مەحمود لە لێدوانێكیدا بۆ ئاژانسی ئانادۆڵی توركی لهوبارهیهوه وتویهتی"وەزیری دەرەوەی ئێران بە یاوەری شاندێك كە لە 69 بەرپرسی گەورەی بازرگانی و ئابوری ئێران و بەرپرسانی تری پەیوەندیدار و بازرگانان و سەرمایەدارانی ئەو وڵاتە پێکهاتوە سبەی دەگاتە سلێمانی كە بە گرنگییەوە لەو سەردانە دەڕوانین، دوای گەیشتنی بە فڕۆكەخانەی سلێمانی سەرەتا سەردانی گردی دەباشان دەكات بۆ دانانی تاجەگوڵینەی لەسەر مەزاری سەركۆماری پێشوی عێراق، جەلال تاڵەبانی، دواتر لە شاری جوان بەشداریی كۆنفرانسی بازرگانی نێوان ئێران و هەرێمی كوردستان دەكات، هەروەها بەشداریی چەند كۆبونەوەیەكی تری نێوان بەرپرسانی هەردولا دەكات".
وتوشیهتی"ئێمە لە میانی ئەم چەند رۆژەدا چەندین كۆبونەوەی تایبەتمان لەسەر سەردانەكە كردوە كە ئامانج لێی دو بابەتی سەرەكییە، یەكەم پەیوەندی بە بابەتی ئابوری هەیە و كۆنفرانسێكی ئابوری لە نێوان كۆمپانیا بازرگانییەكانی نێوان هەردولا بەڕێوەدەچێت بۆ چارەسەركردنی ئەو كێشە و گرفتانەی هەیە لە نێوان هەردولا لە هەمانكاتدا سەردانێكی سیاسی دەبێت بۆ ناوچەكە و لێكنزیككردنەوەی لایەنە سیاسییەكان و بەرەوپێشبردنی پەیوەندییەكانی نێوانیان".
یاسین مەحمود ئەوەشی وتوه"كۆماری ئیسلامی ئێران لەئێستادا دەستیان بە جوڵەیەكی گەورە كردوە لە سەردانی وڵاتانی دەرەوە و دراوسێ بەتایبەتی، تاران دەیەوێت بەهەرشێوەیەك هەبێت دەرچەیەك بدۆزێتەوە بۆ دەربازبون لەو گەمارۆیانەی ئەمریكا لەسەر وڵاتەكە سەپاندویەتی و ئامانجی شكستپێهێنانی ئابوری ئەو وڵاتەیە".
وتەبێژی یەكێتیی وەبەرهێنەرانی كوردستان باسی لەوەش كردوه کە لە میانی ئەم چەند ساڵەی دوایدا و بە هۆی گەمارۆكانی هەردو حكومەتی عێراق و ئێران و دروستكردنی كێشە بۆ پەیوەندییە بازرگانییەكانی هەرێم، ئاستی ئاڵوگۆڕی بازرگانی لەگەڵ ئێران بۆ نزیكەی شەش ملیار دۆلاری ساڵانە دابەزیوە.
ئهوهشی خستۆتهڕو"وەك كەرتی بازرگانی 13 خاڵمان ئامادەكردوە بۆ ئەوەی لە كۆبونەوەی سبەی ئاراستەی وەزیری دەرەوەی ئێران و شاندی یاوەری بكەین بە ئامانجی كاركردن بۆ چارەسەركردنیان، لەوانەش چارەسەركردنی كێشەی خاڵە سنورییەكان و بەڕەسمیكردنی ئەو خاڵە سنورییانەی تا ئێستا لە لایەن ئێرانەوە بە فەرمی نەناسێندراون، لەگەڵ ئاسانكاری بۆ هاتنی گەشتیارانی ئێران كە ساڵانە 100 ملیۆن دۆلار داهاتیان بۆ ئێمە هەیە و لەئێستادا بە هۆی رێگرییەكانی ئێرانەوە ئەو رێژەیە زۆر دابەزیوە".
ئاماژهی بهوهشداوه كه "ئێران بەپێچەوانەی ئەمریكاوە بە شێوەیەكی گەرمتر مامەڵە لەگەڵ سلێمانی دەكات، ئومێد دەكەین لە میتینگی سبەی بگەینە ئەنجامێك بۆ بەرژەوەندییە تایبەتەكانی سنوری پارێزگای سلێمانی و چارەسەركردنی ئەو كێشانەی هەمانە لەگەڵ ئێران بەتایبەت لە روی ئاڵوگۆڕی دراو و كێشەی خاڵە سنورییەكان و چۆنێتی مامەڵەكردن لەگەڵ گەمارۆكانی ئەمریكا و گواستنەوەی ئەو كارخانانەی ئێران كە بەرەو پەككەوتن دەڕۆن بۆ هەرێمی كوردستان كە ژمارەیان 128 كۆمپانیایە".