دۆناڵد ترەمپ، سەرۆكی ئەمریكا جەختی كردەوە كە وڵاتەكەی ناچارە فرۆشتنی فڕۆكەی ئێف35 بە توركیا رەتبكاتەوە بەهۆی ئەوەی سیستمی بەرگریی ئێس400ی كڕیوە، لەگەڵ ئەوەشدا ئەو دۆخەی بە "نادادپەروەر" زانی.

ئاوێنە: دۆناڵد ترەمپ، سەرۆكی ئەمریكا لەمیانی كۆبونەوەی حكومەتی ئەمریكادا لەبارەی كڕینی ئێس400ی روسی لەلایەن توركیاوە رایگەیاند"راشكاوانە بڵێم ئەو دۆخە، زۆر ئاڵۆزە، توركەكان پێویستیان بە سیستمی بەرگریی پاتریۆت بو بۆ بەرگریكردن، بەڵام ئیدارەی ئۆباما، رەتیكردەوە پێیان بفرۆشێت."

هێمای بۆ ئەوەش كرد كە توركیا لەو دۆخەدا ناچار بو سیستمی بەرگریی ئێس400ی روسی بكڕێت، ئەوەش ئەو شتەیە واشنتۆن رەتیدەكاتەوە چونكە ئەنكەرە ئەندامی ناتۆیە.

هێمای بۆ ئەوەش كرد كە توركیا داوای زیاتر لە 100 فڕۆكەی ئێف35ی كردوە بەڵام ئەمان ناتوانن ئەو جۆری فڕۆكەیەیان پێ بفرۆشن.

ترەمپ وتی"ئێستا ناچارین بە توركیا بڵێین بەهۆی ئەوەی ناچار بوە سیستمی بەرگرییەكی دیكە بكڕێت ئێمە فڕۆكەی ئێف35ی پێ نافرۆشین."

وتیشی"ئەوەش دۆخێكی سەختە بۆ توركیا، هەروەك بۆ ئێمەش سەختە. لەگەڵ ئەوەش هەوڵی تێپەڕاندنی ئەو دۆخە دەدەین. با بزانین چی رودەدات. بەڵام بەڕاستی ئەمە دادپەروەرانە نییە."