لیژنهی كاروباری ئابوری عێراق چهند بڕیارێكی بۆ یهكخستنی رسوماتی گومرگ لهسهرجهم دهروازه سنورییهكان به دهروازه سنورییهكانی ههرێمی كوردستانیشهوه دهركردو بڕیاریشیدا به لابردنی خاڵه گومرگییهكانی نێوان كهركوك و ههرێمی كوردستان.
ئاوێنه: بەپێی بهیاننامهیهكی وەزارەتی دارایی عیراق، ئەمڕۆ چوارشهممه، فوئاد حوسێن وەزیری دارایی عیراق سەرۆكایەتی كۆبونەوەی دوەمی لیژنەی كاروباری ئابوری كردوه، ئهوهش بەئامادەبونی وەزیرانی پلاندانان و بازرگانی و پیشەسازی و كشتوكاڵ وپارێزگاری بانكی ناوەندی و سەرۆكی دەستەی نیشتمانی وەبەرهێنان و دو راوێژكاری ئابوری سەرۆك وەزیران ونوێنەری وەزیری نەوت و عەلی سندی وەزیری پلاندان لە حكومەتی هەرێمی كوردستان و كادیری پێشكەوتوی وەزارەتی دارایی هەرێمی كوردستان و سەرۆكی دەستەی دهروازه گشتییەكان و سەرۆكی دەستەی گشتی گومرگ و ژمارەیەك لەڕاوێژكارو بەڕێوەبەری گشتیهكان.
بهپێی بهیاننامهكه لیژنهكه بڕیاری داوه به یهكخستنی رسوماته گومرگییهكان لهتهواوی دهروازه سنورییهكاندا به دهروازه سنورییهكانی ههرێمی كوردستانیشهوه و جهختیشی كردۆتهوه كه ئهم بڕیاره گرنگییهكی زۆری ههیه بۆ رێكخستن ئاسانكاری لههێنانی كاڵاو شتومهك و چالاككردنی بازرگانیدا.
هەر لەو كۆبونەوەیەدا، لیژنەكە بڕیاریداوە بەلادانی هەمو خاڵەكانی پشكنین و وردبینی لەهەریەك لە (فایدە، شێراوە لە باكوری كەركوك، لەیلان لە رۆژهەڵاتی كەركوك)، بۆ هاندان و پێشخستنی بازرگانی ناوخۆ و ئاسانكردنی هاتوچۆی كاڵا لەناوخۆی عێراق.
هەر لەو كۆبونەوەیەدا بڕیاردراوە رێوشوێنی بازرگانیكردن بە زێڕو كانزای بەهادار رێكبخرێتەوە و كار بەیاسای وەزارەتی گواستنەوەو گەیاندنی عیراق بكرێت لە هەمو دهروازه سنورییەكان بۆ ئاسانكردنی لیژنە هاوپەیوەندییەكان، بڕیاریشدراوە هەمو دهروازه سنورییەكان بڕیاری پاراستنی بەرهەمی نیشتیمانی جێبەجێ بكەن و پابەند بن بەساڵنامەی كشتوكاڵی بۆ هاندانی بەرهەمی خۆماڵی.
لهكۆتاییشدا ئهوهی وهبیرهێناوهتهوه كه ئهو بڕیارانه دوای زنجیرهیهك كۆبونهوهو دیداری نێوان پسپۆڕانی ههردو حكومهتی فیدراڵی و حكومهتی ههرێمی كوردستان، دراون.