بریندارێكی رووداوەكەی هەولێر گیانی لەدەستدا
  2019-07-17       1184       


بەشدار رەمەزان، برینداری هێرشی ئەمڕۆی هەولێر بەهۆی سەختی برینەکەیەوە گیانی لەدەستدا، ژماره‌ی كوژراوەكان گەیشتە سێ كەس.

ئاوێنه‌: دوای نیوەڕۆ ئەمڕۆ 17ی تەموزی 2019، لەنێو ریستۆرانتێكدا لەهەولێری پایتەختی هەرێمی كوردستان كە نزیكە لە كونسوڵخانەی توركیا لەهەرێم، دەستڕێژی گوللە كراو كارمەندێكی كونسوڵخانەی توركیاو هاووڵاتییەكی هەرێمی كوردستان بەناوی ''نەریمان عوسمان'' كوژان و كەسێكی دیكەش بریندار بوو.

دوای تێپەڕبوونی چەند سەعاتێكیش بەسەر رووداوەكەدا، ئەمشەو بریندارێكی رووداوەكە كەناوی ''بەشدار رەمەزان''ەو خەڵكی هەرێمی كوردستانە بەهۆی سەختی برینەكەیەوە لەنەخۆشخانە گیانی لەدەستدا. 


دوای رووداوەكەش، هێزە ئەمنییەكان ناوچەكەیان گەمارۆداو لەڕێی كامێراكانی چاودێرییەوە دەیانەوێت ئەنجامدەرانی بدۆزنەوە.

بەشدار رەمەزان لەدایکبووی ساڵی 1993 یە و خەڵکی دیانایە لە پارێزگای هەولێر، سکرتێری پزیشک بووە ، هاوسەرگیریی نەکردووە و هەر لە دیاناش نیشتەجێ بووە، بە سەردانێک هاتووەتە هەولێر و ئەمڕۆ لەو رێستۆرانتە نانی خواردووە کە بەر تەقە کەوتووە و بەسەختی برینداربووە، دواتر لەژێر نەشتەرگەریی و لە نەخۆشخانە بەهۆی سەختی برینەکەیەوە گیانی لەدەستدا.

زۆرترین بینراو
© 2018 Awene Online, Inc. All Rights Reserved.
×