ئەمریكا، به‌فه‌رمی توركیای لە پرۆگرامی فڕۆكەی جەنگیی ئێف 35 دەركرد
  2019-07-18       870       

کۆشکی سپی لەڕاگەیندراوێکدا ئاشکرای کرد  ''ئەمریکا لەسەر کڕینی سیستەمی موشەکی ئێس-٤٠٠ تورکیا لەبەرنامەی بەرهەمهێنانی فڕۆکەی ئێف-٣٥ خستوەتە دەرەوەو چیتر مەحاڵە بەشداریی لەو بەرنامەیە بکات"، تورکیاش بەتوندیی وەڵامی ئەمریکای دایەوە'.

 ئاوێنه‌: کۆشکی سپی، لەڕاگەیندراوەکەیدا ئاماژە بەوە دەکات کە تورکیا بەکڕینی سیستمی ئێس-٤٠٠، بەڵێنەکانی لەهاوپەیمانێتی ناتۆ  پێشل کردوە.

هاوپەیمانێتی ناتۆ-ش پێشتر لەسەر کڕینی ئەو سیستەمە نیگەرانی خۆی دەربڕیبو، هەروەها چەندینجار هۆشداریی دابوە تورکیاو ڕایگەیاندبو کە سیستەمە روسیەکان لەگەڵ سیستەمی بەرگریی ئاسمانی ڕۆژئاوا نەگونجاوە.

کۆشکی سپی لەسەر ئەم سەرپێچییە دەوڵەتی تورکیای لەکڕینی فڕۆکەکانی ئێف-٣٥ بێبەش کردوەو فەمانی داوە فڕۆکەوانان‌و تەکنیککارانی تورک کە لەئەمریکا خەریکی راهێنانن لەسەر ئەو جۆرە فڕۆکەیە تا کۆتایی ئەم مانگە خاکی ئەمریکا جێبهێڵن.

لەکاردانەوەیەکدا بەرامبەر ئەو بڕیارەی کۆشکی سپی، وەزارەتی دەرەوەی تورکیا ڕایگەیاند "داوا لەئەمریکا دەکەین لەو هەڵەیەی پاشگەزبێتەوە کە زیانێکی بێ قەرەبو لەپەیوەندییە ستراتیژییەکانی ئەمریکاو تورکیا دەدات و دەبێتە هۆی برینێک کە بەهیچ شێوەیەک ساڕیژ ناکرێت".

زۆرترین بینراو
© 2018 Awene Online, Inc. All Rights Reserved.
×