جێگری سەرۆکی لیژنەی پێشمەرگە و ناوخۆ و ئاسایش و ئەنجوومەنە خۆجێیەکان لە پەرلەمانی کوردستانی عێراق رایگەیاند،''ئەوەمان بۆ سەرجەم کۆنسولخانەکان دووپاتکردووەتەوە کە هەولێر ئارامە و هیچ ترس و دڵەڕاوکێیەک دروست نەبێت و بە دڵنیایییەوە هیچ کەس لەدەست یاسا دەربازی نابێت''
ئاوێنه: عوسمان کەریم، جێگری سەرۆکی لیژنەی پێشمەرگە و ناوخۆ و ئاسایش و ئەنجوومەنە خۆجێیەکان لە پەرلەمانی کوردستان لەمیانی لێدوانێکی رۆژنامەوانیدا ئاماژەی بەوەکرد ''لیژنەکەیان ئەرکی سەرشانی خۆیەتی چاودێری وردی دۆسیەکە بکات و ئاشکراشیکرد کە لەگەڵ هێزە ئەمنییەکاندا لە پەیوەندی و گفتوگۆدان''.
عوسمان کەریم ده‌ڵێت، ''دوای رووداوەکەی دوێنێ، ئێمە وەک لیژنەی پێشمەرگە و ناوخۆ و ئاسایش و ئەنجوومەنە خۆجێییەکان لە یەکەم چرکەدا رامانگەیاند کە لیژنەکەمان ئامادەیە و پەیوەندیمان لەگەڵ لایەنی پەیوەندیدار کردووە و بەردەوامیشین لە پەیوەندی و ئیدانەی ئەو کارە قێزەوەنەشمان کردووە''.
لەلایەکی دیکەوە جێگری سەرۆکی لیژنەی پێشمەرگە و ناوخۆ و ئاسایش و ئەنجوومەنە خۆجێیەکان وتیشی، ''تورکیا دراوسێمانە و بەرژەوەندی هاوبەشمان بەیەکەوە هەیە و رووداوەکە ناخۆش بوو، وەک پەرلەمان ئیدانەی ئەو کارەمان کردووە و پێمان وایە هێزە ئەمنییەکان زۆر لەوە بەهێزترن کە تاوانباران بتوانن لەدەست یاسا رابکەن و لە ماوەیەکی نزیکدا تاوانباران رووبەڕووی دادگا دەکرێنەوە''.
عوسمان کەریم جەختی لەوەیشکردەوە کە لیژنەکەیان ئەرکی سەرشانی خۆیەتی چاودێری وردی دۆسیەکە بکات و رایگەیاند کە لەگەڵ هێزە ئەمنییەکاندا لە پەیوەندی و گفتوگۆدان.