وتەبێژی حكومەتی هەرێمی كوردستان رایگەیاند، روداوی تەقەكردنەكەی دوێنێی نێو
ریستۆرانێكی شاری هەولێر كە تێیدا دیپلۆماتكارێكی تورك و دو هاوڵاتی هەرێم كوژران،
كردەوەیەكی تیرۆریستی ئامانجدار و پلان بۆ داڕێژراو بوە.
ئاوێنە: جوتیار عادل، وتەبێژی حكومەتی هەرێمی كوردستان ئەمڕۆ پێنجشەممە
لەڕاگەیەندراوێكدا بڵاویكردەوە كە "روداوی تەقەکردنەکەی هەولێر، کردەوەیەکی تیرۆریستی
ئامانجدار وپلان بۆ داڕێژراو بو."
هێمای بۆ ئەوەش كردوە كە "لێکۆڵینەوەکان بەردەوامن و پێشڤەچونیش هەیە
و بەم نزیکانەش هاوڵاتییان لە قۆناغەکانی لێکۆڵینەوە ئاگادار دەکەینەوە ."
دەقی راگەیەندراوەكە...
راگەیەندراوێك لە حکومەتی هەرێمی کوردستانەوە
وتەبێژی حکومەتی هەرێمی کوردستان : رووداوی تەقەکردنەکەی هەولێر ، کردەوەیەکی
تیرۆریستی ئامانجدار وپلان بۆ داڕێژراو بوو
بەپێی لێکۆڵینەوە سەرەتاییەکان، رووداوی تەقەکردنەکەی هەولێر لە رۆژی 17 ی
تەمووزی 2019 کە بووە هۆی گیان لە دەستدانی 3 کەس ، کردەوەیەکی تیرۆریستی
ئامانجدار وپلان بۆداڕێژراو بووە . لێکۆڵینەوەکان بەردەوامن وپێشڤەچوونیش هەیە و بەم
نزیکانەش هاووڵاتییان لە قۆناغەکانی لێکۆڵینەوە ئاگادار دەکەینەوە .
جوتيار عادل
وتەبێژی حکومەتی هەرێمی کوردستان