2019-07-20   741     
مەلا بەختیار لێپرسراوی دەستەی كارگێری مەكتەبی سیاسیی یەكێتی له میانهی ڕاگهیاندنی پرۆژهكهیدا وتی ''كاندیدی خزم خزمێنەو، كاندیدی تەكەتولەكان، لە سنوری مەڵبەندەكانداو، لەناو هێزەكانی پێشمەرگەو چەكداری دەڤەری سەوزدا، رێژەی دەنگەكانیان بەڵگەی دابەزینی متمانەی ئەو دەنگدەرانەیە بە لیستی یەكێتیو كاندیدی تەكەتولو خزمو بنەماڵە''.
ئاوێنه: ئێوارەی ئەمڕۆ شەممه لەمیانی پێشكەشكردنی پڕۆژەیەكی بۆ چارەسەری كێشەكانی ناو یەكێتی مەلا بەختیار رایگهیاند ''با هەموو بەرپرسێك، دیقەت لە رێژەی دەنگەكانی كاندیدە خزمەكانیانو، كاندیدە تەكەتولەكانیانو، كاندیدە موچە تایبەتیەكانیان بدەن، بزانن رێژەی دەنگەكانیان چەند لەهەڵبژاردنەكاندا، مایەی نەمانی متمانەی دەنگدەرانی یەكێتییە، بەو كاندیدانە''
هەروا، رێژەی دەنگی ئەندامانی مەكتەبی سیاسیو سەركردایەتی، لەهەڵبژاردنەكانی عێراقو كوردستاندا، زۆر كەمترە لە رێژەی دەنگی ئەو كاندیدانەی سەركردایەتی نەبون.
ئایە:
- هیچ كەسێكتان لەخۆتان پرسیووە، لەهەڵبژاردنی پەرلەمانی كوردستان، لەناو سەنتەری سلێمانیدا، تاقە كاندیدێكی شارەكە، بۆچی متمانەی وەرنەگرتووە؟ هەڤاڵ زیادو سەلمە دەرچون، خەڵكی سەیدسادقو چەمچەماڵن.
- هیچ كەسێكتان لەخۆتان پرسیووە، لەناو تەواوی هێزەكانی پێشمەرگەو ئاساییشو پۆلیسدا، بۆچی سەپاندنی كاندیدی كورەكانو تەكەتولو خزمەكانتان، بەهەوڵی بێوچانو پارە هەڵڕشتنو فشاری دەرونی، یەكێتی شەرمەزار دەكەن؟
- لەخانەقین كە قەزایەكە دەتوانرێ شێركۆ میروەیس دەربچێندرێ بۆ پەرلەمانو پیلانی لایەنەكانیش نەبوایە (تایبەت دەنگەكانی هاودیدەكان!!) سۆزان مەنسوریش دەردەچێنرا. بەڵام لەگەرمیاندا، سێ قەزاو (26) ناحیەو سەدان گوند هەن، نەتوانراوە تاقە كاندیدێكی پەرلەمانی عێراق دەرچێنرێ!
- بۆچی لەهەولێری پایتەختدا، دوو هەڵبژاردنە ناتوانرێ دو كاندید زیاتر سەربخرێ؟
ئەو رێژانە، ئاماژەی بێمتمانەیی جەماوەری یەكێتییە، بە دەسەڵاتدارو بەرپرسانی یەكێتی، سەرەنجامی رەفتارو كردارە زیانبەخشەكانیانە بە یەكێتیو رێبازی مام جەلال كە هەمیشە فەرمویەتی: (یەكێتییەكان دەبێ دەستو دەمو داوێن پاك بن).