2019-07-21   1236     
بڕیار وایە سبەی دووەمین کۆبوونەوەی ئەنجوومەنی وەزیران لە بینای ئەنجومەنی وەزیرانی حکومەتی هەرێمی کوردستان بەڕێوەبچێت.
ئاوێنه: سبەی دووشەممە ٢٢ی تەمموز ٢٠١٩، دووەمین کۆبوونەوەی ئەنجومەنی وەزیرانی حکومەتی هەرێمی کوردستان لە شاری هەولێر دەبەسترێت و بەپێی زانیارییەکان لە کۆبوونەوەکەدا گفتوگۆ لەبارەی رێوشوێن و میکانیزمی جێبەجێکردنی هێڵە گشتییەکان و کارنامەی حکومەتی هەرێمی کوردستان دەکرێت.
شایەنی باسە هەفتەی رابردوو دووشەممە ١٥ی تەمموزی ٢٠١٩ ئەنجوومەنی وەزیران یەکەم کۆبوونەوەی بەست و دوای کۆبوونەوەکە ٦ بڕیار بڵاوکرایەوە و لەلایەکی دیکەشەوە ئەنجوومەنی وەزیران، سەرجەم وەزیرەکانی راسپارد بەرنامەی کارەکانی وەزارەت لەماوەی ٣٠ رۆژدا دابرێژن و پێشکەشی ئەنجوومەن وەزیران بکەن.
هاوکات بڕیارەکانی ئەنجوومەنی وەزیران پێکهاتبوون لە:-
یەکەم: سەرجەم وەزیرەکان و خاوهن پۆستە باڵاکان دەبێت پابەند بن بە دەوامی فەرمی وەزارەتەکانیان لە دەستپێکی دەوامی رۆژانی یەکشەممەوە تا کۆتایی دەوامی فەرمی لە رۆژانی پێنجشەممە.
دووەم: سەرجەم فەرمانبەرانی حکومەتی هەرێم دەبێت پابەند بن بە کاتی دیاریکراوی دەوامی فەرمی و هیچ کەسێک بۆی نیە لە کاتی دەوامی فەرمیدا شوێنی کارکردنی خۆی بەجێ بهێڵیت یان کارێکی دیکەی دەرەوەی ئەرکەکەی جێبەجێ بکات.
سێیەم: فەرمانبەران دەبێت پابەند بن بە پاراستنی نهێنی کارووباری فەرمانبەرییەتی و نابێت ئەو زانیارییانەی کە بە نهێنی پۆلێن دەکرێن، لە دەرەوەی رێکارە یاساییەکان ئاشکرا بکرێن.
چوارەم: هەمو وەزیرەکانی کابینەی نۆیەمی حکومەتی هەرێمی کوردستان دەبێت بە پێی یاسا ورێنماییەکانی دەستەی دەستپاکیی کوردستان، سەرجەم ماڵ و موڵکی خۆیان ئاشکرا بکەن.
پێنجەم: دەبێت رووتین لەداموودەزگانی حکومەتدا نەمێنێت وسەرجەم مامەڵەی هاووڵاتیان بە شێوەیەکی خێرا و وورد، لەلایەن فەرمانبەرانەوە جێبەجێ بکرێت. هەروەها وەڵامدانەوەی سکاڵاو و پرسیاری هاووڵاتیان بە شێوەیەکی خێرا و گونجاو، ئەرکی داموودەزگاکانی حکومەتە و دەبێت وەڵامی روون و ئاشکرا بۆ مامەڵەی هاووڵاتیان هەبێت و هۆکاری هەردواکەوتنێک یا رەزامەندی نەدانێک روون و ئاشکرا بێت وپێویستە رێز لە هاوڵاتیان بگیرێت لە داموودەزگاکانی حکومەتدا.
شەشەم: دیاردەی بەرتیلدان و بەرتیل وەرگرتن، لەناو دامودەزگاکانی حکومەتدا هەستی پێدەکرێت، بۆیە بنبڕ کردنی ئەم دیاردەیە دەبێتە یەکێک لەکارە لەپێشینەکانی وەزیر و بەرپرسە باڵاکانی حکومەتی هەرێم و ئەم بابەتە بە هیچ شیوەیەک چاوپۆشی لێ ناکرێت و سەرپێچیکاران بە تووندی سزا دەدرێن.