بۆ لێكۆڵینەوە لەگەڵیان بە تۆمەتی هەوڵدان بۆ كودەتا، ئەنجومەنی سەربازی سودان، چەند ئەفسەرێكی باڵاو چەند سەركردەیەكی ئیسلامی كە رەمزی دیاری رژێمی پێشوی ئەو وڵاتە بون، دەستگیركرد.
ئاوێنە: بەپێی هەواڵێكی كەناڵی "ئەلحوڕە"، فەریقی یەكەم هاشم عەبدولموتەلیب سەرۆك ئەركانی سوپا، لیوا نەسرەدین عەبدولفەتاح فەرماندەی چەكی زرێپۆش، لیوا بەحر ئەحمەد بەحر فەرماندەی ناوچەی ناوەندیی و هەردو سەركردەی بزوتنەوەی ئیسلامی سودان، عەلی كەرتی و زوبێژ ئەحمەد حەسەن لەنێو دەستگیركراواندان.
بەپێی ماڵپەڕە هەواڵییەكانی سودان، تۆمەتبەرەكان "بەڵگەی قەناعەتپێهێنەر"یان پێ گیراوە لەپەیوست بە جوڵەكردنیان بۆ ئەنجامدانی كودەتا.
هەروەك دەسەڵاتداران دەستیان كردوە بە هەڵمەتێكی دەستگیركردنی ئەو كەسانەی كە تێوەگلانیان لە كودەتاكە دەسەلمێنرێت.