سلێمانی، کوا خۆشیەکانی جارانت؟
  2019-07-24       1009       


هێمن ئەحمەد

 


ئێوارەیەک
لەسەر لوتکەی ھەڕوتەوە
بەرەو زەردەی خۆرئاوابوون
جارێک بەرەو دوڵی میران
جارێک بەرەو دەباشان و
گۆیژەو ئەزمڕ دەمڕوانی .
شنەبای مەست
بەئاوازێکی نوێوە
دەوەنەکانی ڕادەژەند .
منیش پڕ بە قوڕگی 
تونێلەکەی پێشڕەو
ھاوارم کرد ؛ سلێمانی 
شاری شاران
کوا خۆشیەکانی جاران ؟
کوا میرەکەی دۆڵی میران
دارگۆیژەکانی گۆیژە و 
ڕەشبەڵەکە پڕ جۆشەکەی دەباشان ؟
کوا دارتوەکەی مەلیک و
دیوەخانی میری بابان ؟
سلێمانی ڕەنگت لێڵە و سەر بەتەمی ،
ھەروەکو پیر خۆت دەنوێنی .
زۆر زیز دیاری ،
وا چیتر برایم پاشا و
سەرشەقام و مەڵکەندی و 
سابونکەران و دەرگەزێن و 
جولەکانت نادوێنی .
سلێمانی ئاگات لێیە
کانی ئاسکان و سەرکاریز 
کارێزەکەی وەستا شەریف
ئیێستا لەبەرچاو ونبوون .
ئەوەندە بۆ حاڵی تۆ گریان
ھەتا کوێر بوون .
ئەی نازانی
گردی سەیوان بێسەیوانە و
گردە سەرکەشەکەی یارە 
زۆر بێنازە و بەبێ یارە .
سلێمانی ھەرکەس دەبێتە میوانت
دوای تێرخواردن سفرەت دەدڕێ
دەستە پیسو پۆخڵەکانی
بە دار و دیوارت دەسڕێ .
سلێمانی من دەزانم نیگەرانی .
ڕۆژی چەندجار دەتڕەنجێنن
کوچە و کۆڵانەکانیشت
بێدادگایی دەخنکێنن.
سلێمانی دڵم تەنگە وەک دڵی تۆ .
گوێم لە گریان و شیوەنتە
لە فرمێسکەکانت ساڕێژ بوون
چەمی سەرچنار و تانجەرۆ.

تێبینی: لە دێڕی (ھەرکەس دەبێتە میوانت...) مەبەستم لە میوانی بەڕێز و ئاسایی نیە. ئێوە ھەمیشە سەرچاوانن .مەبەستم لەو کەسانەیە کە تەنیا بۆ بەرژەوەندی ئەم شارە بەکاردێنن و ڕەفتاری نەشیاو دەکەن.


زۆرترین بینراو
سه‌رۆك وه‌زیرانى ئیسرائیل هه‌ڕه‌شه‌ له‌عێراق ده‌كات
جەهەپە: ئاکەپە ئامادەکاری دەکات سەرۆک شارەوانییەکانی ئیستەنبوڵ‌و ئەنقەرەش دوربخاتەوە
یەکێتی ئەوروپا: لابردنی سێ سەرۆک شارەوانییەکە سه‌لماندی دیموكراسی له‌توركیا بونی نییه‌
عومەر بەشیر لەنێو قەفەس دادگا: ٢٥ ملیۆن دۆلارم لە محەمەد بن سەلمان وەرگرتووە
فازڵ میرانی: ڕێگە نادەین لەهەرێمی کوردستانەوە هەڕەشە لەئاسایشی ئێران بکرێت
كشتوكاڵی سلێمانی سزای‌ 27 فه‌رمانبه‌ری‌ دا له‌سه‌ر ئه‌وه‌ی‌ پابه‌ندنه‌بوون به‌كاتی ده‌وامكردنه‌وه‌
سوپای سوریا لە ئاسمانەوە هێرشی کردە سەر کاروانێکی سەربازی سوپای تورکیا
وتەبێژی حكومەتی هەرێم: ئامادەین داهاتی 250 هەزار بەرمیل نەوتی رۆژانە رادەستی بەغدا بكەین
مه‌سرور بارزانی‌ داوا له‌وه‌زیره‌كانی‌ كابینه‌ی‌ نۆیه‌م ده‌كات فۆڕمی‌ ئاشكراكردنی‌ سامانه‌كه‌یان پڕبكه‌نه‌وه‌
پۆلیسی تورکیا هێرشی کردە سەر خۆپیشاندەرانی دیاربه‌كر
© 2018 Awene Online, Inc. All Rights Reserved.
×