ئاژانسی رۆیتەرز لەزاری دو سەرچاوەی حكومەتی ئەمریكاوە بڵاویكردۆتەوە كە ویلایەتە یەكگرتوەكانی ئەمریكا پێی وایە ئەگەری زۆرە رێكخراوی داعش بەرپرسیاری تەقینەوەكەی رۆژی چوارشەممەی شارۆچكەی منبج-ی باكوری سوریا بێت.
ئاوێنە: ئەوەش لەكاتێكدایە كە دوێنێ(پێنجشەممە) روانگەی سوری بۆ مافەكانی مرۆڤ ئاشكرایكرد لەسەر ئاستى باڵا لێکۆڵینەوە لە تەقینەوەکەى منبج دەکرێت، بەشێوەیەک تیمێکى نوسینگەى لێکۆڵینەوەى فیدراڵى ئەمەریکا (FBI) بۆ لێکۆڵینەوە لە تەقینەوەکە گەیشتوەتە ئەو شارۆچكەیەو دەستىان بە لێکۆڵینەوە کردوە لە روداوەکە.
دو سەرچاوەكەی حكومەتی ئەمریكا بە ئاژانسی رۆیتەرزیان راگەیاندوە كە وەزارەتی بەرگری ئەمریكا (پێنتاگۆن) و چەند دەزگایەكی دیكەی ئەمریكا لێكۆڵینەوە لەو پرسە دەكات كە كێ ئەو هێرشەی منبج-ی ئەنجام داوە.
یەكێك لەو سەرچاوانە باسی لەوە كردوە ئەو بەرپرسانەی لێكۆڵینەوە لە روداوەكە دەكەن راگەیەندراوەكەی داعش كە تێیدا بەرپرسیارێتی هێرشەكەی لەئەستۆ گرتوە، رەتناكەنەوە.