پەرلەمانتارێكی عێراق سەرسوڕمانی خۆی بەرامبەر بەو ژمارە زۆرەن كاربەدەستانی عێراق دەردەبڕێ كە ئەمساڵ چون بۆ حەج، ئەو دەڵێت "هەیانە بۆ جاری دەیەمە حەج دەكات".

ئاوێنە: پەرلەمانتاری عێراق، كازم ئەلحمامی لەبەیاننامەیەكدا رایگەیاند هەرچەندە ساڵانە تیر‌وپشك دەكرێ‌ بۆ ئەوەی هاوڵاتیان سەرەی حەج كردنیان بەركەوێ‌، بەڵام كۆمەڵێك كاربەدەست هەن هەمو ساڵێك كورسی بۆ خۆیان‌و خاووخێزانیان گیراوە لەوەرزی حەج كردندا، ئەو دەلێ ""پێویستە وەزیرو كاربەدەستانی باڵا راستگۆبن لەگەڵ خواداو ئەركە بنەڕەتییەكەیان لەناوخۆی عێراقدا جێبەجێ‌ بكەن".
كازم ئەلحمامی رەخنە لەو كاربەدەستانە دەگرێ‌‌و دەڵێ‌ "ئەوانە جانتاكانیان دەپێچنەوەو بۆ ئەوەی ژمارەیەكی پێوانەیی لەحەج كردن تۆمار بكەن، لەكاتێكدا هەزاران مامەڵەی هاوڵاتیان‌و دەیان پڕۆژە لەدوای خۆیان بەجێدەهێڵن‌و كەسیش نییە لێیان بپێچێتەوە".
دەشڵێت "سەرباری ئەوەی قەیران لەسەر یەك كەڵەكەو هاولاتیانی عیراق گیریان خواردوە بەدەست چەندان کێشەوە، كەچی كاروانی گەورە بەرپرسان بەرەو مەككەی پیرۆز بۆ حەجكردنی جاری پێنجەم یان دەیەم بەردەوامە".