عادل عەبدولمەهدی، سەرۆك وەزیرانی عێراق، حكومەتەكەی ئامادەكاری دەكات بۆ ئەنجامدانی پڕۆسەی سەرژمێریی گشتی لەساڵی داهاتوداو ئاماژەی بەوەشدا كە ژماردنی ئەلكترۆنی لە پڕۆسەكەدا بەكاردەهێنن.
ئاوێنە: عادل عەبدولمەهدی، ئەمڕۆ دوشەممە، لەمیانی وتەیەكدا لەرێوڕەسمێك كە بەبۆنەی رۆژی جیهانی دانیشتوانەوە لەلایەن وەزارەتی پلاندانانەوە رێكخرابو، رایگەیاند"ئامادەكاری دەكەین بۆ سەرژمێری دانیشتوانی و لەساڵی 2020دا پڕۆسەكە بەڕێوەدەچێت."
سەرۆك وەزیرانی عێراق داواشی لەسەرجەم دەستەكان و پەرلەمانی عێراق كرد كە هاوكاری بن بۆ سەرخستنی پڕۆژەی سەرژمێری گشتی.
وتیشی"لە پڕۆسەی سەرژمێری دانیشتواندا، ژماردنی ئەلیكترۆنی بەكاردەهێنرێت و كارێكی قورسیش بۆ ئەنجامدانی دەكرێت."
ئەوەشی خستەڕو كە ئامانجیان لە پڕۆسەكە گەیشتنە بە ژمارەیەكی راست و واقیعی دانیشتوان.