2019-07-31 1213
بەپرسانی باڵای تورکیا رایانگەیاند'' وەک ئامادەکارییەک بۆ سزاکانی ئەمریکا، تورکیا بەشە وەرگیراوەکانی فڕۆکەی جەنگی F-35 یان لەکۆگاکانی چەک و جبەخانەدا هەڵگرتوە''.
ئاوێنه: ئەمڕۆ چوارشەممە بەپرسانی باڵای تورکیا رایانگەیاند ''وەک ئامادەکارییەک بۆ سزاکانی ئەمریکا پاش کڕینی سیستمی بەرگری موشەکی S-400 ی روسی، تورکیا بەشە وەرگیراوەکانی فڕۆکەی جەنگی F-35 یان لەکۆگاکانی چەک و جبەخانەدا هەڵگرتوە''.
ئیان ویلیەمز، جێگری بەرێوەبەری بەرنامەی ئاسایشی نێودەوڵەتی لەسەنتەری لێکۆڵینەوەی ستراتیژی نێودەوڵەتی رایگەیاندوە تا ئێستا رون نییە کە ئەو وڵاتە پێش بڕیاری ئەمریکا بۆ دورخستنەوەی تورکیا لەپرۆگرامی فڕۆکەی جەنگی F-35 ئامادەکاری بۆ سزاکان کردوە یاخود پاش گواستنەوەی سیستمی بەرگری موشەکی روسی ئەو هەنگاوەی ناوە.
ولیەمز راشیگەیاندوە، ئەو هەنگاوەی تورکیا ئاماژەیەکە بۆ قبوڵکردنی سزاکانی ئەمریکا.
له‌چه‌ند هه‌فته‌ى رابردوودا، سەرەڕای ناڕەزایەتییەکانی ئەمریکا و وڵاتانی ئەندامی ناتۆ، پرۆسەی رادەستکردنی سیستمی بەرگری موشەکی S-400 لەلایەن روسیاوە دەستیپێکرد و گەیاندنی دواین بەشی سیستمی بەرگری قۆناغی یەکەم تەواوبوە.
لەبەرامبەر کڕین و گەیاندنی ئەم سیستمە، ئەمریکا هەڕەشەی دەرکردنی تورکیا لەپرۆگرامی فڕۆکەی جەنگی F-35 دەکات و تەواوی ئەو فڕۆکەوانانەش کە بۆ راهێنان نێردرابونە ئەمریکا نێردراونەتەوە.
ئەمریکا هەنگاوەکەی تورکیا بەپێشێلکردنی بنەماکانی رێکخراوی ناتۆ دەزانێت و تورکیاش رەتیدەکاتەوە ئەو هەنگاوە هیچ زیانێت بە ناتۆ بگەیەنێ.