بەپێی نوسراوێك كە لەلایەن میدیا عێراقییەكانەوە بڵاوكراوەتەوە، وەزارەتی دارایی عێراق رەزامەندی نیشانداوە لەسەر پێشخستنی وادەی دابەشكردنی موچەی ئەو وەزارەت و دامەزراوانەی بەپێی خشتەی دابەشكردنی موچە دەكەونە ناو پشوی جەژنی قوربانەوە.

ئاوێنە: رۆژی 11ی ئەم مانگە جەژنی قوربان دەستپێدەكات و چاوەڕوان دەكرێت یەك هەفتە لە عێراق پشوی رەسمی بێت و بەوەش بەگوێرەی خشتەی دابەشكردنی موچە، وادەی دابەشكردنی موچەی بەشێك لە دامەزراوەو وەزارەتەكانی حكومەتی عێراق دەكەوێتە ناو پشوەكەوە.

بەڵام بەپێی ئەو نوسراوە بێت كە ئەمڕۆ هەینی میدیا عێراقییەكان بڵاویان كردۆتەوە، وەزارەتی دارایی عێراق دابەشكردنی موچەی ئەو دامەزراوەو وەزارەتانەی خستۆتە بەر لە جەژنی قوربان.

بەگوێرەی نوسراوەكە، وادەی دابەشكردنی موچەی ئەم مانگەی ئەنجومەنی نوێنەران و دیوانی سەرۆكایەتی كۆمار و ئەنجومەنی وەزیران و نوسینگەكانی سەر بەو ئەنجومەنە، رۆژی 6/08/2019 دەبێت لەبری 15/8/2019 و هەروەها وادەی دابەشكردنی ئەو فەرمانگانەی پەیوەست نین بە وەزارەتێكەوە لەگەڵ وەزارەتی خوێندنی باڵا، رۆژی 7/8/2019 دەبێت لەبری 16/8/2019.

هەروەك بەپێی نوسراوەكە موچەی وەزارەتی دارایی و وەزارەتی دەرەوە رۆژی 8/8/2019  لەبری 17/8/2019، دابەشدەكرێت.