ئەمریكا رەتیدەكاتەوە لەگەڵ توركیا رێككەوتبن لەسەر دامەزراندنی ناوچەیەكی ئارام لە سوریا
  2019-08-08       1806       
هێزێكی سەربازیی توركیا لەسەر سنوری سوریا

وەزارەتی بەرگری ئەمریكا(پەنتاگۆن) رایگەیاند، گفتوگۆكانیان لەگەڵ ئەنكەرە بەردەوامن و گەیشتونەتە لێكتێگەیشتنێك دەربارەی دانانی "چەند میكانیزمێكی ئەمنی"و "فەرماندەیی هاوبەش" بەبێ دامەزراندنی "ناوچەی ئارام" وەك ئەوەی توركیا بانگەشەی دەكات.

ئاوێنە: بەپێی هەواڵێكی كەناڵی "حوڕە"، شۆن رۆبەرتسۆن، وتەبێژی وەزارەتی بەرگری ئەمریكا لەبەیاننامەیەكدا رایگەیاندوە كە كۆبونەوە سەربازییەكانی نێوان ئەمریكاو توركیا پێشكەوتنێكی بەرچاویان بەخۆیانەوە بینیوە بە ئاڕاستەی دانانی "چەند میكانیزمێكی ئەمنی" لە باكوری رۆژهەڵاتی سوریا بۆ چارەسەركردنی نیگەرانییەكانی دەسەڵاتدارانی توركیا.

هێمای بۆ ئەوەش كردوە كە پەنتاگۆن دەیەوێت فەرماندەییەكی سەربازی هاوبەش لەتوركیا دامەزرێنرێت لەپێناو بەردەوامبون لەسەر تاوتوێكردنی پلان و میكانیزمەكانی جێبەجێكردن.

لەلای خۆیشییەوە وەزارەتی دەرەوەی ئەمریكا ھێمای بۆ ئەوە كردوە كە دانوستانەكان بەردەوامن لەگەڵ توركیا دەربارەی وردەكارییەكانی رێككەوتنی تایبەت بە ناوچەی ئارام لە باكوری سوریا.

وەزارەتی دەرەوەی ئەمریكا هێمای بۆ ئەوەش كردوە كە وڵاتەكەی پشتیوانی گەڕانەوەی هەر پەنابەرێك بەشێوەیەكی خۆویستانە بۆ سوریا دەكات و هاوشێوەی پەنتاگۆن-یش ئاماژەی بەوەداوە كە رێككەوتنەكە لەگەڵ توركیا هیچ بڕگەیەك لەبارەی گۆڕینی دیموگرافیای ناوچەكەوە لەخۆناگرێت.

بەیاننامەكەی پەنتاگۆن بەهیچ شێوەیەك هێمای بۆ ئەوە نەكردوە كە بەرەو دامەزراندنی ناوچەی ئارام هەنگاو دەنێن وەك ئەوەی توركیا بانگەشەی بۆ دەكات.

رۆبەرتسۆن لەبەیاننامەكەدا ئاماژەی بەوەداوە كە پەنتاگۆن پابەندە بە پشتیوانیكردنی هاوپەیمانەكانی و سرەواندنی گورز لە داعش.

لەكۆتاییشدا ئەوەی خستۆتەڕو كە جێبەجێكردنی میكانیزمە ئەمنییەكان لەگەڵ توركیا بە چەند قۆناغێكدا تێدەپەڕێت و گفتوگۆكانیان لەگەڵ توركیا هێشتا بەردەوامن.

 


زۆرترین بینراو
© 2018 Awene Online, Inc. All Rights Reserved.
×