ئەردۆگان بۆ قەرەبوی شکستەکانی ناوخۆ بەدوای سەرکەوتنێکدا وێڵە لەدەرەوەی سنورەکان!
  2019-08-10       1347       



نیاز سەعید عەلی


یەکێک لەو فاکتەرە سەرەکییانەی ، کە بووە هۆی شکستە یەک لەدوای یەکەکانی حکومەتەکانی پێش قۆناغی بەحکومەتبوونی پارتی دادو گەشەپێدانی پارتەکەی ڕەجەب تەییب ئەردۆگان ، بە تایبەتیی لەنەوەدەکانی سەدەی ڕابردوودا ؛ فاکتەری قەیرانە ئابووریی و سیاسییەکانی ئەو حکومەتانەی پێشوو بوو ، لەپاڵ شکستی سیاسەتی دەرەکیی توورکیادا ، بەتایبەتیی لەقۆناغی دوای کۆتاییهاتنی ململانێکانی جەنگی ساردو گۆڕانکارییەکانی ناو یەکێتیی شۆرەویی و ئەوروپای ڕۆژهەڵات ؛ کە یەکێک لە دەرەنجامەکانی بریتیی بوو لەکەمبوونەوەی ڕۆڵی ستراتیژیی و سەربازیی و جیۆپۆلەتیکیی دەوڵەتی توورکیا ، لەدەوروبەرو ناوچەکەدا ، وەکو ئەندامێکی لەڕادەبەدەر نازکێشراوی پەیمانی باکووری ئەتڵەسیی .



پانۆرامای ڕەوتی ئیسلامی سیاسیی لەتوورکیا
پارتی دادو گەشەپێدان ، لەئێستادا گەورەترین و بەتەمەنترین ئاراستەی درێژەپێدەری کارکردنی ڕەوتی ئیسلامیی سیاسیی دەمامکداری ناو توورکیایە .
بەچەشنی هەر چوار پارتە ئیسلامی سیاسییە هەڵوەشاوەکانی تری پێش خۆی ؛ لەڕووی زنجیرەی مێژووییەوە لەدوای ڕاگەیاندنی پارتی سەعادەت ؛ ئەم پارتە بریتییە لەشەشەمین هەوڵ و دەستپێشخەریی ، بۆ دروستکردن و ڕاگەیاندنی پارتێکی تری ئیسلامی سیاسیی ئەلتەرناتیڤ لەتوورکیا ؛ وەکو میراتگری ئەو ڕەوتە ئیسلامیی سیاسییە دەمامکدارەی کە لەسەر دەستی نەجمەدین ئەربەکان (٢٩/١٠/١٩٢٦–٢٧/٢/٢٠١١) ، لەسەرەتای حەفتاکانی سەدەی ڕابردووەوە سەریهەڵداوەو قۆناغی جیاجیای بڕیوەو بەردەوامە .
پارتی دادو گەشەپێدان ؛ زادەی دوو فاکتەری پەیوەست بەڕەوتی ئیسلامی سیاسییە لەتوورکیا ، یەکێکیان تەشەنەسەندنی  ناکۆکییەکانی ناو دوایین پارتی ئیسلامی سیاسیی هەڵوەشاوە؛ بە ناوی  پارتی فەزیڵە (١٧/١٢/١٩٩٨- ٢٢/٦/٢٠٠١) ، ئەوی تریشیان ؛ دروستبوونی بۆشایی کاری ئیسلامی سیاسیی ، لەدوای هەڵوەشانەوەی ئەو پارتەو  دابەشبوونی میراتەکەی بۆ دوو گرووپ ، گرووپی یەکەم بریتیی بوون لەسەرکردەو کادیرە پیرە کۆنەپارێزەکانی ناو پارتی فەزیڵە کە بە (نەوەی پاسەوانە کۆنەکان) ناسراون ، ئەم گرووپە یەک مانگ ، لەدوای هەڵوەشانەوەی پارتەکە ، ڕۆژی (٢٢/٧/٢٠٠١) ، بەبڕیارو ڕێنمایی پشتی پەردەی ئەربەکان و بەسەرکردایەتیی ڕەجائی کۆتان ، پارتێکی تری تازەی ئیسلامی سیاسییان ، بەناوی پارتی سەعادەت ڕاگەیاندو تا ئێستا بەردەوامن ، بەڵام لاوازو داکشاوو پەراوێزن ، گرووپی دووەم بریتی بوون لەکادرو سەرکردە گەنجەکان ، کە بانگەشەی تازەگەرییان ئەکردو لەناکۆکیی و ململانێیەکی تووندا بوون ؛ لەگەڵ سەرکردە کۆن و تەقلیدییەکانی نەوەی یەکەمی کاری ئیسلامی سیاسیی لەتوورکیا ، لەناو هەمان پارتی هەڵوەشاوە ، ئەمانیش  بەسەرکردایەتیی ئەردۆگان و عەبدوڵڵا گویل و عەلی باباجان و ژمارەیەکی تر ، لەکادیرەکان و پەرلەمانتارانی پارتی فەزیڵەی هەڵوەشاوە ، ڕۆژی (١٤/٨/٢٠٠١) ، پارتی دادو گەشەپێدانیان ڕاگەیاند .
پێشینەی مێژوویی سەرهەڵدانی دیاردەی ئیسلامی سیاسیی  و دروستبوونی پارتی ئیسلامی سیاسیی لەتوورکیا ؛ گرێدراوە بەنەجمەدین ئەربەکان ، ناوبراو بەئەندازیارو باوکی گیانیی ڕەوتی ئیسلامی سیاسیی لەتوورکیا لەقەڵەم ئەدرێت ، پێنج جار  پارتی ئیسلامی سیاسیی دامەزراندووە ؛ سێجار بەئاشکرا ، دووجاریش بەنهێنیی و لەپشتی پەردە ؛ ئەو کاتەی کە کارکردنی سیاسیی ، بەیاسا لێ قەدەغەکرابوو .
ئەو سێ پارتە ئیسلامی سیاسییەی کە ئەربەکان بەئاشکراو  لەلایەن خودی خۆیەوە ڕاستەوخۆ دایمەزراندوون ، بریتیین لە؛ پارتی سیستەمی نیشتمانیی (٢٦/١/١٩٧٠–٢٠/٥/١٩٧١) ، پارتی سەلامەی نیشتمانیی (١١/١٠/١٩٧٢–١٢/٩/١٩٨٠) ، پارتی ڕەفاه (١٩/٧/١٩٨٣-١٦/١/١٩٩٨) ، پارتی چوارەم و پێنجەمیش ، کە لەپشتی پەردەوە دایمەزراندوون ، بریتیین لە؛ پارتی فەزیڵە (١٧/١٢/١٩٩٨–٢٢//٦/٢٠٠١) ، پارتی سەعادەت (٢٢/٧/٢٠٠١) .



پارتی دادو گەشەپێدان .. هەڵکشان بەرەو دەسەڵات
لەیەکەمین بەشدارییکردنیدا ؛ لەهەڵبژاردنی گشتیی پەرلەمانی توورکیا ، لەمانگی تشرینی دووەمی ساڵی (٢٠٠٢)دا ؛ ئەم پارتە توانی ببێتە براوەی یەکەمی پرۆسەی هەڵبژاردن ؛ ئەویش بەهۆی قۆستنەوەی کێشەو قەیرانە کەڵەکەبووە ناوخۆییەکانی حکومەتەکانی پێشوو  ، هەر بۆیە لەهەڵمەتەکانی بانگەشەی هەڵبژاردن و چڕکردنەوەی ئەرک و پەیامەکانی ئەم پارتە تازە ڕاگەیەندراوەدا ؛ بەردەوام و بەپلەی یەکەم ، جەخت لەسەر چارەسەری کێشەو قەیرانە تەشەنەسەندووەکانی ناوخۆی توورکیاو خۆبەدوورگرتن لەتێوەگلان بەکێشەو ناکۆکیی و ململانێ دەرەکییەکان و قەیرانەکانی دەرەوەی سنوورەکانی توورکیا ؛ ئەکرایەوە .
ئەم پارتە لەسەرەتاکاندا ؛ کارنامەی خۆی لەچوارچێوەی هەوڵدان بۆ چارەسەری قەیرانە ئابوورییەکان و بەرەنگاربوونەوەی گەندەڵیی و چەسپاندنی دادپەروەریی و بانگەشەو بەڵێن ، بۆ دۆزینەوەی چارەسەر ؛ بۆ کێشە سیاسییە ناوخۆییەکان بەگشتیی و کێشەی کورد بەتایبەتیی داڕشتبوو ، لەسەر ئەم بنەمایە توانی بۆ چەندین خولی تری یەک لەدوای یەکی پرۆسەکانی هەڵبژاردن ؛ بەپشتبەستن بەچەندین دەستکەوتی ئابووریی و پەیڕەویکردنی سیاسەتێکی دیماگۆکیی پڕ  لەبەڵێن و پەیمان ، بۆ چارەسەری  کێشەی کورد ؛ سەرکەوتن بەدەستبهێنێت .
پارتی دادو گەشەپێدان ؛ وەک هەڵگرو درێژەپێدەری پرۆژەی ئیسلامی سیاسیی لەتوورکیا ، بەڵام جیاوازتر لەپارت و ڕێکخراوە تەقلیدییە ئیسلامی سیاسییەکانی تری توورکیاو جیهانی ئیسلامیی ، بەمیکانیزمەو ئامرازی جیاوازتر ، بەدەمامکی جیاجیا ، بەشێنەیی و بەنەخشەی ورد ؛ دوور لەورووژاندنی میدیایی و هەنگاوی زەق و هەراسانکەر لەبەرامبەر سیستەمی عەلمانیی ؛ بەپراکتیکیی هەنگاوی ناوە بۆ ئەنجامدانی چەندین گۆڕانکاریی ، لەبواری پەروەردەو خوێندن ، سیستەمی کۆمەڵایەتیی و کاروباری ئایینیی ، بووژاندنەوەی ڕۆڵ و بەشداریی ئایینی ئیسلام ، لەناو چەندین کایەی بنەڕەتیی و گرنگی ناو کۆمەڵگەو ناو دامودەزگەکانی حکومەت و دەوڵەتدا ، لەپاڵ ئەنجامدانی چەندین ڕیفۆرمی یاسایی و دەستووریی ، بەناڕاستەوخۆش کاری ئەکرد بۆ پەکخستنی پرۆسەی بوونە ئەندامی هەمیشەیی توورکیا ، لەناو یەکێتیی ئەوروپا ؛ لەڕێگەی ڕەتکردنەوەی مەرج و داواکارییەکانی ئەو یەکێتییە بۆ بوونە ئەندامی هەمیشەیی تیایدا ، هاوکات وەکو ئەلتەرناتیڤ ؛ پارتی دادو گەشەپێدان ؛ ستراتیژی بادانەوەی بەلای ڕۆژهەڵاتی ئیسلامییدا پەیڕەو کرد .
زۆرینەی ئەو هەنگاوو گۆڕانکاریی و ڕیفۆرمانەی پارتی ناوبراو ، بۆ هێنانەدی ئامانجی شارەوەی بەئیسلامیکردنەوەی کۆمەڵگەو سیستەم و دامودەزگەکانی دەوڵەتی توورکیاو گۆڕینی ناسنامەی ئەو دەوڵەتە بووە ؛ لەعەلمانییەوە بەرەو ئیسلامیی ، لەڕووی کەلتوورو مەعریفییشەوە ؛ گەڕانەوە بووە لەکەلتوورو مەعریفەی ڕۆژئاواییەوە بۆ کەلتوورو مەعریفەی ڕۆژهەڵاتیی ئیسلامیی ، ئەم میتۆدە لەکاری پارتی دادو گەشەپێدان ؛ لەئێستادا ڕوونترو بێباکتر درێژەی هەیە .
پارتی دادو گەشەپێدان لەتوورکیا ، لەماوەی نێوان (٢٠٠٢-٢٠١٤)دا ؛ توانی لەڕووی ئابوورییەوە ، بووژانەوەیەکی بەرچاو بەسەر ڕەوشی داتەپیووی ئابووریی قۆناغی نەوەدەکاندا بهێنێت ، دیارە ئەمەش بەئەنجامدانی پرۆسیەکی ڕیفۆرمی ئابووریی درێژخایەن ، شایەنی باسە بەردەوامی ئەم ڕیفۆرمانەو دەرکەوتنی ئەنجامەکانی لەسەر گەشەو بووژانەوەی ئابووریی توورکیا ؛  لەپرۆسەکانی هەڵبژاردنە گشتییەکانی شارەوانییەکان و پەرلەماندا ؛ چانسی سەرکەوتنی بۆ ئەم پارتە ، بۆ چەندین جار تازە ئەکردەوە .


بووژانەوەی تاکڕەویی و سووڵتانییزم
ئەردۆگان لەدرێژەی هەنگاوو سیاسەتەکانییدا ؛ لەچوارچێوەی پرۆژەی پان ئیسلامییزمدا ؛ بەڵام بەناوو بەبەرگێکی جیاوازەوە ؛ لەدەسپێکی ڕووداوەکانی دیاردەی ناونراو بەبەهاری عەرەبیی ، کارنامەی داڕشت بۆ دەستتێوەردان لەکاروباری ناوخۆی چەندین وڵات و دروستکردنی پێگەو هەژموون تیایاندا ، لەم سۆنگەیەوە پەلی هاویشت بۆ دەرەوەی توورکیا ؛ بەڕادەیەک زیاترو خراپتر لەحکومەتەکانی پێش خۆی ، بەتایبەتیی لەدەستخستنە ناو کاروباری ناوخۆو رووداوەکانی ناو سووریاو میسرو لیبیاو دواتر خۆخزناندنە ناو کێشەو ململانێ و ناکۆکییەکانی نێوان (فەلەستین - ئیسرائیل) ، (سعودییەو ئیمارات - ئیخوان موسلمین) ،(سعودییەو ئیمارات - قەتەر) ، (هەرێمی کوردستان - حکومەتی عێراق)و چەندین پەلهاویشتنی تر ؛ بەرەو وڵاتانی باکووری ئەفریقیاو  چەندین وڵات وناوچەی تر لەجیهاندا .
 شایەنی باسە زۆربەی هەنگاوو سیاسەتەکانی دەرەوەی توورکیا و دەستتێوەردان و پەلهاویشتنەکان ، لەدەرەنجامدا بوونەتە هۆی دروستبوونی ترس و نیگەرانیی و نائارامیی و ناکۆکیی و  کاردانەوەی هێزە نێودەوڵەتییەکان و چەندین وڵاتی تری ناوچەکە ، لەبەرامبەر سیاسەتی دەرەوەی توورکیا .
پرانسیپی سفرکردنەوەی کێشەو ناکۆکییە دەرەکییەکانی توورکیا ؛ کە تێزیک بوو ئەحمەد داود ئۆغلۆی سەرۆک وەزیرانی پێشووی توورکیا دایڕشتبوو ، بۆ سەرلەنوێ پیاچوونەوەو بنیاتنانەوەی سیاسەتی دەرەوەی توورکیا  ؛ بەئامانجی کۆتاییهێنان بەهەموو کێشەو ناکۆکیی و ململانێ دەرەکییەکانی توورکیا ، لەسەر بنەمای ئاشتیی و دۆستایەتیی و کارو بەرژەوەندیی هاوبەش ، کەچی ئەردۆگانی سەرۆک ؛ دەستی تێخست و بەئاراستەی زیاترکردن و ئالۆزکردنی کێشەو ناکۆکییە دەرەکییەکانی توورکیای برد ، ئەم بەلادا ڕێبردنە لەسیاسەتی دەرەوەدا ؛ بووە هۆی سەرهەڵدان و تەشەنەسەندنی ناکۆکیی ناوخۆیی ، لەناو خودی حکومەتەکەو لەناو پارتی دادو گەشەپێدانی فەرمانڕەوادا ، بەتایبەتیی لەنێوان ئەردۆگان و داود ئۆغلۆدا ، دواتر لەژێر تین و گووشاری ئەردۆگاندا ؛ ئۆغلۆی سەرۆک وەزیران ، ناچار بەدەست لەکارکێشانەوە کرا . 
ویستی تاکرەویی لەئاراستەی کارکردنی ئەردۆگاندا ، چ وەکو سەرۆکی پارت ، چ وەکو سەرۆکی کۆمار ؛ بەتایبەتیی پاش ئەوەی کە بەهۆی ڕیفۆرمی دەستوورییەوە ، دەسەڵاتی زیاترو گرنگتری بۆ خۆی دەستەبەرکرد ؛ بووە هۆی سەرهەڵدان و تەشەنەسەندنی ناکۆکیی و ململانێی ناوخۆیی و بەرۆکی حکومەت و پارتەکەی ئەردۆگانی گرت .
ئەردۆگان لەبەڕێوەبردنی ناکۆکیی و ململانێکانییدا ؛ بەدەستێک کەوتە زەبر وەشاندن لەهاوپەیمانەکەی دوێنێ ، ئەویش بزووتنەوەی خزمەت و فەتحولڵا گوولەنی ڕابەری بزووتنەوەکە ، بەدەستێکی تریش کەوتە پەراوێزخستن و تەنگ پێهەڵچنینی نەیارەکانی لەناو حکومەت و پارتەکەیدا ، ئەمە سەرەڕای قۆستنەوەی کودێتاکەی (١٥/٧/٢٠١٦) ، بۆ پاکتاوکردنی سوپاو دەزگای پۆلیس و دەزگای دادوەریی ؛ لەنەیارەکانی خۆی . 

دووبارەبوونەوەی مێژوو 
مێژووییەکی نزیک لەقۆناغێکی پێش وەرچەرخان و دوای وەرچەرخان ، کە زۆرینەی کارەکتەرەکانی ماون ، یان زۆرێک لەبینەری ڕووداوو گۆڕانکارییەکان ؛ کە تەمەن ڕێی پێداون فریای هەردوو قۆناغە لەیەکچووەکە بکەون و هێشتا یادەوەرییان سیخناخە بەچیرۆکەکانی پارتە فەرمانڕەواکانی قۆناغی شکستی ئابووریی و سیاسیی نەوەدەکانی سەدەی ڕابردووو قۆناغی ئێستای پارتی دادو گەشەپێدان ؛ درک بەدووبارەبوونەوەیەکی تراژیدیی چیرۆکی ڕووداوەکان لەتوورکیادا ئەکەن .
سیاسەتەکانی ئەردۆگان لەناوخۆو دەرەوەی توورکیا ؛ ئەستێرەی درەوشاوەی ئابووری توورکیای بەرەو ئاوابوون بردووە ، لەم ساڵانەی دواییدا ؛ دۆخی ئابووریی توورکیا ؛ لەگەڕانەوەدایە بۆ دۆخی خراپ و داتەپیووی قەیراناویی نەوەدەکانی سەدەی ڕابردوو ،کە بووە هۆی شکستپێهێنانی چەندین حکومەت و هەرەسهێنانی چەندین پارتی سیاسی دەسەڵاتداری مێژوویی .
ئەو دۆخە ئابوورییە خراپەی کە زەمینەی خۆشکرد بۆ بوونە ئەلتەرناتیڤی پارتی دادو گەشەپێدان ؛ بەسەر پارتە سیاسییە مێژوویی و تەقلیدییە فەرمانڕەواکانی ڕابردوو ، ئێستا خەریکە دووبارە ئەبێتەوە بەسەر پارتی دادو گەشەپێداندا .
بەدەر لەدۆخی قەیرانی ئابووریی ، توورکیا بەردەوامە لەخوولانەوە بەدەوری هەمان بازنەی ڕابردوو ؛ بۆ ڕووبەڕووبوونەوەی سەربازییانەی کێشەی کوردو ئامادەنەبوون لەگۆڕینی سروشتی ئەو کێشەیە ؛ لەکێشەیەکی ناسێنراو و ئابڵۆقەدراو بەچەمکی ئاسایش ، بۆ کێشەیەکی سیاسیی و نەتەوەیی ڕەوا .
ئەم تێڕوانینە تەقلیدییە نەگۆڕەی پارتی دادو گەشەپێدان بۆ کێشەی کورد لەتوورکیا ، چەندین دەرهاویشتەی سیاسیی و ئابووریی نەخوازراوی بۆ دەوڵەتی توورکیا لێ کەوتۆتەوە ،کە تیایدا تەنها میکانیزمەو ئامراز ، لای دەوڵەت بۆ چارەسەر ؛ بووەتە فاکتەری سەربازیی ، لەم سۆنگەیەوە حکومەتەکانی ڕابردوو ، بەتایبەتیی لەهەشتاکان و نەوەدەکانی سەدەی ڕابردوودا ؛ ئەزموونێکی بێ بەرهەم و شکستخواردوویان هەیە لە ڕووبەڕووبوونەوەی ئەم کێشەیەدا ، چ لەڕووی سەربازیی ، یان لەڕووی سەقامگیریی ئاسایش ، یان لەڕووی سیاسیی .


ڕەوشی ئێستای پارتی فەرمانڕەوا
پارتی دادو گەشەپێدان ؛ لەئێستادا گیرۆدەی چەندین کێشەی ناوخۆیی پارتەکەیە ، بەتایبەتیی  مەترسیی ڕوودانی لێکترازانی گەورە لەجەستەی پارتەکەدا ، شانبەشانی تەشەنەسەندنی قەیرانی ئابووریی ناوخۆو گرژبوونی پەیوەندییە دەرەکییەکانی توورکیا ، لەگەڵ وڵاتانی ئەمریکاو ئەوروپاو شکستهێنانی لەسیاسەتی سفرکردنەوەی کێشەو ناکۆکییە دەرەکییەکان ، هەروەها بێ بەشبوونی لەچنینەوەی دەسکەوتەکانی ڕووداوو گۆڕانکارییەکانی ناوچەکە ، لەلایەکی تریش دۆڕاندنی چەندین شاری گەورەی توورکیا ؛ لەدوایین هەڵبژاردنی شارەوانییەکاندا ، لەناویاندا ئەستەنبووڵ و ئەنقەرە ، ئەمانە لەگرنگترین هۆشداریی و ئاماژەکانی نزیکبوونەوەی چارەنووسی ئەردۆگان و پارتەکەیەتی ؛ لەچارەنووسی پارت و سەرکردە ناودارەکانی قۆناغی نەوەدەکان ؛ کە لەسەر شانۆی سیاسیی و لەناو پرۆسەی فەرمانڕەواییدا ؛ کەوتنە پەراوێزەوەو ئاوابوون .
شکستەکانی ئەردۆگان و پارتەکەی لەفەرمانڕاوییدا ؛ لەلایەک یەکێتیی ڕیزەکانی پارتی دادو گەشەپێدان ، بەرەو لێکترازان ئەبات ، لەلایەکی تریش هێزەکانی ئۆپۆزسیۆن ؛ بۆ هەڵبژاردنی گشتیی داهاتووی پەرلەمان ، تۆکمەو بەهێز ئەکات .
لەئێستادا ئەردۆگان بۆ ڕووبەڕووبوونەوەی ئەو شکستە پێشبینیکراوە ؛ کار لەسەر ورووژاندنی هەستوسۆزی بیرباوەڕی ناسیۆنالیستیی توورکیی ئەکات ، تا لەم ڕێگەیەوە باسکی خۆی بۆ هەڵبژاردنی داهاتوو بەهێز بکات ، لەهەمان کاتدا هەوڵ ئەدات ؛ ئاراستەو فۆکس لەسەر کێشە ناوخۆییەکانی پارتەکەی و شکست و قەیرانەکانی حکومەتەکەی ؛ بگۆرێت بۆ مەترسیی لەدیاردەی فۆبیای کورد ، ئەیەوێت ڕووبەڕووبوونەوەو سەرکەوتن بەسەر فۆبیای کوردیی ، لەو دیو سنوورەکانی دەوڵەتی توورکیا ؛ بکاتە ڕووداوی هەرە گەورە ، بەسەر شکستە ئابوورییەکانی ناوخۆ ، هەروەها ئەیەوێت قوورسایی و کاریگەریی لێکترازانی ناو پارتەکەی کەم بکاتەوە ، هاوکات ئەیەوێت دۆڕاندنی شارە گەورەکانی دوایین هەڵبژاردنی شارەوانییەکانی پێ پەردەپۆش بکات ، لەکۆتا جاریشدا ئەیەوێت تێکشکانی فۆبیای کورد ؛ بکاتە دەسکەوتێکی نەتەوەیی گەورە بۆ بووژانەوەی پارتەکەی و خۆی بکاتە سیمبوولێکی کاریزمیی نەتەوەیی  ، تاکو ئەو سەرکەوتنە بکاتە خۆراکی هەڵمەتی بانگەشەی هەڵبژاردنی گشتیی داهاتووی پەرلەمان ، وەک چۆن بۆڵەند ئەجاوید(٢٨/٥/١٩٢٥-٥/١١/٢٠٠٦)ی سەرۆکی پارتی چەپی دیموکراسیی ؛ پرۆسەی دەستگیرکردنی سەرۆکی پەکەکەیان قۆستەوەو کردیانە سەرکەوتنێکی نەتەوەیی گەورەو هەڵبژاردنی ساڵی (١٩٩٩)یان پێ بردەوە .
شایەنی باسە هەڵبژاردنی داهاتووی پەرلەمان لە توورکیا ، پێشبینیی ئەکرێت ببێتە قوورسترین پرۆسەی هەڵبژاردن ، لەبەردەم ئەردۆگان و پارتەکەی ، بۆیە ئەردۆگان بۆ درێژەپێدان بەسەپاندنی پێویستییبوونی مێژوویی خۆی و پارتەکەی ؛ بەشوێن گۆچانێکی سیحرییدا ئەگەرێ و تەنها تێکشکانی فۆبیای کوردیی لەبەردەستدا ماوە ، پێناچێت نەیارە دەرەکییەکانی لێ بگەرێن ؛ ئەم گۆچانە سیحرییە ؛ بکەوێتە دەستی ئەردۆگان وفریای بکەوێت !! .


تێبینیی : ئەم وتارە لەژمارەی (٧٩٣٤)ی ڕۆژی هەینیی (٢٠١٩/٨/٩)ی ڕۆژنامەی کوردستانی نوێ بڵاوکرایەوە ، بەڵام بەگۆڕینی ناوونیشانەکەیەوە ؛ بێ ئەوەی پرس بەبەندە کرا بێت ، بێ ئەوەی ئاگادار کرابێتمەوە ، بێ ئەوەی ڕەزامەندییم وەرگیرابێت ، ناوونیشانی ڕاستەقینەی وتارەکە ، بەمجۆرەیە ؛ (ئەردۆگان ؛ بۆ قەرەبووکردنەوەی شکستەکانی ناوخۆ ، بەدوای سەرکەوتنێکدا وێڵە لەدەرەوەی سنوورەکان!!) ، ڕۆژنامەی کوردستانی نوێ ؛ ئەم ناوونیشانەیان ڕەتکردۆتەوەو خۆیان ناوونیشانێکیان بۆ داڕشتووە بەمجۆرە ؛(تورکیا وازی لەسیاسەتی سفرکردنەوەی کێشەکان هێناوە؟)، کە لەگەڵ ناوەرۆکی وتارەکەشدا یەکناگرێتەوە .

زۆرترین بینراو
© 2018 Awene Online, Inc. All Rights Reserved.
×