وەزارەتی تەندروستی عێراق رایگەیاند، بەهۆی
تەقینەوەكەی ئەمڕۆی كۆگایەكی چەك و تەقەمەنی حەشدی شەعبییەوە لەباشوری شاری بەغدا،
13 كەس بریندار بون.
ئاوێنە: سەیف بەدر، وتەبێژی وەزارەتەكە
لەبەیاننامەیەكدا رایگەیاند، حەوت بریندار گەیەندراونەتە نەخۆشخانەی یەرموك و شەش
برینداری دیكەش گەیەندراونەتە نەخۆشخانەی مەحمودیە.
هێمای بۆ ئەوەش
كردوە كە سەرجەم بریندارەكان برینەكانیان سوكەو هەندێكیان لەئێستادا چارەسەر
وەردەگرن و هەندێكی دیكەشیان دوای وەرگرتنی چارەسەر بەهۆی باشی دۆخی
تەندروستیانەوە نەخۆشخانەیان جێهێشتوە.
ئێوارەی ئەمڕۆ
بەهۆی گڕگرتنی كۆگایەكی تەقەمەنی لە بنكەیەكی سەربازی سەر بە حەشدی شەعبی لەناوچەی
دۆرە-ی باشوری بەغدا، دەنگی تەقینەوەو دەرچونی هاوەن بیسترا.