كەناڵی "سی ئێن ئێن"ی ئەمریكی رایگەیاند، تۆمارێكی دەنگی دۆناڵد ترەمپ، سەرۆكی ئەمریكایان دەستكەوتوە، كە لە ئێوارە خوانێكدا لەگەڵ كۆمارییەكان بۆ كۆكردنەوەی كۆمەك لە باشوری فلۆریدا، باس لە ساتی كوشتنی قاسم سولەیمانی و ئەبومەهدی موهەندیس دەكات.

ئاوێنە: تۆمارە دەنگییەكە هی ئێوارەی دوێنێ هەینییەو سی ئێن ئێن ئەمڕۆ شەممە ناوەڕۆكەكەی بڵاوكردۆتەوە كە تێیدا ترەمپ باس لە ساتی كوشتنی قاسم سولەیمانی و ئەبومەهدی موهەندیس دەكات.

ترەمپ لە تۆمارە دەنگییەكەدا هێمای بۆ ئەوە كردوە كە "لەڕێگەی كامێراكانەوە بە دوری چەندان میل لە ئاسمانەوە" گوێی لە بەرپرسە سەربازییەكان گرتوە لەكاتی سەیركردنی ئەنجامدانی هێرشەكەدا بۆ سەر سولەیمانی.

ترەمپ وتویەتی، بەرپرسە سەربازییەكان پێیانوتم: "هەردوكیان بەیەكەوە گەورەم" وەك ئاماژەیەك بۆ قاسم سولەیمانی و ئەبومەهدی موهەندیس.

بەپێی قسەی ترەمپ، دواتر بەرپرسە سەربازییەكان پێیان وتوە"گەورەم دو خولەك و 11 چركەیان ماوە. هیچ كاردانەوەیەك نییە. دو خولەك و 11 چركەیان لەژیاندا ماوە، گەورەم ئەوان لە ئۆتۆمبێلێكدان، ئۆتۆمبێلێكی گولەنەبڕە، گەورەم ئەوان نزیكەی یەك خولەكیان لەژیاندا ماوە...گەورەم 30 چركەیان ماوە..10، 9، 8،.."

ترەمپ وتویەتی، دوای ئەوە لەناكاو ئەم دەنگە هات "بوووم"...و بەرپرسە سەربازییەكان پێیان وتوم: "گەورەم لەناوبران."

ترەمپ وتویەتی"ئەمە بو كە دەیانوت شكست ناهێنێت."

هەروەها ترەمپ وتویەتی"دوان بە یەك نرخ" وەك ئاماژەیەك بۆ كوشتنی قاسم سولەیمانی و ئەبومەهدی موهەندیس پێكەوە.

سەرۆكی ئەمریكا وتوشیەتی، سولەیمانی لەبارەی وڵاتەكەی ئێمەوە قسەی خراپی دەكرد... تاكە دەبو گوێ لەو قسە پڕوپوچانە بگرین؟

هەروەك وتوشیەتی، سولەیمانی تیرۆریستێكی ناسراو بو، ئەو لە لیستی تیرۆری ئێمەدا بو دەبو لە وڵاتەكەی خۆی بمێنێتەوە.