دوابەدوای كۆتایهاتنی كۆبونەوەی نێوان مەولود چاوش ئۆغڵو، وەزیری دەرەوەی توركیاو موحەمەد حەكیم، وەزیری دەرەوەی عێراق، ئۆغڵۆو حەكیم كۆنگرەیەكی رۆژنامەوانییان سازكرد كە تێیدا وەزیری دەرەوەی توركیا رایگەیاند كردنەوەی دەروازەی نوێ لەگەڵ عێراق گرنگە.
ئاوێنە: سەرلەبەیانی ئەمرۆ "یەك شەممە" بەمەبەستی ئەنجامدانی چەند دیدارو چاوپێكەوتنێك لەگەڵ بەرپرسانی عێراقو هەرێمی كوردستان، مەولود چاوش ئۆغڵو، وەزیری دەرەوەی توركیا گەیشتە بەغدا، لەیەكەم وێستگەی سەردانەكەیدا لەگەڵ موحەمەد حەكیم، وەزیری دەرەوەی عێراق كۆبویەوەو دوابەدوای كۆبونەوەكەش لەپرێس كۆنفرانسێكی هاوبەش لەگەڵ هاوتا عێراقییەكەی رایگەیاند دوای تەواوبونی کۆبونەوەکانی ئەمڕۆ ی سەردانی بەسرە و هەولێر دەکات و دواتریش دەگەڕێتەوە تورکیا.
وتیشی " عادل عەبدولمەهدی سەرۆك وەزیرانی عیراق سەردانی توركیا دەكاتو پێش كۆتایی ئەمساڵ ئەردۆغان سەردانی عیراق دەكات".
هەروەها موحەمەد حەكیم، وزەزیری دەرەوەی عێراق رایگەیاند ڕێگە نادەین لە خاكی عیراقەوە توركیا بكرێتە ئامانج، ئاماژەی بەوەشكرد ، لە کۆبونەوەکەدا باس لە سەردانی رەجەب تەیب ئەردۆغان، سەرۆک کۆماری تورکیا بۆ عێراق كراوە.