ئەنتۆنیۆ
گۆتیریس، سكرتێری گشتی نەتەوە یەكگرتوەكان نیگەرانی خۆی لەزیادبونی توندوتیژییەكان
بەرامبەر بە رۆژنامەنوسان رادەگەیەنێت كە بەپێی ئامارێكی یونسكۆ لە ساڵی رابردودا
نزیكەی 100 رۆژنامەنوسان لەسەرتاسەری جیهان كوژراون.
ئاوێنە: ئەمڕۆ
هەینی 3/5/2019 رۆژی جیهانی ئازادی رۆژنامەگەرییە، لە پەیامێك بەو بۆنەتەوە
سكرتێری گشتی نەتەوە یەكگرتوەكان رایگەیاند، رۆژنامەگەریی كۆڵەكەی بونیادنانی
دامەزراوە دادپەروەر و نەزیهەكان، ناچاركردنی سەركردەكان بۆ لێپێچینەوە و خستنەڕوی
راستییەكانە.
هێمای بۆ ئەوەش
كرد كە ئازادی رۆژنامەگەریی پرەنسیپێكی بنەڕەتییە بۆ هێنانەدی ئاشتی، دادپەروەری و
مافی مرۆڤ و وتیشی"هیچ دیموكراسییەتێك تەواو نییە، ئەگەر زەمینەی گەیشتن بە
زانیارییە دروستەكان بەشێوەیەكی شەفاف نەڕەخسێنێت."
ئەوەشی خستەڕو كە تەكنەلۆژیا گۆڕانكارییەكی
بەدیهێناوە لە گەیشتنی خەڵك بە زانیارییەكان و ئاڵوگۆڕكردنیان بەڵام هەندێك جار
ئەوە بەكاردەهێنرێت بۆ چەواشەكردنی رای گشتی یاخود بۆ پەرەپێدانی توندوتیژی و
زیادكردنی رق و كینە.
هەروەك ئاماژەی زیادبونی گوتاری دژ بە
راگەیاندو زیادبونی توندوتیژی بەرامبەر بە رۆژنامەنوسان كرد و نیگەرانی خۆیشی نیشاندا بەرامبەر بە
زیادبونی پەلاماردانی رۆژنامەنوسان و دەربازبونی پەلاماردەران لە سزا.
ئاشكراشیكرد كە
بەپێی یونسكۆ لەماوەی ساڵی رابردودا نزیكەی 100 رۆژنامەنوس كوژراون و سەدانیش
خراونەتە زیندانەكانەوە.
لە رۆژی جیهانی ئازادی رۆژنامەگەریدا،
سكرتێری گشتی نەتەوە یەكگرتوەكان داوایكرد كە بەرگری لەمافی رۆژنامەنوسان بكرێت كە
كەسانێكن هاوكارن لە بونیادنانی جیهانێكی باشتر بۆ هەموان.