میدیای یەكێتی: نەجمەدین كەریم 53 دۆسیەی گەندەلی لەسەرە
  2019-05-22       2112       



میدیای یەكێتی نیشتمانی كوردستان رایدەگەیەنێت پارتی دیموكراتی كوردستان لەرێگەی نێچیرڤان بارزانی، كەریم سنجاری، مەكتەبی مەسعود بارزانی لەهەوڵی ئەوەدان نەجمەدین كەریم دەستگیرنەكرێت یاخود رادەستی حكومەتی عێراق نەكرێتەوە، دەشڵێت "نەجمەدین كەریم 53 دۆسیەی گەندەلی لەسەرە".


ئاوێنە: میدیای یەكێتی رایگەیاندوە  هه‌ریه‌كه‌ له‌نێچیرڤان بارزانی، جێگری سه‌رۆكی پارتی دیموكراتی كوردستان‌و كه‌ریم سنجاری، وه‌زیری ناوخۆی حكومه‌تی هه‌رێم و مه‌كته‌بی مه‌سعود بارزانی، له‌هه‌وڵی ئازادكردنیدان، یاخود ڕاده‌ستی به‌غدا نه‌كرێت، به‌ڵام تائێستا له‌ هه‌وڵه‌كانیان سه‌ركه‌وتو نه‌بوە، باس لەوەش دەكات پارێزگاری لەسەر كارلادراوی كەركوك، نه‌جمه‌دین كه‌ریم 53 دۆسێی گه‌نده‌ڵی له‌سه‌ هه‌یه‌و له‌گه‌ڵ ڕێبوار تاڵه‌بانی جێگری پێشووی ئه‌نجومه‌نی پارێزگای كه‌ركوك، ڕێكه‌وتون‌ كه‌ 18 دۆسیه‌ دابخه‌ن، به‌ڵام فریا نه‌كه‌وتوه‌ سه‌رجه‌م دۆسییه‌كانی دیكه‌ی دابخات.

پێشتر  ئاژانسی هەواڵی ره‌سمی‌ حکومەتی‌ عێراق بڵاویكرده‌وه‌ كه‌ دره‌نگانێكی‌ شەوی رابردو  نەجمەدین کەریم، پارێزگاری پێشوی کەرکوک لەفڕۆکەخانەی‌ بەیروت لەلایەن پۆلیسی ئینتەرپوڵەوە دەستگیرکراوە.


له‌به‌رامبه‌رداو له‌رونكردنه‌وه‌یه‌كدا نوسینگەی رۆژنامەوانی نەجمەدین کەریم ره‌تیده‌كاته‌وه‌ ناوبراو ده‌ستگیركرابێت‌و ده‌ڵێت، "لێرەوە بۆ هەمو هاونیشتمانیان لەکوردستان‌و بەتایبەت شاری کەرکوک رادەگەیەنین؛ کە سەرلەبەری ئەو هەواڵە دورە لەراستیەوەو بەڕێز دکتۆر نەجمەدین کەریم، بۆ کاری ئاسایی‌و دیپلۆماتی خۆی گەشتی دەرەوەی وڵاتی کردوەو هەفتەی داهاتو دەگەڕێتەوە کوردستان."


دەقی روونکردنەوەکە:

جارێکی تر چەند کەناڵێکی راگەیاندن وەک پیشەی هەمیشەییان و دوور لە پرەنسیپ و ئیتیکی کاری رۆژنامەوانی، هەواڵێکی چەواشەکارییان بڵاوکردووەتەوە، گوایە بەڕێز دکتۆر نەجمەدین کەریم لە کاتی گەشتکردنی بۆ وڵاتی لوبنان، لە فڕۆکەخانەی بەیرووت دەستگیرکراوە.

لێرەوە بۆ هەموو هاونیشتمانیان لە کوردستان و بەتایبەت شاری کەرکوک رادەگەیەنین؛ کە سەرلەبەری ئەو هەواڵە دوورە لە راستیەوە و بەڕێز دکتۆر نەجمەدین کەریم، بۆ کاری ئاسایی و دیپلۆماتی خۆی گەشتی دەرەوەی وڵاتی کردووە و هەفتەی داهاتوو دەگەڕێتەوە کوردستان.

هاوکات بە پێویستی دەزانین ئەوە بخەینەڕوو؛ دروستکردنی ئەم جۆرە هەواڵانە بۆ چەواشەکردن و بەلاڕێدابردنی هاونیشتمانییانە و هەروەها بۆ دوورخستنەوەی رایگشتییە لەو کێشە و گرفتانەی ئەمڕۆ لە پارێزگای کەرکوک هەن.

نووسینگەی رۆژنامەڤانی
د. نەجمەدین کەریم

زۆرترین بینراو
© 2018 Awene Online, Inc. All Rights Reserved.
×