مرۆڤ ، مەخلوقێکی سواڵکەر و گوناھ
هێمن ئەحمەد
2020-06-10 1063
لەوساتەوەی چاوم کردۆتەوە و توانیومە بیر لە دەوروبەرم بکەمەوە ، بڕوام کرد کە ھەموو مرۆڤەکان لە ھەر ئاست و پلەو پایەیە و تەمەنێکدا بن خاوەنی ھەردوو سیفاتی سواڵکەری و گوناھ بونن . گوناھ بوون بەواتای (داماو ی و جێی بەزەیی)...ھەرچەند من بڕوام وایە ، مرۆڤ دەبێت خاوەنی ماف بێت و ڕێزی لێبگیرێت نەک جێگەی بەزەیی بێت .
بۆچی ھەموومان سواڵکەرین..؟ وەڵامەکەی ئاسانە ، لەبەرئەوەی ھەموومان دەست پان دەکەینەوە لە سەرو خۆمان یان چاوەڕێی شتێکین لە شوێنێکەوە...ئینجا مادی یان مەعنەوی...
گەر لەبەردەمی مزگەوتێکەوە تێپەڕین ، پێدەچێت سەرنج بدەینە ئەو دەرۆزەکەرەی لەوێدا دانیشتوە و بەلامانەوە ئاسایی نەبێت کە سواڵ دەکات . بەڵام کاتێک تۆش خۆت دەکەیت بە ناو مزگەوتەکەدا و خەریکی دوعا و داواکاری لە خودای گەورە ، کە ئەمەش جۆرێکە لە سواڵی...تۆ چیت بۆ خودا کردووە تا داواکاریت ھەبێت لێی..؟ ھەرچەند کەسەکە درک بەمە ناکات . کەواتە گوناھیشە .
بڕواننە مووچەخۆرێک ، چۆن ھەردوو سیفەتەکەی تیا کۆبۆتەوە ھەم گوناھ ھەم سواڵکەری . ئاخر گەر چاوەڕێکردنی موچە سواڵکردن نەبێت ، نازانم چیتر ناو بنێین سواڵی . ئاخر دەبێت ئەوەش بزانین زۆربەمان ھیچ شتێک پێشکەش ناکەین و بەردەوام ئەم چاوەڕێییەش دەکەین ، یان ئەرکێکی نیوەناچڵ و خراپ و کەم جێبەجێ دەکەین . ھەمان شت بۆ ملێۆنەرێکیش ڕاستە و ئەویش چاوەڕێی دەستی کەسانی ترە و حەزیشی لەوەیە بێ بەرانبەر پارەیەکی خەیاڵی بێتە دەستی . خۆ ئەگەر ئەم داماوە خاوەنی شارێکیش بێت ، چاودەبڕێتە ماڵی ھەژارێک و لێی دەباڕێتەوە تا خانوەکەی پێبفرۆشێت و ئەویش بیڕوخێنێت و بیکات بە پالاس . تەنھا لێرەدا جیاوازیەکە ئەوەیە ، کە ئەم سواڵیەکی گەورە تر دەکات و خواستی دەسکەوتێکی گەورەترە ، ئەی ئەمانە داماو و جێگەی بەزەیی نین . خۆ ئەگەر کەسێکی باڵاو سەرۆکێکیش بیت چاوت لە دەنگ و ھاوکاری ئەوانیترە کە لە چواردەورەتن...
ئەمە بۆ منداڵێکی شیرەخۆرە و گەورەش ڕاستە ، کاتێک چاوەڕێی دەستی گەورەو بەخێوکەرەکەیەتی تا شیری پێ بدات یان شتێکی بۆ بکڕێت و دڵی خۆش بکات . ھەندێ جاریش چاوەڕێی چەند وشەیەکی خۆشە لە دەمی چاودێر و بەخێوکەرەکەیەوە وەک ؛ پیاھەڵدان و ئافەرین و ...ھتد
ئاخر ترەمپ گەر داماو و سواڵکەر نەبێت ، چۆن دادەنیشێ لەبەردەم کۆمەڵێکا و کەسێکیش بە زمانی عەرەبی دۆعای بەسەردا بخۆێنێت ، تا خودا لە بەڵای کۆرۆنا و شەڕ بیپارێزێت ، لە کاتێکدا من وای نابینم ئەو باوەڕی بە خودا و ئاین ھەبێت . ئەی گوناھ بوون چیە ؟
جارێک لە گردبونەوەیەکی بیست کەسیدا ، یەکێک لە ھاوڕێکانم ناوی کەسێکی برد و وتی " فڵان کەس گوناھە." منیش خۆمم پێنەگیرا و وتم ھەر ئەو نا ، ھەموومان گوناھین . بەڵام ھیچ کەس لە گروپەکە نەیانوت وانیە . دیارە من مەبەستەکەم ئەوە بوو کە مرۆڤ یان بڵێین ھەموان نازانین لەسەر زەوی کتومت دەبێت چی بکەین ، بۆچی ھاتووین ، ژیانمان چۆن ڕێک بخەین ، یان ماف و ئەرکەکانمان چین . خۆ ئەگەر بشزانین ھەر نایان سەلمێنیین . خۆمان یەکێکین لە گوناھ و سواڵکەرەکان بەزەیشمان بە خەڵکانی تردا دێتەوە و ھەندی جاریش دەبەخشین چونکە لامان وایە ئێمە بەخشندە و ئەوانیتر سواڵکەرن .
من سورم لەسەر ئەوەی بڵێم ھەمووان سواڵکەر و گوناھین . چونکە ئێمەی مرۆڤ ھەمو چرکەیەک تەنانەت خەریکی سواڵی ھەناسەیەکی پاک و چاوەڕێی و ساتێکی بەختەوەری و ھەواڵێکی خۆش و دەسکەوتێکین .