وه‌زیره وه‌رزێره‌كانی حزب
عیماد عه‌لی
2020-06-29
له‌م ماوه‌یه وه‌زیرێك نه‌ك به پێچه‌وانه‌ی هه‌ڵوێستی
سه‌ركرده‌كه‌ی به‌ڵكو به نه‌رمونیانیش رای تایبه‌تی خۆی له‌سه‌ر بابه‌تێكی نه‌ته‌وه‌یی
به حۆرێك ئاشكراكردبوو كه نه‌دژی حزبه‌كه‌ی بوو و نه‌ش له‌گه‌ڵیدا بوو، كه خاوه‌نكاری
ده‌سترۆیشتوو پێی زانیبوو بانگرابوو، به‌شێوه‌یه‌ك مامه‌ڵه‌یان له‌گه‌ڵدا كردبوو كه
ره‌شه‌ه‌با به ده‌واری شڕی نه‌كردبێت. وه‌زیری داماویش بۆ قه‌ره‌بوكردنه‌وه‌ی ئه‌و
باره به ئاشكرا و له راگه‌یاندندا، ئه‌وه‌ی له خودی بیروبۆچونی خۆیدا باوه‌ڕی
پێنه‌بوو رایگه‌یاند و خۆی له‌و نه‌هامه‌تیه رزگار كرد.
ئه‌مه چی ده‌گه‌یه‌نێت؟
* نایه‌كگرتووی رابۆچونی نێوخۆی حزب و جیاوازی ستراتیجی
له‌مه‌ڕ پرسه‌كان و بونی كادری هه‌مه‌چه‌شنی بیرو فكری جیاواز له نێو حزبه‌كاندا.
* وه‌زیری و پله‌وپۆست ته‌نها بۆ لایه‌نه مادیه‌كه‌یه
و پشودرێژی و سه‌برگرتن قبوڵكردنی زه‌لیلی
و شكۆشكاندن له‌لایه‌ن فه‌رمانره‌وایانی حزبه‌كانی تریشه‌وه، ته‌نانه‌ت نه‌ك به‌ته‌نها
بۆ ده‌سترۆیشتوانی حزبه‌كانی خۆیانه‌وه،
له پیناو ماده‌یه نه‌ك خزمه‌ت وه‌ك ده‌ڵێن.
* ئه‌وه‌ی بیرو پره‌نسیپ و فه‌لسه‌فه هه‌یه به رێژه‌ی ره‌هایی له
لایه‌ن ئه‌و حزبانه‌وه نه‌ماوه و ته‌نها وه‌كو كۆمپانیایه‌ك مامه‌ڵه له‌گه‌ل
پرس و پێشهاته‌كان ده‌كه‌ن له‌و نێوه‌نده‌شدا كاروباری وه‌زیر و گزیر و وه‌رزێره‌كانیان.
* به پێچه‌وانه‌ی ئدیعاكانیان ره‌فتار ده‌كه‌ن و به‌ناوی
دیموكراسی ئه‌وپه‌ری دكتاتۆریانه له‌گه‌ڵ ژێره‌ده‌سته‌كانیان ده‌جوڵێنه‌وه و
زمانی سه‌رده‌م لای ئه‌مانه به قوفڵی به‌رژه‌وه‌ندی تایبه‌ت و پاره‌په‌رستی كڵۆم
دراوه.
* حزب جێگه‌ی په‌رله‌مان و حكومه‌تی گرتۆته‌وه و سه‌رجه‌م
بریاره‌كان پێشوه‌خت له حزبه‌وه ده‌ره‌دچێت و ئه‌ركی په‌رله‌مانتار و وه‌زیری وه‌رزێر ته‌نها جێبه‌جێ كردنه.
* كۆمپانیاچێتی جێگه‌ی هه‌موو حزبایه‌تیه‌كی راسته‌قینه‌ی
گرتۆته‌وه و له‌م باره‌وه كوردستان و حزبه‌كانی ده‌سه‌ڵات داهێنانیان كردووه.
* ئه‌وه‌ی پاره و هێزی لایه سه‌رۆك و سكرتێر و فه‌رمانده‌ی
حزبه و فه‌رمانی عه‌سكه‌ری به‌ناوی بڕیاری سیاسیه‌وه ده‌رده‌كات .
* كادران ده‌سته‌مۆن و به هیچ شێوه‌یه‌ك راو رای جیاواز
و ره‌خنه و ره‌خنه له‌خۆگرتن باسوخواسی نه‌ماوه و ته‌نها باس له قازناجه
مادیه‌كانی كۆمپانیاكه‌یه و به‌س.
* ئه‌م ره‌فتار و بیروبۆچونه ناحزبیانه پله به پله
و به‌په‌ك ئاستی به‌رپرسیاریتی بۆ خواره‌وه شۆر بۆته‌وه. كادر هه‌بووه هه‌زار و یه‌ك جوێنی به‌سه‌ركردایه‌تی
و كه‌سی یه‌كه‌می حزبه‌كه‌ی داوه گوایه له مه‌بده‌ئی ئه‌و حزبه‌ه‌ی لایداوه،
دوای ده‌ست به‌سه‌رشاندا هێنانی و كڕینی سه‌یاره‌یه‌ك، وا باسی ئه‌و كه‌سه‌ی كه
تادوێنی دژی بووه كردووه كه شان له
شانی جیفارا ئاسا ده‌دات و خه‌باتی راسته‌قینه لای ئه‌وه، یان ره‌خنه‌ی له
بندیواری گرتووه و پله‌كه‌ی خۆی له‌خواره‌وه‌یه
و سێ بندیواری هه‌یه، واته دوفاقیزم و ڕاڕایی و بێ فكری سه‌رجه‌م كادرانی ئه‌م
حزبانه‌ی گرتۆته‌وه و هه‌ر یه‌ك به پله‌یه‌ك.
بۆیه ده‌كرێت بڵێین ئه‌م وه‌زعو شێوه‌ی حزبایه‌تیه
وایكردووه كه كادر ببێت به كاوڕ و وه‌زیر ببێت به وه‌رزێر و سه‌ركرده ببێت به
سه‌ریگرته و حزبیش نه‌مێنێت و كۆمپانیای بازرگانی جێگه‌ی بگرێته‌وه وحسابات جێگه‌ی
گفتوگۆ بگرێته‌وه و ململانێی سودبینینی بڕی مادی جێگه‌ی مللانێی راسته‌قینه‌ی سه‌رده‌مانه بگرێته‌وه
و ئه‌وه‌ی نه‌زان و پاشه‌ڵ پیس و ناشاره‌زایه به‌هۆكاری پێوه‌ری نوێ كه
خۆنزیكركردنه‌وه و مه‌رایی و فرتوفێڵ و خستنه ژێر پێی هه‌موو به‌هاكانه، له
نێو حزب و ده‌سه‌ڵاتی حكومه‌تیشدا له‌سه‌رووی هه‌مووانه‌وه‌یه.