بەلاڕێدا بردنی شێرزاد حەسەن

نالی پێنجوێنی
  2021-12-21     610

داکۆکییەك لەشێرزاد حەسەن:

سەرەتا دەمەوێ ئاماژە بەوە بدەم، خودا کە مرۆڤی درووستکردووە ئازا  دیی پێبەخشیووە. ئەوە ئازادیی و ئیرادەو ئیختیارە، مرۆڤ لە گیانلەبەرێك و داروبەردێك جیادەکاتەوە. بێگومان، ئەوەش بەشێكی ئەو ڕێزەیە کە خودا لە مرۆڤی گرتووە (ولقد كرًّمنا بني آدم- ئيسرا، 70 ) هەرکات مرۆڤ ئیرادەو ئازادیی لێبسنرێتەوە، تایبەتمەندیی و جیاوازی لەگیانلەبەرو و مەخلوقاتی تر نامێنێ و فەلسەفەو حیکمەتی بەدیهێنانی لەدەست دەدات. مرۆڤ لە هەڵبژاردنی ئایین و بیروباوەڕیدا، ئازادەو لەو ڕووەوە ئازادیی تەواوی هەیە ( فمن شاء فليؤمن، ومن شاء فليكفرـ كهف،29) ئاشکرایە، مرۆڤ مەخلوقێکە دارای بیرکردنەوەو پرسیارو گومانکردنە، ئەوەش کۆمەکی ئەوەی دەکات کە لە حەقیقەت و جەوهەری شتەکانی دەوروبەری باشترو جوانتر تێبگات. لەو ڕێیەوە، پەی بەقوڵایی شتەکان بەرێت و لەتوێکڵ و ڕواڵەتی ژیاندا گیرنەخوات. پێغەمبەران، سەلامی خوایان لێبێت، لەو ڕووەیشەوە پێشەنگن و هەوڵیان داوە بەپرسیاکردن پەی بەجەهەرو ماهییەتی شتەکان بەرن و لێیتێبگەن. (وإذ قال إبراهيم رب أرني كيف تحي الموتى؟ بقرة،260) لەئیسلامدا، دیالۆگ و دیبەیت و ڕەخنەگرتنی زانستییانەو بەرمەبنای بەڵگەو ئەرگۆمێنت و واقیع، بەمەرجێ لەچوارچێوەی ئەدەب و ڕێز دەرنەچێ، نەچێتە خانەی جوێن و سووکایەتی و تەشهیرەوە، کارێكی ئاسایی و ڕێپێدراوە(وجادلهم بالتي هي احسن) قورئان داوا لەموسڵمان دەکات، لەکاتی گفتوگۆو دیبەیتی شوێنکەوتوانی ئایینەکانی ترو نەیارەکاندا، جوانترین شێواز پێڕەو بکات و ڕێزی ڕای جیاوازو بەرانبەر بگرێت. هەرچەندە، هەندێك لە بۆچوون و ڕەخنەو قسەکانی مامۆستا شێرزاد حەسەن (دەمەوێ لەبابەتێکی دیکەدا وەڵامێکی بۆ بنووسم) زانستیی نین، شێوازی دەربڕینیان، سنووری ڕەخنە دەبەزێنن و تێبینی زۆر هەڵدەگرن. بەڵکو لەخانەی تەشهیرو چەواشەکاریی و جنێودانەوە نزیکترن تا ڕەخنەگرتن. بەڵام ئەوە مانای ئەوە نییە، کەس مافی ئەوەی هەبێت، بەناوی داکۆکیکردن لەدین و پیرۆزییەکان، بەقسەو هەڵوێستی ناشیرین و نەشیاو، وەڵامی بداتەوە. یاخود بەهەڕەشەو چاوسوورکردنەوەو تۆقاندن بێدەنگی بکات. ئەو جۆرە کارانە، بەهیچ کلۆجێ لەگەڵ تێگەیشتنێکی ڕاست و درووست و میانڕەویانەدا بۆ ئایینی ئیسلام یەکناگرێتەوەو دوورە لەڕووحی لێبووردەیی ئیسلام. ئاشکرایە، هیچ کام لەڕەوتە ئیسلامییە دیارەکانی  کوردستان، تەبەنی ئەو جۆرە خیتاب و هەڵوێستانە ناکەن و بەئاشکرا دژی دەوەستن. ئەوان، ڕۆڵی بانگخواز دەبینن نەك حکومدان و قەزاوەت. کاریان ڕێنمایی و پەروەردەو هۆشیارکردنەوەی خەڵکە، نەك بەکافرو مولحیدو زەندیق کردنی ئەم و ئەو. وەك ئەوەی بەڕێزکاك (ئاراس فەتاح، هونەری بێدەنگکردن) بەناڕەوا ئەو تۆمەتەیان دەداتەپاڵ، هاوشێوەی پارتیی و یەکێتیی، بەکاری توندوتیژی و بێدەنگکردنی ڕەخنەگرەکان تۆمەتباریان دەکات! ئەو قسەیە هیچ بنەمایەکی نییەو ئاوەژووکردنی ڕاستییەکانە. ئاشکرایە، دوای ڕاپەڕین، یەکەم کاری تیرۆریستی دژی کادێرێكی باڵای یەکگرتووی ئیسلامیی لەهەولێر ئەنجام درا. شەهیدەکانی بادینانی یەکگرتوو، مامۆستا ئیسماعیلی هەولێر، هاوشێوەی سەردەشت عوسمان و کاوە گەرمیانیی، قوربانی دەستی تیرۆرن؟ ناحەقییەکی گەورەیە، جەللادو قوربانی لەیەک خانەدا دابنێی و وەك یەك وێنایان بکەیت!. ڕێی تێدەچێ، ئەو دەستەی لەپشتی تیرۆری سەردەشت و کاوەو دکتۆر هۆشیارەوە بێ، کاری نەشیاو بەرانبەر مامۆستا شێرزاد حەسەن ئەنجام بدات. تا دەستە چەورەکەی خۆی بەسەر ئیسلامییەکاندا بسڕێت.

ئایا شێرکۆ کرمانج شێرزاد حەسەنی بەلاڕێدا بردووە؟

لەبابەتێکدا بەڕێز کاك (شێرکۆ کرمانج، من بووم نەك شێرزاد حەسەن) دەڵێت: ئەو خاوەنی ئەو بیرۆکەو قسەیەو بەتوێژینەوە بەو دەرئەنجامە گەیشتووە کە (وانەکانی پەروەردەی ئیسلامیی لەقوتابخانەکانی هەرێمی کوردستان داعش بەرهەم دەهێنن) دەڵێ گوایە شێرزاد حەسەن قسەکەی ئەو دەکات. بۆ پشتڕاستکردنەوەی قسەکەی، نموونەیەك لەکتێبی پەروەردەی ئیسلامیی بۆ پۆلی پێنجەمی بنەڕەتیی ل٤٠ دەهێنێتەوە { شاندێکی کریستیانەکانی نەجران، هاتنە لای پێغەمبەر د.خ، ئەویش دوای باسێکی چڕوپڕی ئیسلام، پێی فەرموون، ئەوە ئیسلامە، یان وەریبگرن یان سەرانە بدەن، ئەگەر نا خۆتان ئامادەبکەن جەنگتان لەگەڵ دەکەین} بۆ تیشک خستنە سەر ئەو ڕووداوە ئەم چەند خاڵە دەخەمەڕوو. یەکەم، باسی ڕووداوێکی لەو چەشنە، بۆ پۆلی پێنجی بنەڕەتی هیچ پێوست نییەو لەئاستی تێگەیشتی ئەو قۆناغەی خوێندندا نییە. گومانیش دەخاتە سەر پسپۆڕیی ئەو لیژنەیەی کە ئەو بابەتەیان نووسیووە. ئەوەش دەسەلمێنێ کە ئەو لیژنەیە، لەبواری پەروەردەدا چەندە دەستوپێ سپین! دووەم، خوێندنەوەو تێگەیشتنی بەڕێز کاك (شێرکۆ کرمانج) لەو ڕووداوە، ئەوەندەی تێگەیشتنێكی ڕووکەش و خوێندنەوەیەکی درشتبینە، نیو هێندە بەڵگە نییە بۆ ئەو قسەیەی کەدەیکات، ئەوەش دەیسەلمێنێ کەئەویش لەو ڕووەوە چەندە مەعریفەیەکی سەرەتایی و کرچ و کاڵی هەیە. سێیەم، لەفەرموودەکەدا وشەی "جزیە" هاتووە نەك سەرانە، ئەو دوو دەستەواژەیە زۆر لەیەکەوە دوورن. "جزیە" ئەو بڕە پارەیەیە کەهاووڵاتی و هاونیشتمانی غەیرە موسڵمان، لەبری خزمەتی سەربازیی و وەك زەریبە(باج) دەیدەن. ئەوەش یاسایەکی ئیداریی و ئابوورییەو لەتەواوی وڵاتانی دنیادا پەیڕەو دەکرێت. لەئیسلامدا، موسڵمان زەکاتی وەك ڕوکنێکی ئایینی لەسەر فەرزکراوەو دەبێت بیدات. ئیتر بۆ دەبێ یاسایەکی باجدان بۆ غەیرە موسڵمان، وەك بەرهەمهێنانی فیکری داعشیزم لێکبدرێتەوە!. چوارەم، ئەمڕۆ لەپێشکەوتووترین و دێمۆکراسیی ترین وڵاتانی دنیادا، هەر کەس و گرووپ و تاقمێكی ئایینی یان ئیتنی، بەهۆکاری ئایینی و بیروباوەڕ، ملەکەچی یاساکانی باج نەبێ و ئەو بڕە پارەیە بەدەوڵەت نەدات، ڕووبەڕووی لێپێچینەوەی یاسایی دەبێتەوە. بەتایبەت کاتێك ئەگەری ئەوەی لێبکرێت ببێتە مەترسی بۆ سەر دەوڵەت. پێنجەم، زۆر بەداخەوە، کاك شێرکۆ کرمانج، تێگەیشتنی هەڵەو ڕووکەشی ناوناوە توێژینەوەی زانستی و بەخەڵكی دەفرۆشێتەوە! سەیرە، ئەوە ئاستی تێگەیشتن و توێژینەوەی کەسێك بێت، کە خۆی بەکەسی ئەکادیمیی و خاوەن توێژینەوەو مامۆستای زانکۆ بزانێت! ئەو جۆرە تێگەیشتن و خوێندنەوە ڕووکەشە، یان لەعەقڵێكی ئایدیۆلۆژییەوە سەرچاوەی گرتووە، یاخود هێشتا لەئاستی تێگەیشتنی قوتابییەکی پێنجی ناوەندیی تێنەپەڕیووە، ناکرێ گرێ و بوغزی ئایدیۆلۆژیی بەناوی توێژینەوەی زانستییەوە دەرخواردی خەڵك بدرێ. ناوەندیی ئەکادیمیی و ڕۆشنبیریی کورد، بەو شتە هەڵانە لیخن بکرێ. دەکرێ ئەو جۆرە لێکدانەوەو بەناو توێژینەوانە، شێرزاد حەسەن و خەڵکی دیکەش بەهەڵەدا ببەن.

وتاری زیاتر

زۆرترین بینراو
© 2022 Awene Online, Inc. All Rights Reserved.
×