مەعریفەی نوێ وەک کەرەستەیەکی تازە لەکایەی ژیاندا

شۆرش خالید ئاژگەیی
  2022-04-07     348

ماڵ، نیشتیمان، زێدی بابوباپیران ئەو شوێنەی رەگوریشەی لە ناختدا داکوتاوە. هەستێک، مەیلێک و خواستێکی شاراوە هەمیشە لە قووڵایی ناخدا بۆ ئەو شوێنە راتدەکێشێ تیایدا هەست بە سەربڵندی، ڕێزو بوونێکی مەلموس و هەست پێکراوەوە دەکەی. 

 

کولتور، شارستانی و مەعریفەی ناسینی خود، لە ناو کایەی سیاسی و  ئەم هەموو ئایدیۆلۆژیاو ئاراستەو تەوژمە مەعریفی و سیاسی و کولتوری و ناوچەو خێڵ و ناوچەگەرێتی هەمەچەشنەوە، ئەشێ  لە توانای سنوورداری مەعریفەی تاک رەهەندی مرۆڤدا نەبێ. 

 

گەڵاڵەکردنی دونیابینی و مەعریفەی پرسیارکردن و گەڕان بە دوای وەڵامی پرسیارە سادەکان کە پانتای ئەم جیهانەئاڵۆزەی ئێمەی گیرۆدەی جوانی و ناشرینیەکانی خۆیەوە کردووە، هەنگاوهەڵێنانی رژدی گەرەکە. 

 

پەیوەست بە خودێکی گەریدەو پرسیارکەر لە دونیایەکی فرەرەهەندی ئاڵۆز، دۆزینەوەی مێتۆدە زانستیەکان بۆ راڤەکردنی  هۆکاری ئاڵۆزیەکان، مۆتیڤی ناکۆکیەکان، هۆی دووبەرەکیەکان، ئاست و جۆری  بەرژەوەندیەکان، قەوارەی ئاستەنگەکان، وەڵامی پرسیارەکانی بۆ؟ کوا؟ کەی؟ کارێکی ئاسان نیە.

 

شکاندنی تەوق و ئەو زنجیرەی سەرلەبەری دونیای هزرو روانین و بینینی حەقیقەتە سادەو مێژووییەکانی رووبەری هزری ئێمەی تەوق و لە خاچداوە، فکرو تازەگەری و دیدگای نوێی گەرەکە.

 

ئەم هەنگاوە پێویستی بە بوونی مەعریفەیەکی نوێیە. پێویستی بە خۆتەکاندنە لە تۆزوخۆڵی ئەوەی بووە بە کۆمەڵێک پەندو وانە لە رابردوویەک ئێمە بەرهەمەکەینی. 

 

بەردەوامیدان بە ئاراستەیەکی فکری قەتیس ماوی لە پەلوپۆ کەوتووی فەرهەنگێکی نوقسان وەک کەرەسەیەکی گواستنەوە لە قۆناغێکەوە بۆ قۆناغێکی باشترو باڵاترەوە، لە پێناو بونیاد نانەوەی دوێنێیەکی پڕ پەند و بەرهەمهێنانەوەی،  کارێکی نەکردەیی و خولانەوەیە بەدەور خودێکی سەرگەردان و چنینەوەی سەرگەردانی و دڕدۆنگی و  دەرهاوێشتەی ترە.

 

 

 

 

(2) 

دیوەکەی تری هێز، ئاشتیە

دڵۆپەکانی باران زۆر بە هێواشی و بە ئەسپاییەوە روویان کردۆتە ئەملاوە و بە دەنگێکی نزم و کزەوە خۆیان دەکێشن بە پەنجەرەی ماڵەوە. 

 

ڕەشەبایەکی تووند لەم بەهارە گەڵارێزانەی هەواڵی جەنگ و کاولکاری و خوێن و بارووتی ئۆکراینا، بێ بەزەییانە هەڵیکردووە. 

با دەنگی پێیەکانی نایەت، رەنگی نیە، سیمای نیە،  بەڵام زۆر بەهێزە و بۆن و بەرامەی رووداوەکانی ئەمبەرو ئەوسەری گیتیمان بۆ دەهێنێتە ناوماڵ و بەردەرگای کوچەو کۆڵانەکان و پانتای شارەوە. 

 

دوو مانگ زیاترە ئەم شارە کەتۆتە بەر پەلاماری هێزی سوپای پیادەو ئاسمانی و کۆماندۆی باوەو لە سی ساڵی رابردوودا حاڵەتی وا بە بەردەوامی زۆر دەگمەن بووە. 

 

ترسێکی داپۆشراو لە ناخی خەفەکراوی دانیشتوانی شار بە سیمایانەوە دیارە…هەرچەندە زۆربەیان هەوڵی شاردنەوەی  ئەم ترسە ئەدەن، لێ ترس لە گەورەبوونی رەهەندەکانی جەنگ، نەبوونی، هەژاری، گرانی، برسێتی و لەهەمووشی ترسناکتر جەنگی ماڵوێرانکاری ئەتۆمی لێرەولەوێ جارناجارێک دەکەوێتە بەر باسوخواسەوەو مووچرکە بە جەستەی مرۆڤدا دەهێنێ.

 

جەنگێک گەر روو بدات ئەوەی ئاسەواری ژیانە بە دونیاوە نایهێڵێ و کۆی گیتی دەکات بە وێرانەیەک و کەلاوەیەک. 

 

دواجار هەر مرۆڤە لە رێگەی گوتاری تووند و ئاگرین و خواستێکی ناوەکی شەڕەنگێزی و مەیلێکی شاراوەی ڕقاوییەوە، بەگژئەوانیتردا دەچێتەوەو هەم  دووبەرەکی و ڕق و قین و جەنگ و کاولکاری بەرهەم دێنێ، هەم ترسیش ئەکات بە هەڕەشەو مەترسی و موتەکە بۆ سەر کۆی کایەی  ژیان و لەناوبردنی ئاشتی و پێکەوەهەلکردن و ژیانەوە. 

 

ئا لێرەوە مێژوو بە رووقایمی خۆی دووبارە دەکاتەوە. بەڵام ئەمجارە، لە دۆخێکی دەگمەن و  لە بەرگێکی نوێ و بە ئامادە بوونی رۆڵی بکەری تازەوە هەنگاو  دەنێت بە ئاراستەی نووسینەوەی خۆیەوە.  

 

ئەگەرێکی زۆرە دیسانەوە مەیلی خۆسەپاندن و هەژمونگەرایی  لایەنە ئاشکراو شاراوەکانی جەنگ، هانی خۆش کردنی ئاگری جەنگەکە بدەن و هیوای کۆتاێی جەنگ لەناو بەرن . 

 

رەنگە دیسان ئایدیۆلۆژیای سەربە ئەمو ئەو قوتابخانە ببن بە کەرەسەی جەنگێکی درێژخایەنی سووتێنەر و دواجار لە فۆرمی دەرهاوێشتەیەکی مەترسیدار، جەمسەربەندی هێزوهەژمون و زاڵبوونی بەرژەوەندیە ستراتیژیە هەمیشەییەکانی لێبکەوێتەوە.

زۆرترین بینراو
© 2022 Awene Online, Inc. All Rights Reserved.
×