کە گەیشتمە بەردەرگای زۆنی سەوز، لەپرسگەی سەرەکی، هێزێکی پیشەیی بە چەکی قورسەوە لە ئامادەباشیدابوون. بەو گەرمایەی بەغداد، ڕێکپۆش و پڕپۆشبوون و لە ڕوخساریاندا هیچ جۆرە هەستێکی شەخسی دەرنەدەکەوت و هەموو زانیاریەکانیان کۆنترۆڵدەکرد. ئەمانە هێزێکی سەر بە دژە تیرۆرن کە ڕاستەوخۆ لەلایەن سەرۆکوەزیرانەوە بەڕێوەدەبرێن.
پاش تێپەڕینم بەنێو زۆنی سەوزدا، کۆمەڵێک هێزی دیکەی پڕ چەکەم بینی. ئەمانیش زۆر ڕێکخراو دەهاتنە بەرچاوم و زۆر جددی دیاربوون. پێیانوتم ئەمانەش هێزەکانی سەماحەتی سەید موقتەدان.
دواتر هاوڕێیەکی ئەکادیمی بەغدادیم دەعوەتیکردبووم بۆ خوانی ئێوارە بۆ رۆستۆرانتێکی نەریتیی پایتەخت. پێش ئەوەی بگەم، سەدان ئۆتۆمبیلی سەربازیم دەبینی لە نمایشێکی سەربازیدابوون و چەکدارەکان بەدەنگی بەرز سرودە جیهادیەکانیان دەوتەوە. پێیان وتم ئەمانە هێزە چەکدارەکانی حەشدی شەعبین.
ڕۆژی دواتر لە ناوچەی سەوز ، لە چەند سەعاتێکی جیاوازدا، بەڵام لە هەمان شوێندا، چەند توێژەرێکی نزیک لە حەشد و تەیاری سەدری و سەرۆک وەزیرانم بینی...لەکاتی بینینیاندا هەستم بەوەکرد چەند درزی گەورە لەنێوانیاندایە بەڕادەیەک کە ئامادەنەبوون تەوقەش لەگەڵ یەکتریدا بکەن.
تۆ ڕەنگە بزانی دڕان و دابڕان هەیە، بەڵام تا خۆت بەچاوی خۆت نەیبینیت و ئەزموونی نەکەیت، ناتوانیت بە کۆنکرێتی هەست بەو لێکترازانە کوشندەیە بکەی کە برا شیعەکانی گەیاندوەتە لێوارەکانی جەنگێکی براکوژی بێپێشینە!