لەجنێدەرەكەی ئیسلامی سیاسیەوە بۆ ئەخلاق فرۆشتنەكەی بافڵ تاڵەبانی، "شین بۆ روخانی ئێران "

کۆراڵ نوری
  2022-12-27     764


ماوەیەكی زۆرە ئیسلامی سیاسی‌و فیگەرەكانی بەراست‌و چەپدا كەوتونەتە تۆمەت بەخشینەوە‌و سوكایەتیكردن بەژنانی كوردستان بەپاساوی بەرگری لەئاینی ئیسلام، نەك هەر ئەوەش بەڵكو كەوتونەتە لێكدانە‌وەو شیكردنەوەی سەیروسەمەرە بۆ وشەی جێندەر، ئیتر بەقودرەتی ئیسلامی سیاسی جێندەر بوو بەبانگەشە بۆ شڤول.  
هێندەی نەفام‌و نەزان‌و بێ‌ ئاگا قسەیان لەسەر جێندەر كرد، هیچیان بۆ پسپۆر‌و شارەزاییان نەهێشتەوە بیڵێن. فیگەرەكانی ئیسلامی سیاسی دەیانەوێت بەدوو پێناسە كە لەداعیە عەرەبەكانەوە وەریانگێڕاوە، بابەتەكە بەو ئاراستەیەدا ببەن كە خزمەت بەئەجندای ئاغاكانی تاران‌و توران بكات. گرنگ نیە بەلایانەوه‌ شیرازەی خێزانی كورد‌و ئەم كۆمەڵگەیە تێكدەچێت‌و دەبنە هۆكاری ئاژاوە‌و دوبەرەكی نانەوە یاخود نا، گرنگ ئەوەیە ئەجینداكان وەك خۆی جێبەجێ‌ بكەن...

كۆمەڵێك خەڵكی سادەش دوای قەرەباڵغیەكە كەوتون، كە ئەمە بۆ من تارادەیەكی زۆر ئاساییە، بەڵام هەندێك بەناو رۆژنامەنوس‌و میدیاكار، لەو نێوەندەشدا هەندێ‌ فیگەری گشتی بەبێ‌ ئەوەی هۆشیاریو زانیاری تەواویان لەسەر بابەتەكە هەبێت، یان بەبێ‌ ئەوەی پرسیار لەخۆیان بكەن بۆچی ئیسلامی سیاسی لەئێستادا ئەم بابەتەی وروژاند‌و ئامانجیان چیە؟ هەموویان خۆیان فڕێداوەتە ئەو گۆمە لیخنەوە‌و بوون بەشرۆڤەكار، موحەلیل، موفەسر‌و شارەزا ئیتر نازانم  ئەمە لەبەر بێئیشیە، وەكو كورد دەڵێت: شەڕ لە بەتاڵە باشترە، یاخود بۆ سواڵی لایك‌و كۆمێنتە لەفەیسبوك؟ یان ئەوانیش بەشێكن لەو ئەجیندایە؟

هێرشە ناڕەوا‌و پلان بۆ دارێژراوەكانی ئیسلامی سیاسی‌و  فیگەرەكانی، گەیشتە ئاستی تۆمەت دروستكردن بۆ هەندێ‌ كەسایەتی بەرێزی ژنان كە خاوەن پسپۆرین لەبوارەكەدا لەو نێویشیاندا پرۆفیسۆر د. چۆمان هەردی. ئیسلامی سیاسی بێ‌ ترس‌و شەرم لەخودا، بێویژدانانە كەوتنە تۆمەت بەخشینەوە كە ئەمە بەپێی كلتوری كوردەواریمان دەچێتە خانەی قسەهەڵبەستنەوە، لەئاینیشدا بوختانكردن كارێكی قێزەونی مونافیقەكانە.

ئەگەرچی حەزم بەزەمانی تەحداكردن نیە، بەڵام ئەم دۆخەی ئیسلامی سیاسی ‌و فیگەرەكانی هێناویانەتەكایەوە وا لەمرۆڤ دەكات بەو زمانە ئاخاوتن بكات بۆیە دەڵێم: تەحدای هەموو ئیسلامی سیاسی دەكەم كە بەشێوەیەكی زانستی بیسلمێنن جێندەر بەواتای شڤول دێت؟ تەحدای ئیسلامی سیاسی دەكەم كە هیچ ژنە چالاكوانێك یان هیچ كەسایەتییه‌ك بانگه‌شه‌ی‌ شڤولی كردبێت، ئەگەر وانیە فەرموون بەڵگەكانتان بخەنەرو، فەرمون پێمان بڵێن لە چ كۆڕ‌و سیمینارێكی ژناندا بانگه‌شه‌ بۆ شڤول كراوە، كێشەكە ئەوەیە هیچتان لەمەسەلەكە تێنەگەیشتون‌و هەموشتان كوپی‌و پەیستی قسەی یەكتردەكەن. وەك كاری هەمیشەیتان پەلاماردان‌و جێنودان‌و تەشهیرپێكردن كە ئەمە نە خوا‌و نەپێغەمبەر قبوڵیەتی ‌و نەقورئاندا رێگەپێدراوە، ئیتر نازانم ئێوە لەسەر چ دینێكن؟!!

لەكۆتایی نەوەدەكانەوە تا ئەمرۆ لەزۆربەی زۆری خولەكانی راهێنان دەربارەی جێندەر لەناوەوەو دەرەوەی وڵات بەشداربووم‌و دواتریش وەك راهێنەر لەبوارەكەدا كارمكردوە، بەڵام تەحدای هەموتان دەكەم ئەگەر رۆژێك لەرۆژان تەنانەت راهێنەرە ئەوروپی‌و ئەمریكیەكانیش بانگه‌شه‌یان بۆ شڤول كردبێت لەكۆرسەكاندا، بۆیە تۆزێك‌و یژدانتان هەبێت.

مەسەلەی جێندەرەكەی ئیسلامی سیاسی كۆتایی نەهات بافڵ تاڵەبانی كە زۆر بەداخەوە كوڕی پیاوێكی وەكو جەلال تاڵەبانیە، ئەویش خۆی هەڵدایە ئەو گۆمە لیخنەوە‌و بەناوی پارێزگاریكردن لە ئەخلاق، یانە شەوانەكانی سەرچناری داخست، هەندێك لە بەناو رۆژنامەنوسەكانی كوردستانیش كەوتنە پیاهەڵدانی ئەو كارە‌و بەتەنها وێنەی كۆمەڵیك ژنیان بڵاوكردەوە گوایە ئەوانە بەدرەوشتن وەك ئەوەی پیاوەكانی ئەو شوێنانە هەمویان لە كەعبەی شەریف سەرقاڵی نوێژی عیشا بووبن، نە كەس ناوی هێنان‌و نەكەس باسی كردن‌و نە وێنەشیان گیرا؟ تۆ بڵێ‌ ئەو ژنانە كاری لەشفرۆشیان لەگەڵ جنوكەدا كردبێت؟! هەمویان مەسەلەكەیان بەو ئاراستەیە برد كە ژنان بەدڕەوشتن، ژنان تێكدەرەن‌و پیاوەكانیش موسلیح‌و ویعازسەڵاتینی ( وعاڤ السلاگین)ئەم سەردەمەن.

مەخابن هەندێ‌ لە رۆژنامەنوسان كەوتنە پێهەڵدانی بریارەكە خۆیان‌و پیشە‌و كارەكانیان بیرچوەوە،  یەك رۆژنامەنوس نەهات پێمان بڵێت كێ‌ خاوەنی ئەو شوێنانەیە؟ ئایا چەند بەرپرسی حیزبی خاوەنی ئەو شوێنانەن‌و سەر بەچ حیزبێكن؟  چەند شوێنە‌و لە چ ساڵێكدا كراونەتەوە؟ كێ‌ رێگەی داوە ئەو شوێنانە بكرێنەوە؟ ئایا یاسایەك هەیە بۆ كردنەوەی ئەو شوینانەو رێكخستنی؟ واتە ئەو شوێنانە مۆڵەتی حكومەتیان هەیە؟ زۆربەی هاتوچوكارانیان كێن؟ ژنە لەشفرۆشەكان خەڵكی كوێن؟ لەشكڕەكان كێن؟ ساڵانە چەند باج دەدەن بە حكومەت؟ حكومەت ئەو بڕە باجەی لەچیدا خەرج كردوە؟ بۆچی لە ئێستادا بافڵ تاڵەبانی ئەم باسەی وروژاند؟ ئایا ئەمە كاری بافڵ تاڵەبانیە یان كاری حكومەت‌و دامودەزگاكانیەتی؟ لە بنەمادا كێ‌ رێگەی كردنەوەی پێدان‌و بۆچی ئێستا بیریانكەوتەوە كە ئەمە دژ بە ئەخلاقی كۆمەڵگەیە؟ ئایا ئەم بریارە پەیوەندی بە شەڕی بەرپرسان سلێمانیەوە نیە لەسەر زەویە گرنگ‌و گەشتیاریەكانی شار؟ چونكە كاری رۆژنامەنوس دواكەوتنی قەرەباڵغی نیە، بەڵكو گەرانە بەدوای راستیەكاندا لە سەرچاوە باوەرپێكراوەكانەوە، بێ‌ لایەنییە‌و پابەندبونە بە ئەخلاقیاتی كاری رۆژنامەنوسییەوە.  

بەهەر حاڵ هەموو ئەو نمایشە قێزەونە لە هزری سادەكاندا‌و بەروكەش پاراستنی ئەخلاقی گشتیە، خۆیان لێكردوین بە پاسەوان‌و حەسحەسی ئەخلاق.  بەڵام راستی مەلەسەلەكە سەرقاڵكردنی خەڵكی كوردستانە بۆ ئەوەی باسی رۆژهەڵاتی كوردستان‌و شۆرشی خەڵكی ئێران دژ بەرژێمە بەناو ئیسلامیەكەی تاران نەكەن، بۆ ئەوەی رۆژانە خەڵكی كوردستان لە سۆشیەڵا میدیا وێنەو گرتەی ڤیدیۆیی لەسەر وەحشیگەری رژێمی لەسێدارە بڵاونەكەنەوە، بۆ ئەوەی خەڵكی ئێمە هاوسۆزی بۆ كوردانی رۆژهەڵات دەرنەبڕن، بۆئەوەی خەڵكی كوردستان پۆست لەسەر تیرۆركردنی كەسایەتیەكانی رۆژهەڵاتی كوردستان‌و خەڵكی ئێران نەكەن.

برۆن سەیری پۆستەكانی سۆشیەل میدیای فیگەرەكانی ئیسلامی سیاسی بكەن بزانن كێ‌ باسی ئازارو ئەشكەنجەی كوردانی رۆژهەڵاتی كردوە هەر لە مەهسا ئەمینی كە بەوەحشیترین شێوە شەهیدكرا تا موژگان كاوسی توێژەر لە زمانی كوردی. ئەی بۆ كەسیان پۆستیان لەسەر دكتۆر ئایدا رۆستەمی نەكرد، ئەم خانمە بەهۆی ئەوەی بریندارەكانی تارانی لە ماڵەكەی خۆیدا چارەسەر دەكرد، سوپای پازداران بە وەحشیترین شێوە شەهیدیان كرد، بۆچی كەسسیان پۆستیان لەسەر لەسێدارەدانی گەنجانی رۆژهەڵات‌و گەلانی ئێران نەكرد ؟ بۆ پەیجەكانی ئیسلامی سیاسی رۆژانە پۆست لەسەر كردارە وەحشیگەریەكانی كۆماری لەسێدارە ناكەن؟ تەنها سەرقاڵی جنێو‌و سوكایەتین بە كەسایەتیەكانی كوردستان.

 پارساڵ كە شەر لە غەزە بوو، فیگەرەكانی ئیسلامی سیاسی داوایان لە گەنجانی كورد دەكرد بچن بۆ بەناو جیهاد دژی ئیسرائیل، واتە منداڵەكانی خۆیان نا بەڵكو دەیانویست كوری خەڵكی فەقیر‌وهەژار بكەنە سوتەمەنی ئەو شەڕە( كورد دەڵێت: دەستی خۆی نیە‌و ماری پێدەگرێت)،  ئەمە لەكاتێكدا سەركردەكانی حەماس كە ئەوان پەیوەستبوون بە مەسەلەكەوە، خۆیان‌و خێزان‌و منداڵەكانیان لەگەرمەی شەڕكەدا لە دوبەی/ ئیمارات بوون.    

ئەگەر لە غەزە منداڵێكی فەلەستینی بریندار ببێت هەموو میدیا‌و سۆشیەڵ میدیای ئیسلامی سیاسی دەكەونە شیوەن گێران، ئەی بۆ ئەو شیوەنە بۆ كوردانی رۆژهەڵات ناكەن كە هاونەتەوە، هاوزمان‌و هاوئاینن لەگەڵتاندا بۆیە بەرێزان شینەكەتان بۆ ئێران سودی نیە، دەسەڵاتی ئەو ڵاتە بەرەو كۆتایی دڕوات، رۆژانیش رۆژی لەدوایە. 

زۆرترین بینراو
© 2023 Awene Online, Inc. All Rights Reserved.
×