ئێرە باشووری کوردستانە، لەقوڕ قاچی کورسی و لە لیتەی لافاویش دەستکەوتی حزبی شین دەبێت، ئینجا ھەتا قوڕەکە خەستر بێت بێژەرەکە بەدەم گێرە و شێلانیەوە نرکە و نەڕەی بەرزترە، لێرە ڕووداوە سروشتیەکان ھەر لەخۆوە ئیلھامبەخشن بۆ دروستکردنی گوتاری ژەھراوی و دەمودەستیش کراسی سیاسیان لەبەر دەکرێت. ئەوەتا دەبینین ھەر مایک بەدەستە لەبری تیشک خستنەسەر گۆڕانکارییەکانی کەشوھەوا و ھۆشداریدان لە ئەگەری لافاوی دووەم و گرتنەبەری ڕێوشوێنەکانی کۆکردنەوەی ھاوکاری، کەچی لێمان دەبنە دادوەر و بە دروستکردنی غایلەی خراپ و نیەتی چەواشەکارانە پرسیارەکانیان دەگۆڕن بۆ ئایا ئەمە شکستی دەسەڵاتی خۆجێی ناوچەکەیە؟ ئایا ئەم کارەساتە لێکەوتەی گەندەڵی بوو؟ ئیتر بەبێ ئەوەی ئەنجامی ھیچ لێکۆڵینەوەیەکی زانستی و رەسمی چنگ کەوتبێت قوڕەکە دەکاتە بەڵگەی تاوان و لیتەکەش بەشێک لەپرۆژەی سیاسی ڕکابەرەکەی.
بەشێک لەو میدیایانە وەزعەکەیان وا ترشاندوە بەسەر یەکدا کە ھەر بەڕاستی گومان دەخرێتە سەر ھەر ھەوڵیکی مرۆیی و خێرخوازی، لای ئەوان ھەمووان کەمتەرخەمن و خۆیان پاڵەوان و فریادڕەس، تەنانەت بێعاریی بەو ئاستە گەیشتووە لەو قوڕ و لیتەی لەسەر ڕوخساری منداڵ و گەنج و پیر و جوان و کەلوپەل و دیواری ماڵەکانیش نیشتووە، ئەو لیتەی دەبێت وەک پیسییەک بەئاوی پاک بشۆرێتەوە دەکرێتە کەرەستەی پڕوپاگەندەی حزبی و بێشەرمانە دەڵێن تەنھا ئێمە دەزانین پاکی بکەینەوە بەبێ ئەوەی دەستەکانی خۆیان پیس بکەن. وەک دەوترێت باران ڕەحمەتی خوایە و لافاویش ھەر حیکمەتی خوایە، کەچی ئەوان دێن و دەست بۆ ئەم دەسەڵاتە بێسنورەی خالقیش دەبەن و بە زۆر کراسە تەنگە حزبیەکەی بە بەردا دەکەن. ئەرێ ھەر بەراست ئەو سیناریۆ کۆمیدیە چیە؟ سەرەتا لافاو وەک کارەساتی گەورەی سروشتی باس دەکەن و دوای یەک سەعات دەڵێن دەستی لایەنێکی لەپشتە؟. دەی ئافەرین و ھەر بژی بۆ ئەو میدیا و ڕۆژنامەنوسەی وێنەی ڕاستیەکانی دەگواستەوە و ئەو دەستەی نیشاندەداین خەریکی پاککردنەوەی قوڕەکەبوو نەک ئەو دەمەی وشەکانی بە ژەھر قەبە و ئاوس ببوون. ئای میدیای بێ ئامان تۆ دەزانی چ کەتنێکت کردووە؟ تۆ دەزانیت ھەزاران لێقەوماو چاوەڕوانی بەھاناوەچوون و ھاوکاری ڕاستەقینە بوون کەچی کەڵکتان لەو نیەت پاکی و دڵسافیەیان وەرگرت و سەرگەرمی چاودێری قازانجی حزبی بوون و ھێندەی تر قوڕ و لیتەکەتان خەستر کردەوە، حاشا ئەمە ئەخلاقی میدیای تەندروست نیە بگرە ئەمە بازرگانیکردن و وەبەرھێنانە بە ئازارەکانی مرۆڤەوە، درووستکردنی گومانە لەسەر ھەموو نیەتێکی باش و پاک و ئەو دەستانەی بۆ یارمەتی دڕێژ دەکرێن، بۆ ھەر ھەوڵێکی فریاگوزاری داماڵراو لە بەرژەوەندی حزبی و کەسی، شەرمەزاری بۆ ئەو میدیایانەی ئەم لافاوەیان کردە بازاڕی پلە و پۆست و دروستکردنی پاڵەوانی درۆینەی سەر شاشە.
ماڵی ئەو شاشەش بە قوڕ بگیرێت کە گریان و ناڵە و باڵایی مرۆڤەکان لەپێناوی بەرژەوەندییە حزبییەکان تەخت و بەخت دەکات. میدیا و میدیاکاری ھێژا لافاو بۆنەیەک نیە بۆ تاودانی ڕقی حزبی، تکایە با ئەم بێ ڕەفتارییە تائێرە بێت و بەس بێت، کەمیک بفامن لێقەوماوان مافیان بەسەر ئێوەشەوە ھەیە بەسەر گوتاری سیاسیشتانەوە، مافیان لەسەر ھەڵمەتی پاککردنەوەی ڕاستەقینە ھەیە، نەک پانکردنەوەی حزبی ؟!