لەماوەی تەنھا بیست و چوار کاتژمێردا، دەریای سپی ناوەڕاست بووە مەیدانی لێشاوێکی زۆری خەڵک، کاتێک ھەزاران گەنجی بێئومێدی مەغریب خۆیان ھەڵدایە ناو شەپۆلەکان تا بگەنە کەناراوەکانی شاری سبتە. ئەم دیمەنە سەیرە تەنھا بەھۆی ھەژاری یان جووڵەیەکی ئاسایی کۆچبەرییەوە نەبوو، بەڵکو بڕیارێکی یاسایی و بڵاوبوونەوەی خێرای لە تۆڕە کۆمەڵایەتییەکاندا بارودۆخەکەی تەواو پێچەوانە کردبووەوە.
سەرەتای چیرۆکەکە کاتێک دەستی پێکرد کە دادگای باڵای ئیسپانیا بڕیارێکی نوێی دەرکرد و ڕایگەیاند گەڕاندنەوەی خێرای کۆچبەران لەڕێگەی ئاوەوە نایاساییە. بەپێی ئەم یاسا نوێیە، دەریا وەک پەرژین ھەژمار نەکرا، لەبەر ئەوە، ھەر کەسێک بە مەلەکردن بگەشتایەتە کەناراوەکان، دەکەوتە ژێر پاراستنی یاساوە و مافی پارێزەر، پشکنین و داواکردنی پەنابەری پێدەدرا، بەبێ ئەوەی یەکسەر ڕادەستی مەغریب بکرێتەوە.
ئەم بڕیارە یاساییە ھێشتا نوێ بوو کاتێک لە تیک تۆک و فەیسبووکدا بووە ھەواڵی گەرم. قاچاغچییەکان و لاپەڕەکان دەستبەجێ ھەواڵەکەیان قۆستەوە و وەک دەرفەتێکی زێڕین نیشانی ئەو گەنجانەیان دا کە بەدوای داھاتوویەکدا دەگەڕان. دەنگۆی ھەواڵەکە لە جیھانی ئینتەرنێتەوە ھاتە سەر کەناراوەکان، و ئاوەکانی سبتە پڕ بوون لەو گەنجانەی بە ئومێدی یاساکەی ئیسپانیا مەلەیان دەکرد تا بپەڕێنەوە.
بەڵام ئەم ڕاکردنە بەپەلەیە بێ قوربانی و باجی قورس تێنەپەڕی، لەگەڵ دروستبوونی ئەم شەپۆلەدا، خەونی ھەندێک لە گەنجان لەنیوەی ڕێگەدا خنکا و کارەساتی گیانی لێکەوتەوە. بەپێی ھەواڵەکان، لانی کەم پەنجاو حەوت کۆچبەر لە نێو شەپۆلەکانی دەریادا خنکان و گیانیان لەدەستدا، کاتێک ھەوڵیان دەدا بگەنە ئەو کەناراوەی پێیان وابوو پارێزراوە.
ئەم دۆخە نەخوازراوە ئیسپانیای ڕووبەڕووی ئاڵۆزییەکی گەورە کردەوە. دەسەڵاتدارانی مەدرید بەپەلە کەوتنە خۆیان تا ڕێگە لە تێکچوونی ئاسایشی نیشتمانی بگرن، چونکە بڕیاری دادگا تەنھا گەرەنتی مافی یاسایی کۆچبەران دەکات، بەڵام بە ھیچ شێوەیەک بە واتای کردنەوەی بێسنووری دەرگاکان یان مۆڵەتی مانەوەی ئۆتۆماتیکی نایەت. بەپێی یاسای بیانییەکانی ئیسپانیا و یاسای ئاسایشی شارستانی، حکومەت دەسەڵاتی تەواوی ھەیە کە ھەر کۆچبەرێک کەیسی پەنابەرییەکەی ڕەت بێتەوە یان ھەڕەشە لەسەر ئاسایشی گشتی دروست بکات، دوای تەواوبوونی رێکارە یاساییەکان دیپۆرتی بکاتەوە.
ھاوکات، ئیسپانیا کەوتووەتە ژێر گوشارێکی ناوخۆیی زۆر تا  پەنا بباتە بەر ھەموارکردنەوەی یاساکان یان ڕێکەوتنی نوێ لەگەڵ یەکێتی ئەوروپا و مەغریب بکات، بە ئامانجی توندکردنی چاودێری سنوورەکان و ڕێگریکردن لە پەڕینەوە لە دەریادا تا ئاسایش و سەقامگیری وڵاتەکەی بپارێزێت.
لە کۆتاییدا، بڕیارێک کە بۆ پاراستنی مافی مرۆڤ دەرچووبوو، لە ڕێگەی تۆڕە کۆمەڵایەتییەکانەوە گۆڕا بۆ ئومێدێکی ناڕاستەقینە و کارەساتێک کە باجەکەی بە گیانی گەنجان و کێشمەکێشمی ئاسایشی ئیسپانیا درایەوە.